கோவை: தமிழக சட்டமன்றத் தேர்தலில் பாஜக முன்னாள் மாநிலத் தலைவர் கே.அண்ணாமலை களம் இறங்க உள்ளதாக பாஜக வட்டாரங்கள் தெரிவிக்கின்றன. கோவை வடக்கு அல்லது ஈரோடு மாவட்டத்தில் உள்ள மொடக்குறிச்சி தொகுதியில் அவர் போட்டியிட வாய்ப்பு அதிகம் உள்ளது.

மத்திய அமைச்சர் பியூஷ் கோயல், அண்ணாமலையை சந்தித்தபோது, “சட்டமன்றத் தேர்தலில் அண்ணாமலை கண்டிப்பாக போட்டியிட வேண்டும்” என்று தேசிய தலைமையின் விருப்பத்தை தெரிவித்தார். 

இதை ஏற்றுக்கொண்ட அண்ணாமலை, கோவை லோக்சபா தொகுதிக்கு உட்பட்ட ஏதேனும் ஒரு இடத்தில் போட்டியிட தயார் என்று பதிலளித்துள்ளார். இதனால் அவரது ஆதரவாளர்கள் கோவை வடக்கு தொகுதியில் அண்ணாமலை களமிறங்குவார் என்று உற்சாகமாக பேசி வருகின்றனர்.

இதையும் படிங்க: ஜோசியர் கொடுத்த வார்னிங்! அண்ணாமலை ஜகா வாங்கியதின் பின்னணி!! போட்டியிடாததன் காரணம் இதுதானா?

எனினும், பாஜக மத்திய தேர்தல் குழு உறுப்பினரும், கோவை தெற்கு எம்எல்ஏவுமான வானதி சீனிவாசன், கோவை வடக்கு தொகுதியை தனக்கு வேண்டும் என்று வலியுறுத்தி வருவதாக தகவல்கள் வெளியாகியுள்ளன. 

இந்த சூழலில், வானதி அடம் பிடித்தால் அண்ணாமலைக்கு மொடக்குறிச்சி தொகுதி ஒதுக்கப்படலாம் என்றும் பேச்சு அடிபடுகிறது. இருப்பினும், கோவை வடக்கு அல்லது மொடக்குறிச்சி ஆகிய இரு தொகுதிகளில் ஏதேனும் ஒன்றில் அண்ணாமலை தேர்தல் களம் இறங்குவது கிட்டத்தட்ட உறுதியாகியுள்ளது.

அண்ணாமலை தேர்தலில் நின்றால் பாஜகவுக்கு பெரும் பலம் கிடைக்கும் என்று கட்சி வட்டாரங்கள் நம்புகின்றன. கடந்த லோக்சபா தேர்தலில் கோவை உள்ளிட்ட பகுதிகளில் அவர் பெற்ற வாக்கு சதவீதம் கணிசமானது. இந்த முறை அவரை களமிறக்கி, மேற்கு மண்டலத்தில் பாஜகவின் செல்வாக்கை அதிகரிக்க தேசிய தலைமை திட்டமிட்டுள்ளதாக தெரிகிறது.

இருப்பினும், அதிமுக-பாஜக கூட்டணியில் தொகுதி ஒதுக்கீடு குறித்த சில கருத்து வேறுபாடுகள் இருப்பதாகவும், அண்ணாமலை அதிருப்தி தெரிவித்ததாகவும் சில தகவல்கள் வெளியாகின. ஆனாலும், பியூஷ் கோயலின் தலையீட்டுக்குப் பிறகு அண்ணாமலை மீண்டும் தேர்தல் ரேஸில் இணைந்துள்ளார் என்று அரசியல் வட்டாரங்கள் கூறுகின்றன.

தமிழக சட்டமன்றத் தேர்தல் ஏப்ரல் 23ஆம் தேதி ஒரே கட்டமாக நடைபெற உள்ள நிலையில், பாஜக வேட்பாளர் தேர்வு பணிகள் இறுதி கட்டத்தில் உள்ளன. அண்ணாமலையின் வேட்பாளர் நிலை உறுதியானால், கோவை மற்றும் ஈரோடு பகுதிகளில் தேர்தல் களம் சூடுபிடிக்கும் என எதிர்பார்க்கப்படுகிறது. அவரது முடிவு பாஜகவின் தேர்தல் உத்தியில் முக்கிய திருப்புமுனையாக அமையும் என்று அரசியல் பார்வையாளர்கள் கருத்து தெரிவிக்கின்றனர்.

இதையும் படிங்க: இன்று பாஜ வேட்பாளர் பட்டியல் வெளியீடு!! வீடியோ கான்பரன்ஸில் கலந்து கொள்ளும் மோடி! அமித் ஷா!!