தமிழ்நாடு சட்டப்பேரவையில் இன்று காவல்துறை மானியக் கோரிக்கை மீதான விவாதத்தின்போது பதற்றமான சூழல் நிலவியது. முதலமைச்சர் விஜய் நீண்ட நேரம் பதிலுரை அளித்து, சட்டம் ஒழுங்கு, முந்தைய ஆட்சிகால நிர்வாகம், குற்றச்சாட்டுகள் குறித்து விரிவாகப் பேசினார். அவரது பதிலுரை முடிந்ததும் திமுக உறுப்பினர்கள் தொடர்ந்து பேச அனுமதி கோரினர். சபாநாயகர் ஜே.சி.டி. பிரபாகர் அனுமதி வழங்காததால் அவர்கள் அமளியில் ஈடுபட்டனர்.

சபாநாயகர் இருக்கை அருகே தர்ணா செய்தனர். நீண்ட நேர சலசலப்புக்குப் பிறகும் பேச வாய்ப்பு கிடைக்காததால் திமுக உறுப்பினர்கள் வெளிநடப்பு செய்தனர்.சபாநாயகர் தனது நிலைப்பாட்டில் உறுதியாக இருந்தார். அவையின் ஒழுங்கைக் காக்கும் பொறுப்பை வலியுறுத்தி, உருட்டல் அல்லது மிரட்டலுக்கு அஞ்சாமல் செயல்படுவதாகத் தெரிவித்தார்.

விதிகளின்படி நடவடிக்கைகள் மேற்கொள்ளப்படும் என்றும், எந்தத் தரப்பின் அழுத்தத்திற்கும் இடம் தராத நிலையைத் தெளிவுபடுத்தினார். இதனால் சபையில் பதற்றம் மேலும் அதிகரித்தது. திமுக உறுப்பினர்கள் பேசுவதற்கான வாய்ப்பு மறுக்கப்பட்டதாகக் குற்றம் சாட்டி வெளியேறினர்.இந்த நிகழ்வு தற்போதைய சட்டப்பேரவைக் கூட்டத்தொடரின் தொடர்ச்சியான அரசியல் மோதல்களின் ஒரு பகுதியாக அமைந்தது. எதிர்க்கட்சியாக இருக்கும் திமுக, ஆட்சிக்கு வந்த தவெக அரசின் செயல்பாடுகளைக் கடுமையாக விமர்சித்து வருகிறது.

இதையும் படிங்க: ரத்தீஷ் யாருக்கு நெருக்கம்..? ஊழல்-ன்னு சொன்னாலே எழுந்துடுவாங்க..!! பேரவையை அதிர வைத்த CM..!

முதலமைச்சரின் பதிலுரையில் முந்தைய ஆட்சிகால குற்றச்சாட்டுகள், நிர்வாகத் தாமதங்கள், குடும்ப அரசியல் தொடர்பான குறிப்புகள் இடம்பெற்றன. இதற்குப் பதிலளிக்க வாய்ப்பு வேண்டும் என்ற கோரிக்கை திமுக தரப்பில் எழுந்தது. ஆனால் சபாநாயகர் அவையின் நடைமுறைப்படி தனித் தீர்மானம் மற்றும் பிற அலுவல்களுக்கு முன்னுரிமை அளித்தார்.வெளிநடப்புக்குப் பின்னர் சபை நடவடிக்கைகள் தொடர்ந்தன.

இதையும் படிங்க: PARTY FUND நேரடி பயனாளி ஸ்டாலின், உதய்..!! ஆதாரத்தை அள்ளி வீசிய CM விஜய்..!