உத்தரபிரதேச மாநிலம் ஆசம்கரில் பூஜை நடத்தப்பட்ட விவகாரத்தில் ஏற்பட்ட தகராறு அடுத்தடுத்து நடந்த துப்பாக்கிச்சூடு மற்றும் பிணைக்கைதி சம்பவமாக மாறியது. மனைவி மற்றும் இரண்டு புரோகிதர்களை சுட்டுக் கொன்றதாக குற்றம்சாட்டப்பட்ட அரவிந்த் சிங், தனது மூன்று குழந்தைகளையும் வீட்டுக்குள் அடைத்து வைத்திருந்த நிலையில், பல மணி நேர போலீஸ் நடவடிக்கைக்குப் பிறகு நடந்த துப்பாக்கிச்சண்டையில் உயிரிழந்தார். இந்த சம்பவத்தில் அவரது மகனும் உயிரிழந்தார். இரண்டு பெண் குழந்தைகள் பாதுகாப்பாக மீட்கப்பட்டனர்.

ஆசம்கர் மாவட்டம் ஷம்புபூர் கிராமத்தில் செவ்வாய்க்கிழமை மாலை இந்த சம்பவம் நடந்தது. சுமார் 6 மணியளவில் வீட்டுக்கு வந்த அரவிந்த் சிங், அங்கு தனது மனைவி பபிதா சிங் மற்றும் புரோகிதர்கள் மகேந்திர பாதக், அகிலேஷ் மிஸ்ரா ஆகியோர் பூஜை நடத்திக் கொண்டிருப்பதை பார்த்ததாக போலீஸ் தரப்பில் தெரிவிக்கப்பட்டுள்ளது.

பூஜை தொடர்பாக ஏற்பட்ட வாக்குவாதம் தீவிரமடைந்த நிலையில், அரவிந்த் தனது உரிமம் பெற்ற துப்பாக்கியால் துப்பாக்கிச்சூடு நடத்தியதாக போலீஸ் கூறியுள்ளது. இதில் பபிதா மற்றும் இரண்டு புரோகிதர்கள் உயிரிழந்தனர்.

இதையும் படிங்க: பள்ளி மாணவர்கள் கண்முன்னே ஆசிரியைக்கு நேர்ந்த கொடூரம்! முன்னாள் காதலன் வெறிச்செயல்! விபரீத முடிவு!

இதன்பிறகு அரவிந்த் தனது மூன்று குழந்தைகளையும் ஒரு அறைக்குள் அழைத்துச் சென்று கதவை பூட்டிக்கொண்டதாக கூறப்படுகிறது. தகவல் அறிந்து அங்கு சென்ற போலீசார், குழந்தைகளை பத்திரமாக மீட்கும் நோக்கில் அரவிந்திடம் தொடர்ந்து பேச்சுவார்த்தை நடத்தினர். சுமார் 7 மணி நேரத்துக்கும் மேலாக சரணடையுமாறு அவரிடம் வலியுறுத்தப்பட்டதாக அதிகாரிகள் தெரிவித்துள்ளனர்.

இந்த பேச்சுவார்த்தைக்கு இடையே, அரவிந்த் தனது 8 வயது மகன் சவுரியாவை சுட்டதாக போலீஸ் தரப்பில் தெரிவிக்கப்பட்டுள்ளது. படுகாயமடைந்த சிறுவன் மருத்துவமனைக்கு கொண்டு செல்லப்பட்ட நிலையில் சிகிச்சை பலனின்றி உயிரிழந்தான்.

குழந்தைகளின் உயிருக்கு தொடர்ந்து ஆபத்து ஏற்பட்ட நிலையில், போலீசார் நடவடிக்கை மேற்கொண்டனர். அப்போது ஏற்பட்ட துப்பாக்கிச்சண்டையில் அரவிந்த் சிங் படுகாயமடைந்தார். பின்னர் மருத்துவமனைக்கு கொண்டு செல்லப்பட்ட அவர் உயிரிழந்தார். இரண்டு பெண் குழந்தைகள் போலீசாரால் பாதுகாப்பாக மீட்கப்பட்டனர்.

பூஜை நடத்தப்பட்டதற்கான காரணம் மற்றும் துப்பாக்கிச்சூட்டுக்கான சரியான பின்னணி குறித்து போலீசார் தொடர்ந்து விசாரணை நடத்தி வருகின்றனர். சம்பவ இடத்தில் தடயவியல் குழுவினரும் விசாரணையில் ஈடுபட்டுள்ளனர். இந்த கொடூர சம்பவம் ஆசம்கரில் பெரும் அதிர்ச்சியை ஏற்படுத்தியுள்ளது.

இதையும் படிங்க: நேபாளத்தில் இருந்து அடித்து வரப்பட்ட 5 உடல்கள்! கண்டக் ஆற்றில் கரை ஒதுங்கியதால் அதிர்ச்சி! இந்திய எல்லையில் சோகக் காட்சி!