நியூ டெல்லி: இந்திய ராணுவத்தின் கடல் மற்றும் வான் பாதுகாப்பை மேலும் வலுப்படுத்தும் வகையில், ராணுவ அமைச்சகம் 5,083 கோடி ரூபாய் மதிப்பிலான இரு பெரிய ஒப்பந்தங்களில் கையெழுத்திட்டுள்ளது. 

இதில் ஆறு நவீன இலகுரக ஹெலிகாப்டர்களும், தரையில் இருந்து வானில் உள்ள இலக்குகளை செங்குத்தாக தாக்கும் ஷ்டில் ஏவுகணைகளும் அடங்கும். இந்தியாவின் சுயசார்பு தற்காப்பு (ஆத்மநிர்பர் பாரத்) திட்டத்தின் கீழ் உள்நாட்டு தயாரிப்பு மற்றும் வெளிநாட்டு தொழில்நுட்பத்தை இணைத்து ராணுவ திறனை உயர்த்தும் முயற்சியாக இது பார்க்கப்படுகிறது.

முதல் ஒப்பந்தத்தின்படி, ஹிந்துஸ்தான் ஏரோநாட்டிக்ஸ் லிமிடெட் (ஹெச்.ஏ.எல்.) நிறுவனத்துடன் 2,901 கோடி ரூபாய்க்கு ஆறு ALH Mk-2 (அட்வான்ஸ்டு லைட் ஹெலிகாப்டர் மார்க்-2) வாங்க ஒப்பந்தம் முடிக்கப்பட்டுள்ளது. இந்த இரட்டை இன்ஜின் ஹெலிகாப்டர்கள் நவீன ஆயுதங்கள், மேம்பட்ட ரேடார், இரவு நேர பார்வை அமைப்பு, அதிக தூர பயண திறன் ஆகியவற்றுடன் கூடியவை. 

இதையும் படிங்க: 1,315 கோடி கிலோ அரிய கனிமம்!! அசர வைத்த ரிப்போர்ட்! தமிழகம் உட்பட 8 மாநிலங்களில் கொட்டிக் கிடக்கும் பொக்கிஷம்!

கடலோர காவல்படை (கோஸ்ட் கார்ட்) இந்த ஹெலிகாப்டர்களை பயன்படுத்தி கடற்கொள்ளை தடுப்பு, கடல் எல்லை கண்காணிப்பு, தேடல்-மீட்பு பணிகள், மீனவர்கள் பாதுகாப்பு உள்ளிட்டவற்றை மிகவும் திறம்பட மேற்கொள்ள முடியும். தற்போதைய ஹெலிகாப்டர்களை விட இவை அதிக வேகம், உயரம், ஆயுத சுமக்கும் திறன் கொண்டவை என்பது குறிப்பிடத்தக்கது.

இரண்டாவது ஒப்பந்தம் ரஷ்யாவின் JSC Rosoboronexport நிறுவனத்துடன் 2,182 கோடி ரூபாய்க்கு ஷ்டில் (Shtil) வான் பாதுகாப்பு ஏவுகணை அமைப்புகளை வாங்குவதற்கானது. இந்த ஏவுகணைகள் போர்க்கப்பல்களில் இருந்து எதிரிகளின் விமானங்கள், ஏவுகணைகள், ட்ரோன்களை தாக்கும் திறன் கொண்டவை. 

செங்குத்து தாக்குதல் (vertical launch) தொழில்நுட்பத்துடன் கூடிய இவை கப்பல்களின் வான் பாதுகாப்பை கணிசமாக மேம்படுத்தும். கடற்படையின் போர்க்கப்பல்களில் ஏற்கனவே உள்ள சில அமைப்புகளை மேம்படுத்தவும் இந்த ஏவுகணைகள் பயன்படுத்தப்படும்.

இரு ஒப்பந்தங்களும் மத்திய அரசின் ஒப்புதலுடன் விரைவாக முடிக்கப்பட்டுள்ளன. இது இந்திய ராணுவத்தின் நவீனமயமாக்கல் திட்டத்தின் ஒரு பகுதியாகும். கடலோர பாதுகாப்பு, வான் பாதுகாப்பு ஆகியவற்றில் இந்தியாவின் திறன் பல மடங்கு அதிகரிக்கும் என ராணுவ வட்டாரங்கள் தெரிவிக்கின்றன. சீனா, பாகிஸ்தான் எல்லை பதற்றம், இந்தியப் பெருங்கடல் பகுதியில் அதிகரித்து வரும் அச்சுறுத்தல்களுக்கு இது சரியான நேரத்தில் எடுக்கப்பட்ட முடிவு என பார்க்கப்படுகிறது.

இதையும் படிங்க: 200 போர்க்கப்பல்கள் இலக்கு!! 2035 டார்கெட்! பாக்., சீனாவை கதற விடப்போகும் இந்தியாவின் சூப்பர் பவர் ப்ளான்!