தமிழக அரசுப் பள்ளிகளில் உடற்கல்வி ஆசிரியர்களின் விகிதத்தை 250 மாணவர்களுக்கு ஒருவர் என்ற நிலையில் இருந்து 700 மாணவர்களுக்கு ஒருவர் எனக் குறைக்கும் முயற்சியை தமிழக பாஜக தலைவர் நயினார் நாகேந்திரன் தீவிரமாக எதிர்த்துள்ளார். இந்த நடவடிக்கை அரசுப் பள்ளி மாணவர்கள் மீதான திட்டமிட்ட அடக்குமுறை என்று அவர் விமர்சித்துள்ளார்.

தனது எக்ஸ் (முன்னர் ட்விட்டர்) பக்கத்தில் பதிவிட்டுள்ள நயினார் நாகேந்திரன், “அரசுப் பள்ளி மாணவர்களின் மீது ஏவப்படும் அடக்குமுறை கடும் கண்டனத்திற்குரியது” என்று தெரிவித்தார். முந்தைய திமுக அரசு கொண்டு வந்த அதே அரசாணையை தற்போதைய தமிழக வெற்றி கழக (தவெக) அரசும் முன்மொழிவதாக வெளியான செய்திகள் அதிர்ச்சி அளிப்பதாக அவர் குறிப்பிட்டார். 

உடற்கல்வி ஆசிரியர்களின் எண்ணிக்கை குறைப்பு, கிராமப்புற அரசுப் பள்ளிகளை மிகவும் பாதிக்கும் என்பது அவரது முக்கிய வாதம். 700 மாணவர்களுக்குக் கீழ் உள்ள பல கிராமப் பள்ளிகளுக்கு உடற்கல்வி ஆசிரியரே நியமிக்கப்படாமல் போகும் அபாயம் உள்ளது. இதனால் மாணவர்களின் விளையாட்டுத் திறன் முழுமையாக முடக்கப்படும் என்று அவர் எச்சரித்தார். “அதிக கட்டணம் செலுத்தி தனியார் ஸ்போர்ட்ஸ் கோச்சிங் செல்ல முடியாத அரசுப் பள்ளி மாணவர்களின் திறன்களை அடையாளம் கண்டு, அவர்களைப் போட்டிகளில் பங்கேற்கச் செய்யும் முக்கியப் பொறுப்பு உடற்கல்வி ஆசிரியர்களுக்கே உண்டு. அவர்களின் எண்ணிக்கையைக் குறைப்பது அப்பட்டமான அநீதி” என்று நயினார் நாகேந்திரன் சுட்டிக்காட்டினார்.

இதையும் படிங்க: இது கேப்பையில் நெய் வடியும் கதை - தமிழகத்தில் தொடரும் மின்வெட்டு; முதல்வரை விமர்சித்த நயினார் நாகேந்திரன்!

மேலும், பள்ளிகளில் மாணவர்களின் ஒழுக்கத்தைக் கண்காணிப்பதிலும் உடற்கல்வி ஆசிரியர்கள் முக்கியப் பங்கு வகிப்பதை அவர் நினைவூட்டினார். இந்தப் பதவிகளில் சமரசம் செய்வது கல்வித் தரத்தையும் மாணவர்களின் முழுமையான வளர்ச்சியையும் பாதிக்கும் என்று எச்சரித்த அவர், பழைய விகிதாசாரப்படியே (250:1) ஆசிரியர்களை நியமிக்க வேண்டும் என்று தவெக தலைவர் மற்றும் முதல் அமைச்சர் விஜய்யை வலியுறுத்தினார். “இதுதான் தவெகவின் அனைவருக்குமான அரசியலா?” என்று கேள்வி எழுப்பிய நயினார் நாகேந்திரன், அரசுப் பள்ளி மாணவர்களின் உரிமைகளைப் பாதுகாக்க அரசு உடனடியாக நடவடிக்கை எடுக்க வேண்டும் என்று வலியுறுத்தினார்.

இந்தப் பிரச்சினை தமிழகம் முழுவதும் உள்ள அரசுப் பள்ளி மாணவர்கள், பெற்றோர்கள் மற்றும் கல்வியாளர்கள் மத்தியில் பெரும் அதிர்வலைகளை ஏற்படுத்தியுள்ளது. விளையாட்டு மற்றும் உடல் நல வளர்ச்சியில் அரசுப் பள்ளிகளை மேம்படுத்த வேண்டும் என்ற கோரிக்கை வலுத்து வரும் நிலையில், ஆசிரியர் விகிதம் குறைப்பு பின்னடைவை ஏற்படுத்தும் எனக் கல்வியாளர்கள் அஞ்சுகின்றனர்.

இதையும் படிங்க: பாஜ மாநில தலைவர் நயினார் நாகேந்திரனுக்கு டெல்லி மேலிடம் அவசர அழைப்பு! அமித்ஷாவுடன் இன்றிரவு சந்திப்பு!