மும்பை: தொழிலதிபர் அனில் அம்பானி மற்றும் அவரது ரிலையன்ஸ் கம்யூனிகேஷன்ஸ் நிறுவனத்தின் வங்கிக் கணக்குகளை மோசடி என்று அறிவிக்க முயன்ற மூன்று வங்கிகளின் நடவடிக்கைகளை மும்பை உயர் நீதிமன்றம் தற்காலிகமாக நிறுத்தி வைத்துள்ளது. 

அனில் அம்பானி தரப்பில் தாக்கல் செய்யப்பட்ட மனுவை விசாரித்த நீதிபதி மிலிந்த் ஜாதவ், வங்கிகள் ரிசர்வ் வங்கியின் (ஆர்பிஐ) மாஸ்டர் டைரக்ஷன்ஸ் விதிகளை மீறியுள்ளதாகக் கண்டறிந்தார். வங்கிகள் நம்பியிருந்த போரன்சிக் ஆடிட் அறிக்கை (BDO LLP தயாரித்தது) சட்டப்படி செல்லுபடியாகாது என்று தீர்ப்பளித்தார். அறிக்கை தகுதி வாய்ந்த சார்ட்டர்ட் அக்கவுண்டன்ட் (சிஏ) கையொப்பமிடப்படவில்லை என்பதால், ஆர்பிஐயின் 2024 மோசடி விதிகளை மீறியுள்ளது என்று கூறினார்.

மேலும், 2013-2017 காலகட்டத்துக்கான ஆடிட் 2019-ல் தாமதமாகத் தொடங்கப்பட்டதை நீதிமன்றம் கண்டித்தது. "வங்கிகள் ஆழ்ந்த உறக்கத்தில் இருந்து திடீரென விழித்துக்கொண்டது போன்ற கிளாசிக் உதாரணம்" என்று வங்கிகளை விமர்சித்தது. அனில் அம்பானி தரப்பு வாதத்தின்படி, உரிய முறையில் ஆடிட் நடக்கவில்லை, விதிகள் பின்பற்றப்படவில்லை என்று கூறப்பட்டது.

இதையும் படிங்க: 2 மாவட்டங்களில் டைரக்ட் விசிட்... திட்ட பணிகளை தொடங்கி வைக்கும் முதல்வர் ஸ்டாலின்...!

கணக்குகளை மோசடி என்று அறிவித்தால் அனில் அம்பானிக்கும் நிறுவனத்துக்கும் பெரும் பாதிப்பு ஏற்படும் என்று நீதிமன்றம் குறிப்பிட்டது. பிளாக்லிஸ்ட் செய்யப்படுதல், புதிய கடன் வசதி மறுக்கப்படுதல், குற்றவியல் வழக்குகள், பெயர் கெட்டுப்போதல் போன்றவை ஏற்படும் என்று எச்சரித்தது. இது "நிதி அணுகல் உரிமையை பாதிக்கும், சிவில் டெத் போன்றது" என்று விவரித்தது.

ரிலையன்ஸ் கம்யூனிகேஷன்ஸ் நிறுவனம் திவால்நிலை நடவடிக்கைகளில் உள்ளது. அதனால் ஏற்பட்ட கடன் பிரச்னைகளே இந்த வழக்குக்கு அடிப்படை. வங்கிகள் கூட்டமைப்பு (ஸ்டேட் பாங்க் ஆஃப் இந்தியா தலைமையில்) ஆடிட்டை ஆர்டர் செய்தது. ஆனால் அறிக்கை சட்டப்படி செல்லாது என்று நீதிமன்றம் தீர்ப்பளித்தது.

இந்த உத்தரவு அனில் அம்பானிக்கு இடைக்கால நிவாரணமாக அமைந்துள்ளது. வழக்கின் இறுதி விசாரணை வரை வங்கிகள் எந்த நடவடிக்கையும் எடுக்க முடியாது. இது தொழில் வட்டாரத்தில் பெரும் கவனத்தை ஈர்த்துள்ளது.

இதையும் படிங்க: வடலூரில் பெரியார், அம்பேத்கர் சிலைகளை மீண்டும் நிறுவுக! தமிழக அரசுக்கு ராமதாஸ் வேண்டுகோள்!