கோபிச்செட்டிபாளையம்: பள்ளி மாணவர்களுக்கு புதிய அடையாள அட்டை வழங்கும் திட்டத்தில் சாதி விவரங்களும் இடம்பெறும் என அமைச்சர் செங்கோட்டையன் அறிவித்துள்ள நிலையில், தி.மு.க முன்னாள் அமைச்சர் அன்பில் மகேஷ் இதற்கு கடும் எதிர்ப்பு தெரிவித்துள்ளார்.
அண்மையில் கோபிச்செட்டிபாளையத்தில் செய்தியாளர்களை சந்தித்த அமைச்சர் செங்கோட்டையன், மாணவர்களுக்கான புதிய அடையாள அட்டை திட்டம் குறித்து விளக்கினார். பட்டா, இறப்பு சான்றிதழ், சாதி சான்றிதழ் உள்ளிட்ட அரசு சேவைகளை இணையம் வாயிலாக எளிதாகப் பெறும் வகையில் பல திட்டங்கள் செயல்படுத்தப்பட்டு வருவதாக அவர் கூறினார்.
“பள்ளி செல்லும் குழந்தைகளுக்கு ஆண்டுதோறும் சாதி சான்றிதழ் பெறுவதற்கு மாற்று ஏற்பாடு செய்யப்பட்டுள்ளது. மாணவர்களுக்கு அடையாள அட்டை வழங்க முதல்வர் உத்தரவிட்டுள்ளார். இந்த அட்டையில் மாணவரின் முகவரி, சாதி விவரம், இரத்த வகை, ஆதார் எண், தொலைபேசி எண் உள்ளிட்ட அனைத்து முக்கிய தகவல்களும் இணைக்கப்படும். முதற்கட்டமாக 10 மற்றும் 12-ஆம் வகுப்பு மாணவர்களுக்கு இந்த அட்டை வழங்க நடவடிக்கை எடுக்கப்படுகிறது” என்றார்.
இதையும் படிங்க: திமுக, அதிமுக ஆதரவோடு களமிறங்கும் சீமான்?! அம்பாசமுத்திரம் இடைத்தேர்தலில் போட்டி உறுதி! தவெகவுக்கு சிக்கல்!
இந்த அறிவிப்புக்கு உடனடியாக எதிர்ப்பு தெரிவித்துள்ளார் தி.மு.க முன்னாள் அமைச்சர் அன்பில் மகேஷ். சமூக வலைதளத்தில் பதிவிட்ட அவர், “மாணவர்களின் அடிப்படை தகவல்கள் அடங்கிய கார்டு வழங்கப் போகிறீர்களா? அதில் சாதி தகவலும் இருக்குமென்றால் அது தேவையற்றது. மாணவர்களின் இரத்த வகை, ஆதார் எண் போன்றவற்றை மட்டும் தெரிந்துகொள்ள வேண்டிய இடத்தில் சாதி அடையாளம் தேவைதானா?” என்று கேள்வி எழுப்பினார்.
மேலும், “இட ஒதுக்கீடு மற்றும் அரசின் சமூக நீதித் திட்டங்களைப் பயன்படுத்த வேண்டிய இடங்களில் மட்டும் சாதிச் சான்றிதழ் விவரங்களை வெளிப்படுத்திக் கொள்ளலாம். இதுகுறித்து அமைச்சர் விரிவான பதில் அளிக்க வேண்டும்” என்றும் அன்பில் மகேஷ் வலியுறுத்தியுள்ளார்.
தமிழகத்தில் சாதி அடையாளங்கள் இன்னும் சமூகப் பிரிவினையை ஏற்படுத்தும் சூழலில், மாணவர்களுக்கான அடையாள அட்டையில் சாதி விவரம் இடம்பெறுவது பலரிடையே விவாதத்தை ஏற்படுத்தியுள்ளது. அரசு சேவைகளை எளிதாக்கும் நோக்கில் இந்தத் திட்டம் கொண்டுவரப்பட்டாலும், தனியுரிமை மற்றும் சமூக நல்லிணக்கம் குறித்த கவலைகள் எழுந்துள்ளன.
இந்தப் புதிய அட்டைத் திட்டம் முழுமையாகச் செயல்படுத்தப்பட்டால், மாணவர்களுக்கு ஆண்டுதோறும் சான்றிதழ்கள் பெறும் சிரமம் குறையும் என அரசு தரப்பு நம்புகிறது. எனினும், எதிர்க்கட்சியினரின் கேள்விகளுக்கு அரசு தரப்பில் தெளிவான விளக்கம் வருமா என்பதைப் பொறுத்திருந்து பார்க்க வேண்டும்.
இதையும் படிங்க: திருச்சி கிழக்கில் மு.க.ஸ்டாலின் போட்டி கன்பார்ம்! தவெகவுக்கு டஃப் கொடுக்க தயாராகும் திமுக!!