சென்னையில் நேற்று இரவு முதல் விடிய விடிய இடைவிடாது கொட்டித் தீர்த்த அதிதீவிர கனமழை மற்றும் வெள்ளப் பெருக்குக்கு 'மேகவெடிப்பு' (Cloudburst) காரணமல்ல என்று சென்னை மண்டல வானிலை ஆய்வு மையம் திட்டவட்டமாகத் தெரிவித்துள்ளது; வளிமண்டல மேலடுக்கு சுழற்சியுடன் இணைந்த பரவலான வெப்பச்சலன மேகங்களின் (Convective Clouds) தீவிரச் செயல்பாடே இந்த அதீத மழைப்பொழிவுக்கு முதன்மைக் காரணம் என்றும் வானிலை ஆய்வாளர்கள் அறிவியல் பூர்வமாக விளக்கம் அளித்துள்ளனர்.

சென்னையில் மணலி, பாரிமுனை, எண்ணூர் உள்ளிட்ட பல்வேறு பகுதிகளில் குறுகிய கால இடைவெளியில் சுமார் 30 முதல் 35 சென்டிமீட்டர் வரை அதீத மழை பதிவானதால், தலைநகரில் மேகவெடிப்பு நிகழ்ந்துவிட்டதா என்ற ரீதியில் பொதுமக்கள் மற்றும் சமூக வலைதளங்களில் தீவிர வதந்திகளும் ஊகங்களும் பரவி வந்தன.

இத்தகைய சூழலில், நிலவரம் குறித்து விளக்கம் அளித்துள்ள சென்னை வானிலை ஆய்வு மைய அதிகாரிகள் வானியல் விதிகளின்படி, மேகவெடிப்பு என்பது மிகக் குறுகிய பரப்பளவில் (தோராயமாக 20 முதல் 30 சதுர கிலோமீட்டர் எல்லைக்குள்) குறுகிய ஒரு மணி நேரத்திற்குள் 10 சென்டிமீட்டருக்கும் (100 மி.மீ) அதிகமான மழை கொட்டுவதைக் குறிக்கும் நிகழ்வாகும். இது பொதுவாக இமயமலைப் பள்ளத்தாக்குகள் போன்ற மலைப்பாங்கான நிலப்பரப்புகளில் மட்டுமே அடிக்கடி நிகழக்கூடியது.

இதையும் படிங்க: #BREAKING அடக்கொடுமையே... “லீவுக்கு ஊருக்கு போகும் போதா இப்படி ஆகனும்...” - பயணிகள் கடும் அவதி...!

ஆனால், சென்னையில் பதிவான மழைப்பொழிவின் தன்மை, மேகக் கூட்டங்களின் பரவல் மற்றும் ரேடார் தரவுகளை ஆய்வு செய்து பார்த்ததில், இது ஒரு குறிப்பிட்ட குறுகிய பகுதியில் மட்டும் நிகழ்ந்த நிகழ்வு அல்ல என்பது தெளிவாகிறது. தென்மேற்கு வங்கக்கடலில் நிலைகொண்டுள்ள வளிமண்டல மேலடுக்கு சுழற்சியின் காரணமாகக் கடலிலிருந்து தொடர்ச்சியாகப் பெருமளவு ஈரப்பதம் நிலப்பரப்பை நோக்கி உந்தப்பட்டது. அதேநேரத்தில், நிலப்பரப்பில் நிலவிய வெப்பச்சலனம் காரணமாக வானில் பிரம்மாண்டமான திரள் மேகங்கள் (Cumulonimbus Clouds) அடுத்தடுத்து உருவாகி நகரின் பெரும்பான்மையான பகுதிகளில் பரவலாகத் தங்கி இடைவிடாது கனமழையைக் கொட்டியுள்ளன.

எனவே, இது மேகவெடிப்பின் விளைவு அல்ல; மாறாக வளிமண்டல மேலடுக்கு சுழற்சி மற்றும் தீவிர வெப்பச்சலன மேகக் கட்டமைப்புகளின் தொடர் நீட்சியால் பெய்த தீவிரப் பருவமழைப் பொழிவுதான் என்று வானிலை மையம் உறுதிபடத் தெரிவித்துள்ளது.

மேலும், இந்த வளிமண்டல மேலடுக்கு சுழற்சியின் தாக்கம் இன்னும் நீடிப்பதால், சென்னை மற்றும் அதனைச் சுற்றியுள்ள வட கடலோர மாவட்டங்களில் அடுத்த 24 முதல் 48 மணி நேரத்திற்குத் தொடர்ந்து பலத்த மழை நீடிக்கும் என்றும் அதிகாரிகள் எச்சரித்துள்ளனர்.

இதையும் படிங்க: ஞானேஷ் குமாருக்கு வலுக்கும் எதிர்ப்பு..! எழும்பூரில் ரயில் மறியல்... குண்டுக்கட்டாக கைது..!!