சென்னை: தமிழ்நாடு முதல்வர் சி. ஜோசப் விஜய் நாளை (வெள்ளிக்கிழமை) கோவையில் நடைபெறும் ‘பெரியார் அறிவுலகம் மற்றும் ஆராய்ச்சி மையம்’ திறப்பு விழாவில் பங்கேற்கிறார். அதைத் தொடர்ந்து, கேரள மாநிலம் திருச்சூருக்குச் சென்று நவராத்திரி விழாவில் கலந்துகொள்ள உள்ளதாகத் தகவல்கள் வெளியாகியுள்ளன. முதல்வரின் இந்தப் பயணம் அரசியல் மற்றும் பொதுமக்கள் மத்தியில் கவனம் பெற்றுள்ளது.

ரூ.300 கோடியில் பிரம்மாண்ட அறிவுலகம்

கோவை காந்திபுரம் பேருந்து நிலையம் அருகே, நஞ்சப்பா சாலையில் ரூ.300 கோடி மதிப்பீட்டில் பெரியார் அறிவுலகம் மற்றும் அறிவியல் மையம் அமைக்கப்பட்டுள்ளது. சுமார் 1.98 லட்சம் சதுர அடி பரப்பளவில், தரைத்தளத்துடன் ஏழு மேல்தளங்களைக் கொண்ட இந்தக் கட்டடத்தின் கட்டுமானப் பணிகள் கடந்த 2024-ஆம் ஆண்டு தொடங்கின. தற்போது பணிகள் நிறைவடைந்துள்ள நிலையில், இந்த மையத்தை முதல்வர் விஜய் திறந்து வைக்கவுள்ளார்.

இதையும் படிங்க: 2027ல் மு.க.ஸ்டாலின் தான் மீண்டும் முதல்வர்... தவெகவுக்கு திமுக எம்.எல்.ஏ சேடப்பட்டி மணிமாறன் எச்சரிக்கை...!

இந்த அறிவுலகத்தில் ஒரு லட்சம் புத்தகங்கள் இடம்பெற உள்ளன. குழந்தைகளுக்கான நூலகம், மாற்றுத்திறனாளிகளுக்கான பிரத்யேக வசதிகள், ஆராய்ச்சி மற்றும் வாசிப்புப் பிரிவுகள் உள்ளிட்ட பல்வேறு வசதிகள் ஏற்படுத்தப்பட்டுள்ளன. அறிவியல் மையம், டிஜிட்டல் நூலகம் உள்ளிட்ட வசதிகளும் மாணவர்கள் மற்றும் வாசகர்களுக்குப் பயனளிக்கும் வகையில் திட்டமிடப்பட்டுள்ளன.

கோவை மட்டுமின்றி, சுற்றுவட்டார மாவட்டங்களைச் சேர்ந்த மாணவர்கள், போட்டித் தேர்வுகளுக்குத் தயாராகும் இளைஞர்கள் மற்றும் புத்தக வாசிப்பில் ஆர்வமுள்ளவர்களுக்கும் இந்த மையம் முக்கிய இடமாக அமையும் என எதிர்பார்க்கப்படுகிறது.

கோவையிலிருந்து திருச்சூருக்கு ஹெலிகாப்டர் பயணம்?

திட்டமிட்டபடி, முதல்வர் விஜய் சென்னையிலிருந்து விமானம் மூலம் கோவை வந்து, அங்கிருந்து கார் வழியாக விழா நடைபெறும் இடத்துக்குச் செல்ல உள்ளார். அறிவுலகத்தைத் திறந்து வைத்து நிகழ்ச்சிகளில் பங்கேற்ற பின்னர், ஹெலிகாப்டர் மூலம் திருச்சூர் செல்லவுள்ளதாகத் தகவல்கள் தெரிவிக்கின்றன.

திருச்சூரில் பிரபல தொழிலதிபர் கல்யாண் ஜுவல்லர்ஸ் உரிமையாளர் டி.எஸ். கல்யாணராமன் இல்லத்தில் நடைபெறும் நவராத்திரி விழாவில் விஜய் பங்கேற்க உள்ளதாகக் கூறப்படுகிறது. மேலும், இந்தப் பயணத்தின்போது குருவாயூர் கோயிலுக்குச் சென்று அவர் தரிசனம் செய்யக்கூடும் என்றும் தகவல்கள் வெளியாகியுள்ளன. எனினும், கோயில் தரிசனத்துக்கான திட்டம் குறித்த அதிகாரப்பூர்வ உறுதிப்படுத்தல் வெளியாகவில்லை.

முன்னதாக, ஆந்திர மாநிலம் விஜயவாடாவுக்குச் சென்ற விஜய், கனக துர்கை அம்மன் கோயிலில் தரிசனம் செய்ததுடன், ஆந்திர முதல்வர் சந்திரபாபு நாயுடுவையும் சந்தித்ததாகச் செய்திகள் வெளியாகின. இந்நிலையில், நாளைய கோவை நிகழ்ச்சியைத் தொடர்ந்து கேரளாவுக்கும் விஜய் செல்லவுள்ளதாக வெளியாகியுள்ள தகவல்கள் அவரது பயணத் திட்டம் குறித்த எதிர்பார்ப்பை அதிகரித்துள்ளன.

இதையும் படிங்க: மோடியுடன் ஒரே காரில் முதல்வர் விஜய் பயணம்! ஐஐடியில் மலர் தூவி வரவேற்பு! ஜலகண்டேஸ்வரர் கோயிலில் சாமி தரிசனம்!