இசைஞானி இளையராஜா, தனது இசையால் உலகளவில் புகழ் பெற்றவர். 1976-இல் "அன்னக்கிளி" திரைப்படம் மூலம் இசையமைப்பாளராக அறிமுகமான இவர், 1000-க்கும் மேற்பட்ட படங்களுக்கு இசையமைத்து, 7000-க்கும் அதிகமான பாடல்களை உருவாக்கியுள்ளார். தமிழ், தெலுங்கு, மலையாளம், கன்னடம், இந்தி உள்ளிட்ட பல மொழிகளில் இவரது இசை முத்திரை பதித்துள்ளது. குறிப்பாக, கடந்த மார்ச் 8-ல் லண்டனில் உள்ள அப்பல்லோ அரங்கில் நிகழ்த்திய சிம்பொனி இசை நிகழ்ச்சி உலக ரசிகர்களை மெய்மறக்கச் செய்தது.

இளையராஜாவின் இசை, மேற்கத்திய மற்றும் இந்திய பாரம்பரிய இசையின் கலவையாக விளங்குகிறது. புல்லாங்குழல், வீணை, வயலின் போன்ற கருவிகளை பயன்படுத்தி, அவர் உருவாக்கிய இசை, கேட்போரை உணர்வுப்பூர்வமாக ஆட்கொள்கிறது. "ராஜா ராஜாதி ராஜன் இந்த ராஜா" போன்ற பாடல்கள் முதல் "இளைய நிலா பொழிகிறது" போன்ற மென்மையான மெட்டுகள் வரை, அவரது பங்களிப்பு இசையுலகில் மறக்க முடியாதவை. 

இதையும் படிங்க: லண்டனில் பென்னிகுயிக் குடும்பத்தினருடன் முதல்வர் ஸ்டாலின்..!! நெகிழ்ச்சி பதிவு..!!

பின்னணி இசையிலும் தனித்துவம் வெளிப்படுத்திய இவர், பல படங்களுக்கு உயிரோட்டம் அளித்தார். இளையராஜா பத்ம பூஷண், பத்ம விபூஷண் உள்ளிட்ட பல விருதுகளைப் பெற்றுள்ளார். அவரது இசை, சர்வதேச அளவில் பாராட்டப்பட்டு, பல இசைக் கலைஞர்களுக்கு உத்வேகமாக உள்ளது. இவர், சென்னையில் உள்ள தனது இசை ஸ்டூடியோவில் இன்றும் புதிய இசைப் படைப்புகளை உருவாக்கி வருகிறார். 

இளையராஜாவின் இசை, தலைமுறைகளைக் கடந்து, இளைஞர்கள் முதல் முதியவர்கள் வரை அனைவரையும் கவர்கிறது. அவரது பங்களிப்பு, இந்திய இசையுலகில் என்றும் நிலைத்து நிற்கும் பொக்கிஷமாகும். இசைஞானியின் இசைப் பயணம், உலகெங்கும் உள்ள ரசிகர்களுக்கு ஒரு உணர்வுப் பயணமாகத் திகழ்கிறது.

இசைஞானி இளையராஜாவை கௌரவிக்கும் வகையில், தமிழ்நாடு அரசு சார்பில் செப்டம்பர் 13-ம் தேதி சென்னை நேரு உள்விளையாட்டு அரங்கில் மாலை 5:30 மணிக்கு பிரமாண்ட பாராட்டு விழா நடைபெற உள்ளது. இளையராஜாவின் 50 ஆண்டு இசைப் பயணத்தையும், லண்டனில் ‘வேலியண்ட்’ சிம்பொனி மூலம் முதல் இந்தியராக மேற்கத்திய இசையில் சாதனை படைத்ததையும் கொண்டாடும் வகையில் இவ்விழா ஏற்பாடு செய்யப்பட்டுள்ளது. 

https://x.com/i/status/1965692207270367374

முதலமைச்சர் மு.க. ஸ்டாலின் தலைமையில் நடைபெறும் இந்நிகழ்ச்சியில் இளையராஜாவின் சிம்பொனி இசை நிகழ்ச்சி நடைபெறுகிறது. விழாவில் துணை முதலமைச்சர் உதயநிதி ஸ்டாலின் வரவேற்புரை ஆற்றுகிறார். அதனைத்தொடர்ந்து முதலமைச்சர் மு.க.ஸ்டாலின் தலைமையுரை ஆற்றுகிறார். ரஜினிகாந்த், கமல்ஹாசன் உள்ளிட்ட முன்னணி திரை பிரபலங்களும் கலந்து கொண்டு வாழ்த்துரை வழங்குகிறார்கள். இதில் அமைச்சர்கள், எம்.பி., எம்.எல்.ஏ.க்கள், திரைக்கலைஞர்கள் உள்பட பலரும் பங்கேற்கிறார்கள். தமிழ் வளர்ச்சி மற்றும் செய்தித்துறை அமைச்சர் மு.பெ.சாமிநாதன் நன்றி கூறுகிறார்.

இந்நிலையில், இது இசையின் அரசனுக்கு மட்டுமல்ல,அவரை வியக்கும் உலகில் உள்ள அத்தனை இசை ரசிகர்களுக்குமான பாராட்டு விழா என முதலமைச்சர் மு.க.ஸ்டாலின் கூறியுள்ளார். இது தொடர்பாக அவர் எக்ஸ் தள பதிவில், “ராஜாவைத் தாலாட்டும் தென்றல்” - நம் பாராட்டு விழா! இது இசையின் அரசனுக்கு மட்டுமல்ல; அவரை வியக்கும் உலகில் உள்ள அத்தனை இசை இரசிகர்களுக்குமான பாராட்டு விழா! என்று தெரிவித்துள்ளார். 

இதையும் படிங்க: என் அன்பு இஸ்லாமிய சகோதரர்களே.. முதல்வர் மு.க ஸ்டாலின் மிலாடி நபி வாழ்த்து..!!