கோவை மாவட்டத்தில் தேர்தல் களம் சூடுபிடித்துள்ளது! தி.மு.க.வும் அ.தி.மு.க.வும் வாக்காளர்களை கவர்வதற்காக பரிசுப் பொருட்களை வாரி வழங்கும் போட்டியில் இறங்கியுள்ளன. வீடு வீடாக சில்வர் அண்டா, ஹாட் பாக்ஸ், வாட்டர் பாட்டில், சம்படம், சில்வர் டப்பா என பல்வேறு பொருட்கள் வழங்கப்பட்டு வருவது கோவை மக்களிடையே பெரும் எதிர்பார்ப்பை ஏற்படுத்தியுள்ளது.

தைப்பொங்கல் சமயத்தில் தி.மு.க. சார்பில் ஒவ்வொரு பகுதியிலும் விளையாட்டுப் போட்டிகள் நடத்தி வெற்றியாளர்களுக்கு சில்வர் அண்டா, ஹாட் பாக்ஸ், டிபன் பாக்ஸ், பிளாஸ்டிக் வாளி, டிரம் உள்ளிட்ட பொருட்கள் வழங்கப்பட்டன. 

வாக்காளர் பட்டியல் வெளியானதும் அ.தி.மு.க. களமிறங்கியது. முன்னாள் முதல்வர்கள் எம்.ஜி.ஆர்., ஜெயலலிதா, பழனிசாமி பிறந்தநாள் நலத்திட்ட உதவி எனும் பெயரில் 10 தொகுதிகளிலும் பரிசுப் பொருட்கள் அடங்கிய பை வழங்கப்பட்டது. அதில் ஹாட்பாக்ஸ், சில்வர் தட்டு, வாட்டர் பாட்டில் இருந்தன. முன்னாள் அமைச்சர் வேலுமணி போட்டியிடும் தொண்டாமுத்தூர் தொகுதியில் மட்டும் சிறப்பாக ஹாட்பாக்ஸ், சில்வர் தட்டு, வேட்டி, சட்டை பிட், சேலை, குடை ஆகியவை வழங்கப்பட்டன.

இதையும் படிங்க: ஜெயலலிதா ஓட்டுவங்கி டார்கெட்! பாஜக பக்கா ப்ளான்!! மகளிரை தங்கள் பக்கம் இழுக்க மாஸ்டர் ப்ளான்!

தி.மு.க.வினர் இப்போது பூத் வாரியாக வீடு வீடாக சில்வர் அண்டா வழங்கி வருகின்றனர். முதல்கட்டமாக முதல்வர் ஸ்டாலின் பிறந்தநாள் கோலப் போட்டியில் ஹாட் பாக்ஸ் வழங்கப்பட்டது. இப்போது அண்டா வழங்கப்படுகிறது. 

அடுத்து இன்னும் இரண்டு பரிசுப் பொருட்கள் வரும் என கட்சி நிர்வாகிகள் தெரிவித்துள்ளனர். வாக்காளர் பட்டியலில் உள்ள குடும்பங்களை கணக்கெடுத்து, அ.தி.மு.க. – பா.ஜ.க. ஆதரவாளர்களைத் தவிர்த்து மற்றவர்களுக்கு டோக்கன் வழங்கப்பட்டது. பலர் ஆர்வத்துடன் வாங்கினாலும், சிலர் தயக்கத்துடன் மறுத்தனர்.

தி.மு.க. நிர்வாகிகள் கூறுகையில், ஒரு பூத்தில் 80 சதவீத வாக்காளர்களை கவரும் வகையில் குடும்பங்கள் கணக்கிடப்பட்டுள்ளன. குறைந்தது 100 குடும்பங்கள் முதல் 400 குடும்பங்கள் வரை பரிசு பொருட்கள் வழங்கப்படுகின்றன. 

அடுத்த கட்டமாக கிஃப்ட் பை வரும் என்றும், அதில் 3 கிராம் வெள்ளி நாணயம், 35 இஞ்ச் டிவி, எலக்ட்ரிக் ஸ்டவ், பால் குக்கர் போன்றவை இருக்கலாம் என்றும் எதிர்பார்க்கப்படுகிறது. தி.மு.க. 'வீக்' ஆக உள்ள பகுதிகளில் மட்டும் பெரிய பரிசுகள் வழங்க திட்டமிடப்பட்டுள்ளது. இரண்டு கன்டெய்னர்கள் கோவை நோக்கி வந்து கொண்டிருப்பதாகவும் தகவல் வெளியாகியுள்ளது.

இரு கட்சிகளின் இந்த பரிசு வழங்கல் போட்டி கோவை மாவட்டத்தில் பெரும் பரபரப்பை ஏற்படுத்தியுள்ளது. வாக்காளர்கள் இனி என்னென்ன பரிசு வரும் என்று ஆவலுடன் காத்திருக்கின்றனர்.

இதையும் படிங்க: சட்டசபை கூட்டம்! இடைக்கால பட்ஜெட் பதிலுரை! அதிமுக, பாஜக, அன்புமணி தரப்பு எம்.எல்.ஏ-க்கள் புறக்கணிப்பு!