மேற்குக் கரை மீது இஸ்ரேல் மேற்கொள்ளும் நடவடிக்கைகளை எதிர்க்க பிரதமர் நரேந்திர மோடிக்கு துணிச்சல் இல்லை என்று காங்கிரஸ் கட்சியின் தகவல் தொடர்பு பொதுச் செயலாளர் ஜெய்ராம் ரமேஷ் கடுமையாக விமர்சித்துள்ளார்.

சனிக்கிழமை (மார்ச் 28) தனது எக்ஸ் தளத்தில் பதிவிட்ட ஜெய்ராம் ரமேஷ், “கடந்த நான்கு வாரங்களாக உலகின் கவனம் முழுவதும் ஹார்முஸ் ஜலசந்தி மற்றும் வளைகுடா நாடுகளின் எரிசக்தி கட்டமைப்புகள் மீதே உள்ளது. 

ஆனால் இஸ்ரேல் தொடர்ந்து மூன்று முக்கிய நடவடிக்கைகளில் ஈடுபட்டு வருகிறது. ஒன்று, காஸா மக்கள் மீதான கொடூரமான தாக்குதல்கள். இரண்டு, தெற்கு லெபனானில் பெரிய இடைநிலை மண்டலத்தை உருவாக்கும் முயற்சி. மூன்று, மேற்குக் கரையை ஆக்கிரமித்து இணைத்துக்கொள்ளும் நடவடிக்கைகள்” என்று குறிப்பிட்டார்.

இதையும் படிங்க: நெருங்கும் தேர்தல்..! இபிஎஸ் சூறாவளி சுற்றுப்பயணம்..!! இரண்டாம் கட்ட பரப்புரை அறிவிப்பு வெளியீடு..!!

மேலும், “1967க்குப் பிறகு முதன்முறையாக ஆக்கிரமிக்கப்பட்ட மேற்குக் கரையின் பெரும்பகுதியை நிலப் பதிவு செய்ய இஸ்ரேல் அமைச்சரவை ஒப்புதல் அளித்துள்ளது. இதனால் லட்சக்கணக்கான பாலஸ்தீனர்கள் தங்கள் சொத்துக்களை இழக்கும் நிலைக்கு தள்ளப்படுவார்கள். ஆனால், தனது நல்ல நண்பரான இஸ்ரேல் பிரதமர் பெஞ்சமின் நெதன்யாகுவுக்கு எதிராகக் குரல் கொடுக்க பிரதமர் மோடிக்கு துணிச்சல் இல்லை” என்று ஜெய்ராம் ரமேஷ் விமர்சித்தார்.

பிரதமர் மோடியின் இஸ்ரேல் பயணம் முடிந்த இரண்டு நாட்களுக்குள் ஈரான் மீதான அமெரிக்க-இஸ்ரேல் கூட்டுத் தாக்குதல்கள் தொடங்கியதையும் அவர் சுட்டிக்காட்டினார். “கிரேட்டர் இஸ்ரேல்” திட்டத்தை நோக்கி இஸ்ரேல் நகர்ந்து வருவதாகவும், இதை எதிர்க்க இந்தியப் பிரதமருக்கு வலிமை இல்லை என்றும் அவர் குற்றம் சாட்டினார்.

இந்த விமர்சனம் அரசியல் அரங்கில் பெரும் விவாதத்தை ஏற்படுத்தியுள்ளது. இஸ்ரேல்-பாலஸ்தீன மோதல் நீண்டகாலமாக உலக அரங்கில் பெரும் பிரச்சினையாக உள்ள நிலையில், இந்தியாவின் நிலைப்பாடு குறித்து எதிர்க்கட்சிகள் தொடர்ந்து கேள்வி எழுப்பி வருகின்றன.

பிரதமர் மோடி அரசு இஸ்ரேலுடன் வலுவான உறவுகளைப் பேணி வரும் நிலையில், பாலஸ்தீனத்துக்கு ஆதரவான இந்தியாவின் பாரம்பரிய நிலைப்பாட்டை காங்கிரஸ் சுட்டிக்காட்டி வருகிறது. ஜெய்ராம் ரமேஷின் இந்தக் கருத்து, இரு நாடுகளுக்கும் இடையிலான உறவுகள் மற்றும் இந்தியாவின் வெளியுறவுக் கொள்கை குறித்த விவாதத்தை மீண்டும் தீவிரப்படுத்தியுள்ளது.

இதையும் படிங்க: ரொம்ப ஆவலோட காத்திருக்கேன்! பிரதமர் புதுச்சேரி விசிட்! மீண்டும் இரட்டை இஞ்சின் ஆட்சி! மோடி நம்பிக்கை!