தமிழக வெற்றிக் கழகம் (த.வெ.க.,) தலைவர் விஜய், சிவகங்கை மாவட்டம் காரைக்குடியில் தனது கட்சி வேட்பாளர்களை ஆதரித்து இன்று பிரசாரம் செய்தார். சென்னையில் இருந்து மதுரை விமான நிலையம் வந்த விஜய், அங்கிருந்து பிரசார வாகனத்தில் காரைக்குடி நோக்கி புறப்பட்டார்.
இந்தப் பிரசாரப் பயணத்தின்போது பரபரப்பான சம்பவங்கள் அரங்கேறின. விஜய்யின் பிரசார வாகனத்தில் தொண்டர்கள் தொற்றிக் கொண்டதால், அவர்களின் விரல்களை பவுன்சர் ஒருவர் பூட்ஸ் காலால் நசுக்கிய வீடியோ சமூக வலைதளங்களில் வைரலாகி வருகிறது. இந்தக் காட்சி பலரிடையே அதிர்ச்சியையும் கோபத்தையும் ஏற்படுத்தியுள்ளது.
முன்னதாக மதுரையில் இருந்து காரைக்குடி நோக்கி செல்லும் வழியில், விஜய்யின் வாகனத்தை பைக்கில் பின்தொடர்ந்த இளைஞர்கள் விபத்தில் சிக்கிய சம்பவமும் நடந்தது. கட்சியின் சார்பில், விஜய்யின் வாகனத்தை பின் தொடர வேண்டாம், கர்ப்பிணிகள், சிறுவர், சிறுமியரை பிரசாரத்துக்கு அழைத்து வர வேண்டாம் என்று தொண்டர்களுக்கு அறிவுறுத்தப்பட்டிருந்தது. ஆனாலும் பலர் இந்த அறிவுறுத்தலை பின்பற்றாமல் வாகனத்தை பின்தொடர்ந்து சென்றதால் விபத்து ஏற்பட்டது.
இதையும் படிங்க: மாம்பழம் சின்னம் வழக்கு!! ராமதாஸுக்கு தொடர் சறுக்கல்!! மனுவை தள்ளுபடி செய்தது சென்னை ஐகோர்ட்!
விஜய்யின் பிரசாரப் பயணத்தின்போது தொண்டர்களின் அதிகப்படியான உற்சாகம் மீண்டும் பிரச்னையாக மாறியுள்ளது. பவுன்சரின் செயல் குறித்து பலரும் சமூக வலைதளங்களில் கடும் விமர்சனம் செய்து வருகின்றனர். சிலர் “தொண்டர்களின் உற்சாகத்தை புரிந்துகொள்ள வேண்டும்” எனக் கூறினாலும், பலர் “பாதுகாப்பு நடவடிக்கைகளை சரியாக கடைப்பிடிக்க வேண்டும்” என்று வலியுறுத்துகின்றனர்.
காரைக்குடியில் விஜய் பிரசாரம் செய்தபோது, அவரைப் பார்க்க ஆயிரக்கணக்கான தொண்டர்கள் குவிந்தனர். இருப்பினும், இன்றைய சம்பவங்கள் த.வெ.க., பிரசாரத்தில் பாதுகாப்பு மற்றும் ஒழுங்கு குறித்த கேள்விகளை எழுப்பியுள்ளது.
தேர்தல் பிரசாரம் தீவிரமடைந்துள்ள நிலையில், விஜய்யின் பிரசாரப் பயணங்கள் ஒவ்வொன்றும் பெரும் எதிர்பார்ப்பை ஏற்படுத்தி வருகின்றன. ஆனால் தொண்டர்களின் உற்சாகத்தால் ஏற்படும் சம்பவங்கள் கட்சிக்கு சவாலாக அமைந்துள்ளன.
இதையும் படிங்க: இது ரொம்ப பெரிய வாய்ப்பு! மிஸ் பண்ணிடாதீங்க!! அவினாசி மக்களுக்கு அண்ணாமலை வாக்குறுதி!!