இந்திய கம்யூனிஸ்ட் கட்சியின் மூத்த தலைவரும், விடுதிரைப் போராட்ட வீரருமான இரா.நல்லக்கண்ணு (101) வயது மூப்பு காரணமாக சென்னை ராஜீவ் காந்தி அரசு மருத்துவமனையில் இன்று (பிப்.25, 2026) மதியம் 1.55 மணியளவில் காலமானார்.

கடந்த ஆகஸ்ட் 22-ஆம் தேதி வீட்டில் விழுந்து தலையில் காயம் அடைந்ததால் தனியார் மருத்துவமனையில் சிகிச்சை பெற்ற அவர், பின்னர் மூச்சுத்திணறல் காரணமாக ராஜீவ் காந்தி மருத்துவமனைக்கு மாற்றப்பட்டார். கடந்த 20 நாட்களுக்கும் மேலாக தீவிர சிகிச்சைப் பிரிவில் இருந்து வந்த நிலையில், சிகிச்சை பலனின்றி அவர் மறைந்தார். அவரது மறைவு தமிழக இடதுசாரி இயக்கத்துக்கு பெரும் இழப்பு.

1925 டிசம்பர் 26-ஆம் தேதி தூத்துக்குடி மாவட்டம் ஸ்ரீவைகுண்டத்தில் விவசாயக் குடும்பத்தில் பிறந்த நல்லக்கண்ணு, 15 வயதிலேயே சுதந்திர உணர்வால் கம்யூனிஸ்ட் இயக்கத்தில் ஈடுபட்டார். 1943-இல் 18 வயதில் இந்திய கம்யூனிஸ்ட் கட்சியில் இணைந்து கிளைச் செயலாளரானார். 

இதையும் படிங்க: தோளோடு தோள் நின்ற மகத்தான போராளி... நல்லக்கண்ணு மறைவுக்கு MP கனிமொழி இரங்கல்..!!

‘உழுபவனுக்கே நிலம் சொந்தம்’ போராட்டத்தில் முன்னணி வகித்ததால் சதி வழக்கில் சேர்க்கப்பட்டு 7 ஆண்டுகள் சிறை வாழ்ந்தார். மொத்தம் 14 ஆண்டுகள் சிறைத் தண்டனை அனுபவித்தார். அப்போது போலீசார் அவரது மீசையை சுருட்டை வைத்து பொசுக்கிய கொடுமையையும் சந்தித்தார்.

தமிழக விவசாயத் தொழிலாளர் சங்கத்தை வலுப்படுத்தி 25 ஆண்டுகள் தலைவராக இருந்தார். 1992 முதல் 2005 வரை 13 ஆண்டுகள் சி.பி.ஐ. தமிழக மாநிலச் செயலாளராக பணியாற்றினார். சாதி ஒழிப்பு, இட ஒதுக்கீடு, சமூக நீதி, சுற்றுச்சூழல் பாதுகாப்பு, கனிமவளக் கொள்ளைக்கு எதிரான போராட்டங்களில் தொடர்ந்து குரல் கொடுத்தார்.

எளிமையான வாழ்க்கை, ஊழலற்ற தன்மை, கொள்கை உறுதி ஆகியவற்றால் ‘ஐயா நல்லக்கண்ணு’ என்று அன்புடன் அழைக்கப்பட்டார். 2022-இல் தமிழக அரசு ‘தகைசால் தமிழர்’ விருது வழங்கியது. 10 லட்ச ரூபாய் பரிசை முதல்வர் நிவாரண நிதிக்கு வழங்கினார். 

80வது பிறந்தநாளில் கட்சி ஒரு கோடி வசூலித்தபோது அதை மேடையிலேயே திருப்பி கொடுத்தார். அம்பேத்கர் விருது ஒரு லட்ச ரூபாய் வழங்கியபோது பாதியை கட்சிக்கும் மீதியை விவசாயத் தொழிலாளர் சங்கத்துக்கும் அளித்தார். இப்படி, எதையுமே தனக்காகவும் தனது குடும்பத்திற்கும் எடுத்துக்கொள்ளாத அந்த நல்ல மனம்தான் இன்று இந்த மண்ணைவிட்டுப் பிரிந்திருக்கிறது.

இதையும் படிங்க: மறைந்தார் தோழர் நல்லக்கண்ணு!! நேர்மையான தலைவர்!! நம் நூற்றாண்டு போராளியின் வாழ்க்கை வரலாறு!