தனியார் பள்ளிகளுக்கு முறைகேடாக அரசு அங்கீகாரம் பெற்றுத் தருவதாகக் கூறி ரூ.100 கோடிக்கும் மேல் நிதி மோசடி அரங்கேற்றப்பட்டதாகப் பதிவு செய்யப்பட்ட வழக்கில், சென்னை வேப்பேரியில் உள்ள மத்திய குற்றப்பிரிவு (CCB) காவல் அலுவலகத்தில் ஆஜரான முன்னாள் பள்ளிக்கல்வித்துறை அமைச்சர் அன்பில் மகேஸ் பொய்யாமொழியிடம் தனிப்படை போலீசார் சுமார் 8 மணி நேரத்திற்கும் மேலாகத் தீவிர விசாரணை நடத்தி, 246 கேள்விகளை அடுக்கி கிடுக்கிப்பிடி விசாரணை நடத்திய சம்பவம் தமிழக அரசியல் களத்தில் பெரும் புயலைக் கிளப்பியுள்ளது.

தனியார் பள்ளிகளுக்கு உரிய விதிகளின்றி முறைகேடான வழிகளில் அரசு அங்கீகாரம் பெற்றுத் தருவதாகக் கூறி சுமார் ரூ.100 கோடிக்கும் அதிகமான நிதி முறைகேடு நடைபெற்றதாக எழுந்த புகாரின் அடிப்படையில், சென்னை மத்திய குற்றப்பிரிவு போலீசார் வழக்குப் பதிவு செய்து தீவிர விசாரணை மேற்கொண்டு வருகின்றனர். இதன் ஒரு பகுதியாக, கடந்த செப்டம்பர் 16-ஆம் தேதி நீதிமன்றத்தின் முறையான அனுமதியோடு, முன்னாள் பள்ளிக்கல்வித்துறை அமைச்சர் அன்பில் மகேஸ் பொய்யாமொழிக்குச் சொந்தமான சென்னை, திருச்சி உள்ளிட்ட ஒன்பது இடங்களில் மத்திய குற்றப்பிரிவு அதிகாரிகள் அதிரடி சோதனை நடத்தினர். அப்போது கைப்பற்றப்பட்ட முக்கிய ஆவணங்கள் மற்றும் கோப்புகளின் அடிப்படையில் நேரில் ஆஜராகி விளக்கம் அளிக்குமாறு அவருக்கு நேரில் சம்மன் வழங்கப்பட்டது.

அந்த சம்மனை ஏற்றுக்கொண்ட அன்பில் மகேஸ் பொய்யாமொழி, இன்று காலை 10:50 மணியளவில் சென்னை வேப்பேரியில் உள்ள பெருநகர காவல் ஆணையர் அலுவலக வளாகத்தில் இயங்கும் மத்திய குற்றப்பிரிவு அலுவலகத்திற்கு நேரில் வருகை தந்து ஆஜரானார். காலை 11 மணிக்குத் தொடங்கிய விசாரணையானது, கூடுதல் துணை ஆணையர்கள் மற்றும் உதவி ஆணையர்கள் அடங்கிய தனிப்படை போலீசாரால் இடைவிடாது தொடர்ந்து 8 மணி நேரத்திற்கும் மேலாகப் பல கட்டங்களாக நடைபெற்றது. பள்ளிக்கல்வித்துறை அமைச்சராக அவர் பதவி வகித்த காலகட்டத்தில் கையெழுத்திடப்பட்ட அரசாணைகள், கோப்புகள், தனியார் பள்ளிகளுக்கான அங்கீகார உத்தரவுகள் மற்றும் துறை சார்ந்த ஆய்வுக் கூட்டங்கள் தொடர்பாக அதிகாரிகள் தீவிர கேள்விகளை எழுப்பினர்.

இதையும் படிங்க: திமுக ஆலமரத்தை அசைக்க முடியாது: திருச்சியில் கே.என்.நேரு ஆவேசம்!

நீண்ட நெடிய விசாரணை நிறைவடைந்த பின்னர் மாலையில் வெளியே வந்த முன்னாள் அமைச்சர் அன்பில் மகேஸ் பொய்யாமொழி செய்தியாளர்களைச் சந்தித்துப் பேசினார். அப்போது பேசிய அவர், "கடந்த 16-ஆம் தேதி சென்னை மற்றும் திருச்சியில் உள்ள எனது இல்லங்கள் உள்ளிட்ட இடங்களில் நீதிமன்ற உத்தரவின்படி சோதனை நடைபெற்றது. அச்சோதனையில் கிடைத்த ஆவணங்களின் அடிப்படையில் இன்று விசாரணைக்கு ஆஜராகுமாறு காவல்துறை தரப்பில் கேட்டுக்கொண்டனர். கழகத் தலைவர் திரு. மு.க. ஸ்டாலின் அவர்களின் வழிகாட்டுதல் மற்றும் அறிவுறுத்தலின்படி, சட்டத்தின் மீது எனக்குள்ள அசைக்க முடியாத நம்பிக்கையால், காலை 11 மணிக்கு வரச்சொன்ன நிலையில் 10 நிமிடங்களுக்கு முன்னதாகவே 10:50 மணிக்கே வந்து ஆஜரானேன்" என்று தெரிவித்தார்.

தொடர்ந்து விசாரணைக் கள நிலவரம் குறித்துப் பேசிய அவர், "இன்றைய விசாரணையில் காவல்துறையினர் என் மீது மொத்தம் 246 கேள்விகளைக் கேட்டனர். அவர்கள் கேட்ட அத்தனை கேள்விகளுக்கும் எவ்விதத் தயக்கமுமின்றி மிகவும் பொறுமையாகவும் அமைதியாகவும் விரிவான பதில்களை அளித்துள்ளேன்; எனது பதில்கள் அனைத்தையும் அதிகாரிகள் வாக்குமூலமாகப் பதிவு செய்துள்ளனர். பள்ளிக்கல்வித்துறை அமைச்சராக நான் இருந்த காலகட்டத்தில் அதிகாரிகளுடன் நடத்தப்பட்ட சாதாரணத் துறைசார் ஆய்வுக் கூட்டங்கள் (Review Meetings) தொடர்பான ஆவணங்களை மட்டுமே அவர்கள் ஆதாரங்களாகக் காட்டி விளக்கம் கேட்டனர். அத்தனை கேள்விகளுக்கும் நான் புன்னகையோடும் பொறுமையோடும் பதிலளித்ததற்குக் காரணம், என் மீது எள்முனையளவும் தவறு இல்லை என்பதுதான். இது முழுக்க முழுக்கப் புனையப்பட்ட அப்பட்டமான பொய் வழக்காகும்" என்று ஆணித்தரமாகக் கூறினார்.

மேலும், "இன்னும் மீதமுள்ள 40 கேள்விகள் நிலுவையில் இருப்பதாகவும், அதற்காக அடுத்த வாரம் மீண்டும் ஒருமுறை விசாரணைக்கு அழைக்கவுள்ளதாகவும் மத்திய குற்றப்பிரிவு அதிகாரிகள் என்னிடம் தெரிவித்தனர். நீங்கள் எப்போது அழைத்தாலும், எத்தனை முறை சம்மன் அனுப்பினாலும் ஒரு பொறுப்புள்ள பொது ஊழியனாக விசாரணைக்கு நேரில் ஆஜராக நான் முழு மனதுடன் தயாராகவே உள்ளேன் என்று அதிகாரிகளிடம் உறுதிமொழி அளித்துள்ளேன்" என்று திட்டவட்டமாகத் தெரிவித்தார். முன்னாள் அமைச்சரிடம் ஒரே நாளில் 246 கேள்விகள் கேட்கப்பட்டு 8 மணி நேரம் விசாரணை நடத்தப்பட்ட இந்த விவகாரம் திமுக வட்டாரத்திலும், தமிழகக் கல்வித் துறை வட்டாரத்திலும் உச்சக்கட்ட பரபரப்பை ஏற்படுத்தியுள்ளது.

இதையும் படிங்க: இடைத்தேர்தலில் யாருக்கும் ஆதரவு இல்லை: பாமக தலைவர் அன்புமணி ராமதாஸ் அதிரடி அறிவிப்பு!