தமிழக அரசியலில் அண்மைக் காலமாகக் கட்சி மாற்றங்கள் தொடர்ந்து நடைபெற்று வருகின்றன. அது போன்ற ஒரு முக்கியமான நிகழ்வாக, நடிகர் விஜய்யின் முன்னாள் மேலாளரான பி.டி. செல்வகுமார் மற்றும் அதிமுகவின் முன்னாள் சட்டமன்ற உறுப்பினரான ஆ. சுப்புரத்தினம் ஆகியோர் திமுகவில் இணைந்தது குறிப்பிடத்தக்கது. இந்த இரு இணைப்புகளும் தனித்தனியாக நடந்தவை என்றாலும், 2026 சட்டமன்றத் தேர்தலை முன்னிட்டு திமுக தனது அணியை வலுப்படுத்தும் முயற்சியின் ஒரு பகுதியாகவே பார்க்கப்படுகிறது.

பி.டி. செல்வகுமார் தமிழ் திரையுலகில் நன்கு அறிமுகமானவர். 2003ஆம் ஆண்டு முதல் விஜய்யின் பொது உறவு அலுவலராக பணியாற்றி வந்தவர். 'சுறா', 'வில்லு', 'போக்கிரி' போன்ற படங்களில் அவரது பணி குறிப்பிடத்தக்கது. பின்னர் 'புலி' படத்தைத் தயாரித்தவர். 'கோயமுத்தூர் மாப்பிள்ளை' படத்தில் விஜய்யுடன் நடித்த அனுபவமும் உண்டு. விஜய்யுடன் சுமார் 25 ஆண்டுகள் நெருங்கிய தொடர்பில் இருந்த இவர், தமிழக வெற்றிக் கழகம் தொடங்கப்பட்டபோது அதில் முக்கிய பங்காற்றினார். 

இவரைத் தொடர்ந்து அதிமுக முன்னாள் சட்டமன்ற உறுப்பினர் சுப்புரத்தினம் திமுகவில் இணைந்திருந்தார். இவர் 1991ஆம் ஆண்டு சட்டமன்றத் தேர்தலில் பழனி தொகுதியில் அதிமுக சார்பில். போட்டியிட்டு வெற்றி பெற்றவர். பின்னர் கட்சியில் பல பொறுப்புகளை வகித்து வந்தாலும், ஓ. பன்னீர்செல்வத்தின் விசுவாசியாக அறியப்பட்டவர். அதிமுகவில் ஏற்பட்ட பிளவுகளுக்குப் பிறகு ஓபிஎஸ் அணியில் தொடர்ந்து செயல்பட்டு வந்தார். தொலைக்காட்சி விவாதங்களிலும் அடிக்கடி பங்கேற்று அதிமுகவின் கொள்கைகளை விளக்கி வந்தவர். ஆனால் 2026ஆம் ஆண்டு ஜனவரி 8ஆம் தேதி, அவருடன் சிவகாசி முன்னாள் எம்எல்ஏ பாலகங்காதரனும் சேர்ந்து, மீண்டும் முதலமைச்சர் மு.க. ஸ்டாலின் முன்னிலையில் அண்ணா அறிவாலயத்தில் திமுகவில் இணைந்தார்.

இதையும் படிங்க: நெருங்கும் தேர்தல்… வேட்பாளர் நேர்காணல் பணிகள் தீவிரம்… விஜய் முக்கிய ஆலோசனை..!

இந்த இணைப்பு ஒரே நாளில் இரு முன்னாள் எம்எல்ஏக்கள் திமுகவுக்கு வந்தது என்பதால் கூடுதல் கவனத்தை ஈர்த்தது. ஓபிஎஸ் ஆதரவாளர்கள் தொடர்ந்து திமுகவில் இணைவது அவருக்கு அதிர்ச்சியை ஏற்படுத்தியிருப்பதாகவும் அரசியல் வட்டாரங்களில் பேசப்பட்டது. அண்மையில் திமுகவில் இணைந்தவர்களுக்கு பொறுப்பு வழங்கப்பட்டுள்ளது. விஜயின் முன்னாள் மேலாளர் பி.டி.செல்வகுமாருக்கு திமுக வர்த்தகர் அணி துணை செயலாளர் பொறுப்பு வழங்கப்பட்டுள்ளது. ஓபிஎஸ் ஆதரவாளராக இருந்து பின் திமுகவில் இணைந்த அதிமுக முன்னாள் சட்டமன்ற உறுப்பினர் சுப்புரத்தினத்திற்கு, திமுக செய்தி தொடர்பு துணைத் தலைவர் பொறுப்பும் வழங்கப்பட்டுள்ளது.

இதையும் படிங்க: அதிக தொகுதிகளில் பாஜக... போட்டி பலமா இருக்கும்..! கட்சி நிர்வாகிகளுக்கு பி.எல். சந்தோஷ் அறிவுரை..!