தமிழக சட்டசபை தேர்தலுக்கான அரசியல் களம் தற்பொழுது அனல் பறக்கத் தொடங்கியுள்ள நிலையில், ஆளும் திமுக தலைமையிலான கூட்டணியில் தொகுதி பங்கீடு இறுதிக்கட்டத்தை எட்டியுள்ளது. இதன் முக்கிய நிகழ்வாக, இன்று சென்னை அண்ணா அறிவாலயத்தில் நடைபெற்ற பேச்சுவார்த்தையில், தேமுதிக (DMDK) கட்சிக்கு 10 சட்டமன்றத் தொகுதிகள் ஒதுக்கீடு செய்யப்பட்டு அதிகாரப்பூர்வமாக ஒப்பந்தம் கையெழுத்தானது. திமுக தலைவரும் முதலமைச்சருமான மு.க.ஸ்டாலின் மற்றும் தேமுதிக பொதுச்செயலாளர் பிரேமலதா விஜயகாந்த் ஆகியோர் இந்த வரலாற்றுச் சிறப்புமிக்க உடன்படிக்கையில் கையெழுத்திட்டனர்.

கடந்த சில வாரங்களாகவே தேமுதிக எந்தக் கூட்டணியில் இணையும் என்ற எதிர்பார்ப்பு அரசியல் வட்டாரத்தில் பலத்த விவாதங்களை ஏற்படுத்தி வந்தது. அதிமுக மற்றும் பாஜக தரப்பில் பேச்சுவார்த்தைகள் நடத்தப்பட்டதாகக் கூறப்பட்ட நிலையில், இறுதியில் திமுக கூட்டணியில் இணையத் தேமுதிக தலைமை முடிவெடுத்தது. இன்றைய சந்திப்பின் போது தேமுதிக தரப்பில் முக்கிய நிர்வாகிகள் பங்கேற்றனர். ஒதுக்கப்பட்டுள்ள 10 தொகுதிகள் எவை என்பது குறித்த பட்டியல், அடுத்த சில நாட்களில் வேட்பாளர் அறிவிப்போடு சேர்த்து வெளியிடப்படும் எனத் தெரிகிறது.

இதையும் படிங்க: பொன்முடிக்கு மீண்டும் சம்மன்! மே 12-ல் ஜார்ஜ் டவுன் நீதிமன்றத்தில் ஆஜராக உத்தரவு!

இந்தத் தொகுதி பங்கீடு ஒப்பந்தம் கையெழுத்தானதைத் தொடர்ந்து, திமுக கூட்டணியின் பலம் மேலும் அதிகரித்துள்ளதாக அரசியல் விமர்சகர்கள் கருதுகின்றனர். விஜயகாந்தின் மறைவுக்குப் பிறகு தேமுதிக சந்திக்கும் முதல் சட்டமன்றத் தேர்தல் இது என்பதால், தங்களது செல்வாக்கை நிரூபிக்க வேண்டிய கட்டாயத்தில் அக்கட்சி உள்ளது. மறுபுறம், ஒருமித்த கருத்துடன் கூட்டணி கட்சிகளை ஒருங்கிணைப்பதில் திமுக தலைமை வெற்றி கண்டுள்ளது. இந்த மெகா கூட்டணியின் தேர்தல் பிரச்சார வியூகங்கள் இனி வரும் நாட்களில் தமிழகம் முழுவதும் வேகம் எடுக்கும் என எதிர்பார்க்கப்படுகிறது.

இதையும் படிங்க: திமுக - காங்கிரஸ் கூட்டணியை நீடிக்காவிட்டால் அரசு ஊழியர்களின் ஊதியம் பறிபோகும்! நயினார் நாகேந்திரன் எச்சரிக்கை!