தமிழகச் சட்டமன்றத் தேர்தலை ஒட்டி, ஒட்டுமொத்த அரசியல் களமும் ஆவலுடன் எதிர்பார்த்துக் கொண்டிருந்த திராவிட முன்னேற்றக் கழகத்தின் (திமுக) தேர்தல் அறிக்கையை அக்கட்சியின் தலைவரும் முதலமைச்சருமான மு.க. ஸ்டாலின் அவர்கள் இன்று அண்ணா அறிவாலயத்தில் வெளியிட்டார். மொத்தம் 525 வாக்குறுதிகளைக் கொண்ட இந்த விரிவான அறிக்கையை வெளியிட்டுப் பேசிய அவர், இது வெறும் வாக்குறுதிகள் அல்ல, தமிழக மக்களின் வாழ்வாதாரத்தை உயர்த்தும் லட்சிய ஆவணம் என்று குறிப்பிட்டார்

கடந்த தேர்தல்களில் திமுக-வின் தேர்தல் அறிக்கை 'ஹீரோ'வாகப் பார்க்கப்பட்ட நிலையில், இந்த முறை அது ஒரு படி மேலே சென்று 'சூப்பர் ஸ்டார்' அந்தஸ்துடன் களம் கண்டுள்ளதாக முதல்வர் பெருமிதத்துடன் தெரிவித்தார்.

தேர்தல் அறிக்கையின் 'சூப்பர் ஸ்டார்' அம்சங்கள்:

மகளிர் உரிமைத் தொகை உயர்வு: குடும்பத் தலைவிகளுக்கு வழங்கப்பட்டு வரும் ₹1,000 உரிமைத் தொகை, இனி ₹2,000-ஆக உயர்த்தி வழங்கப்படும்.

இதையும் படிங்க: திமுக அறிக்கை ஒரு காப்பி! 525 வாக்குறுதிகளை விளாசித்தள்ளிய எடப்பாடி பழனிசாமி!

காலை உணவுத் திட்டம் விரிவாக்கம்: 1 முதல் 5-ஆம் வகுப்பு வரையிலான முதலமைச்சரின் காலை உணவுத் திட்டம், இனி 8-ஆம் வகுப்பு வரை பயிலும் கூடுதலாக 15 லட்சம் மாணவர்களுக்கும் விரிவுபடுத்தப்படும்.

உதவித்தொகை அதிரடி உயர்வு: முதியோர் உதவித்தொகை ₹1,200-லிருந்து ₹2,000-ஆகவும், மாற்றுத்திறனாளிகள் உதவித்தொகை ₹1,500-லிருந்து ₹2,500-ஆகவும் உயர்த்தப்படும்.

விவசாயிகளுக்கு நவீன வசதி: இலவச மின்சாரம் பெறும் 20 லட்சத்திற்கும் மேற்பட்ட விவசாயிகளுக்கு மீட்டர்கள் பொருத்தப்படாத நவீன மின்சாரப் பம்புசெட்டுகள் வழங்கப்படும். மேலும் நெல் கொள்முதல் விலை குவிண்டாலுக்கு ₹3,500 ஆக உயர்த்தப்படும்.

கல்வி ஊக்கத்தொகை: 'புதுமைப்பெண்' மற்றும் 'தமிழ்ப் புதல்வன்' திட்டத்தின் கீழ் உயர்கல்வி பயிலும் மாணவர்களுக்கு வழங்கப்படும் மாத உதவித்தொகை ₹1,500-ஆக உயர்த்தப்படும்.

பிரம்மாண்ட வீட்டு வசதி: 'கலைஞர் கனவு இல்லம்' உள்ளிட்ட பல்வேறு திட்டங்களின் கீழ் அடுத்த 5 ஆண்டுகளில் வீடற்ற ஏழைகளுக்காக 10 லட்சம் புதிய வீடுகள் கட்டித் தரப்படும்.

இல்லத்தரசி கூப்பன்: வருமான வரி செலுத்தாத குடும்பங்களைச் சேர்ந்த இல்லத்தரசிகள் வீட்டு உபயோகப் பொருட்களை வாங்க ₹8,000 மதிப்பிலான கூப்பன் வழங்கப்படும்.

முக்கியப் பொருளாதார மற்றும் சமூக வாக்குறுதிகள்:திமுக-வின் இந்த 'சூப்பர் ஸ்டார்' அறிக்கை மாநிலத்தின் ஒட்டுமொத்த வளர்ச்சியை இலக்காகக் கொண்டுள்ளது:

வேலைவாய்ப்பு: அரசு அமைப்புகளில் காலியாக உள்ள 1.5 லட்சம் பணியிடங்கள் நிரப்பப்படும். மேலும் 2030-க்குள் ஒவ்வொரு மாவட்டத்திலும் நியோ டைடல் பூங்காக்கள் அமைக்கப்பட்டு 2 லட்சம் வேலைவாய்ப்புகள் உருவாக்கப்படும்.

மாணவர் நலன்: உயர்கல்வி பயிலும் 35 லட்சம் மாணவர்களுக்கு மடிக்கணினி வழங்கப்படும்.

மீனவர் நலன்: மீன்பிடித் தடைக்கால நிவாரணத் தொகை ₹8,000-லிருந்து ₹12,000-ஆக உயர்த்தப்படும்.

மருத்துவக் காப்பீடு: முதலமைச்சரின் மருத்துவக் காப்பீட்டுத் தொகையின் வரம்பு ₹10 லட்சமாக உயர்த்தப்படும்.

முதல்வர் மு.க. ஸ்டாலின் அவர்கள் நாளை (மார்ச் 30) கூட்டணி கட்சித் தலைவர்களுக்குத் தேநீர் விருந்து அளிக்கவுள்ள நிலையில், இந்த அதிரடி அறிவிப்புகள் தேர்தல் களத்தில் பெரும் விவாதத்தைக் கிளப்பியுள்ளன.

இதையும் படிங்க: #BREAKING: திமுக தேர்தல் அறிக்கை 2026: மகளிர் உரிமைத் தொகை ₹2000, 10 லட்சம் வீடுகள் - 15 அதிரடி வாக்குறுதிகள்!