அமைச்சர் துரைமுருகன், அ.தி.மு.க. பொதுச்செயலர் எடப்பாடி பழனிசாமிக்கு நேரடி சவால் விடுத்துள்ளார். வேலூர் மாவட்டம் காட்பாடி தொகுதியில் தி.மு.க. சார்பில் 11வது முறையாக போட்டியிடும் அமைச்சர் துரைமுருகன், தன் மகன் கதிர் ஆனந்த் மற்றும் கூட்டணி கட்சி நிர்வாகிகளுடன் வேட்பு மனு தாக்கல் செய்தார். 

அதன் பிறகு அளித்த பேட்டியில் அவர், “ஆரணியில் நடைபெற்ற தேர்தல் பிரசாரக் கூட்டத்தில் பேசிய எடப்பாடி பழனிசாமி, ‘துரைமுருகனுக்கு வயதாகிவிட்டது. அவரால் நடக்கவே முடியவில்லை. அதிக முறை வென்றவர் என்ற பெருமைக்காகவே போட்டியிடுகிறார். ஒவ்வொரு முறையும் இது எனது கடைசி தேர்தல் என்று சொல்கிறார்’ என்று என்னை கடுமையாக விமர்சித்தார்” என்றார்.

தொடர்ந்து துரைமுருகன், “இபிஎஸ் வழக்கமாக பேசும் பொய்களில் இதுவும் ஒன்று. வேண்டுமானால் இபிஎஸ்யை என்னுடன் நடை போட்டிக்கு வரச் சொல்லுங்கள். பார்ப்போம். எனக்கு மக்களின் வரவேற்பு எப்படி உள்ளது என்பதை நீங்களே வந்து பார்க்கலாம்” என்று சவால் விடுத்தார்.

இதையும் படிங்க: துரைமுருகனின் தேர்தல் சென்டிமெண்ட்!! கடவுள் மறுப்பு கொள்கை Vs நவக்கிரக விநாயகர் வழிபாடு!!

காட்பாடியில் 11வது முறையாக போட்டியிடும் துரைமுருகன், தனது அனுபவத்தையும், மக்களிடையேயான தொடர்பையும் சுட்டிக்காட்டி, “வயது என்பது எண்ணிக்கை மட்டுமே. மக்களுக்காக உழைக்கும் உள்ளத்தின் வலிமையே முக்கியம்” என்றும் தெரிவித்தார்.

இந்த சவால் அரசியல் வட்டாரத்தில் பெரும் பரபரப்பை ஏற்படுத்தியுள்ளது. தேர்தல் பிரசாரம் தீவிரமடைந்துள்ள நேரத்தில், இரு கட்சிகளுக்கும் இடையேயான வார்த்தைப் போர் வலுத்து வருகிறது.

துரைமுருகன் தொடர்ந்து, “எனது பணியை மக்களே மதிப்பிடுவார்கள். இபிஎஸ் வந்து பார்த்தால், காட்பாடி மக்களின் அன்பையும், ஆதரவையும் நேரடியாக உணர முடியும்” என்று நம்பிக்கை தெரிவித்தார்.

இந்த சம்பவம் தேர்தல் களத்தில் புதிய விவாதத்தை தொடங்கியுள்ளது. அ.தி.மு.க. மற்றும் தி.மு.க. இடையேயான கடுமையான போட்டி காட்பாடி தொகுதியில் இன்னும் சூடுபிடிக்கும் என எதிர்பார்க்கப்படுகிறது.

இதையும் படிங்க: “வெறும் வெத்து வேட்டு”... எடப்பாடியை எகிறி அடித்த துரைமுருகன்... அதிமுக ஆசையில் மண்ணை வாரி போட்டாரே...!