திமுக சட்டத்துறை இணைச் செயலாளர் பரந்தாமன், தேனி தேக்கம்பட்டி கிளைச் சிறையிலிருந்து 17 விசாரணைக் கைதிகள் தப்பியோடிய சம்பவத்தைக் கண்டித்துள்ளார். இந்தச் சம்பவம் 31 ஆண்டுகளுக்குப் பிறகு தமிழ்நாட்டில் நடைபெற்றுள்ளது என்றும், ஒரு தலைமுறையே மறந்து போன நிகழ்வு தவெக ஆட்சியில் அரங்கேறியிருப்பதாகவும் அவர் குறிப்பிட்டுள்ளார். சிறைத்துறையின் கடுமையான பாதுகாப்புக் குறைபாட்டையும் நிர்வாக அலட்சியத்தையும் இந்தச் சம்பவம் வெளிச்சம் போட்டுக் காட்டியுள்ளதாகப் பரந்தாமன் தெரிவித்துள்ளார்.

வலிப்பு நோய் நாடகம் ஆடி சிறைக் காவலர்களை இரும்புத் தடிகளால் கொடூரமாகத் தாக்கி, சிறைச் சாவிகளைப் பறித்துக் கொண்டு முதன்மை நுழைவு வாயில் வழியாகவே கைதிகள் தப்பிச் சென்றுள்ளனர். முதன்மை வாசல் வழியாகவே 17 கைதிகளும் ஒரே நேரத்தில் தப்பிச் சென்றிருப்பது சிறைத் துறை வரலாற்றிலேயே நடக்காத ஒன்று என்று அவர் சுட்டிக்காட்டியுள்ளார். கைதிகளின் நாடகத்தை முன்கூட்டியே கணிக்கத் தவறியது, அவசரகாலப் பாதுகாப்பு நெறிமுறைகளைப் பின்பற்றாதது ஆகியவை அப்பட்டமான மனிதத் தவறுகள் என்று பரந்தாமன் கூறியுள்ளார்.

பாதுகாப்புப் பணியில் அலட்சியமாக இருந்த ஒன்பது சிறைக் காவலர்கள் மற்றும் அதிகாரிகள் பணியிடை நீக்கம் செய்யப்பட்டுள்ள நிலையில், உயர் மட்ட அளவில் பொறுப்பு வகிக்கும் அனைவர் மீதும் நடவடிக்கை எடுக்க வேண்டும் என்று அவர் வலியுறுத்தியுள்ளார். சிறை ஊழியர்களில் எவரேனும் கைதிகளுக்கு உடந்தையாக இருந்தார்களா, லஞ்சம் மற்றும் கூட்டுச் சதி ஏதேனும் பின்னணியில் உள்ளதா என்பதை விரிவான விசாரணைக்கு உட்படுத்த வேண்டும்.

இதையும் படிங்க: முத்துராமலிங்க தேவர் ஜெயந்தி..! பசும்பொன் செல்லும் ஸ்டாலின்..! ஏற்பாடுகள் தீவிரம்..!!

வெறும் கீழ்மட்ட ஊழியர்கள் பணியிடை நீக்கம் மட்டும் போதாது. குற்றவியல் நடவடிக்கைக்கு அரசு சார்பற்ற விரிவான விசாரணை அவசியம் என்று அவர் தெரிவித்துள்ளார். அடுத்தடுத்து இப்படிச் சம்பவங்கள் நடப்பதற்குப் பின்னணி என்ன என்பதை வெளிப்படையாக மக்களுக்குத் தெரிவிக்க சென்னை உயர் நீதிமன்றத்தின் தற்போதைய நீதிபதி ஒருவர் தலைமையில் விசாரணை ஆணையம் அமைக்க வேண்டும். நிர்மல்குமாரை உடனடியாக அமைச்சர் பதவியில் இருந்து நீக்க வேண்டும் என்று பரந்தாமன் வலியுறுத்தியுள்ளார்.

இதையும் படிங்க: அவசரகதியில் S.I.R..! ஞானேஷ் குமாரை பதவி நீக்குக.!! குடியரசு தலைவருக்கு ஸ்டாலின் மனு..!!