நிதியமைச்சர் நிர்மலா சீதாராமன் இன்று (ஜனவரி 29, 2026 அன்று) பாராளுமன்றத்தில் 2025-26 நிதியாண்டுக்கான பொருளாதார ஆய்வறிக்கையை தாக்கல் செய்தார். இந்த அறிக்கை அரசின் நிதி நிலவரத்தையும் எதிர்கால வளர்ச்சி திட்டங்களையும் விளக்கும் மிக முக்கிய ஆவணமாகும். 

இதில் 2026-27 நிதியாண்டில் இந்திய பொருளாதாரம் 6.8 சதவீதம் முதல் 7.2 சதவீதம் வரை வளர்ச்சி அடையும் என்று கணிக்கப்பட்டுள்ளது. நாட்டின் நீண்டகால சாத்தியமான வளர்ச்சி விகிதம் சுமார் 7 சதவீதமாக இருக்கும் என்றும் தெரிவிக்கப்பட்டுள்ளது.

2025-26 நிதியாண்டில் ரியல் ஜிடிபி வளர்ச்சி 6.3 சதவீதம் முதல் 6.8 சதவீதம் வரை இருக்கும் என மதிப்பிடப்பட்டுள்ளது. பணவீக்கம் ரிசர்வ் வங்கியின் 4 சதவீத இலக்குக்குள் நிலைத்திருக்கும் என்று எதிர்பார்க்கப்படுகிறது. ஏப்ரல் 1 முதல் தொடங்கும் அடுத்த நிதியாண்டிலும் பணவீக்கம் கட்டுப்பாட்டில் இருக்கும் என ஆய்வு உறுதிப்படுத்துகிறது. டிசம்பர் மாதத்தில் பணவீக்கம் 1.3 சதவீதமாக குறைந்துள்ளது. இது ரிசர்வ் வங்கியின் 2-6 சதவீத வரம்புக்கு கீழே நான்காவது மாதமாக தொடர்கிறது.

இதையும் படிங்க: வேண்டாமே என கெஞ்சிய நிர்மலா சீதாராமன்!! கறார் காட்டி கண் சிவந்தார் மோடி! பிப்.,1-ல் நடந்தே தீரும்!

இந்தியாவுக்கு கிடைத்துள்ள சாதகமான சப்ளை செயின் வாய்ப்புகள் மற்றும் ஜிஎஸ்டி வரி விகித மறுசீரமைப்பு ஆகியவை வளர்ச்சி மற்றும் பணவீக்க இலக்கை அடைவதற்கு உதவும் என்று அறிக்கை கூறுகிறது.

குறிப்பாக எலக்ட்ரானிக்ஸ் துறை 2025-26இல் பெரும் முன்னேற்றம் கண்டுள்ளது. உள்ளூர் உற்பத்தி மற்றும் ஏற்றுமதி பெரிதும் அதிகரித்துள்ளன. மொபைல் போன் உற்பத்தியில் இந்தியா அசத்தியுள்ளது.

2014-15இல் ரூ.18,000 கோடியாக இருந்த உற்பத்தி மதிப்பு 2024-25இல் ரூ.5.45 லட்சம் கோடியாக உயர்ந்துள்ளது. இது 30 மடங்கு அதிகரிப்பு ஆகும். இந்தியா நிகர இறக்குமதியாளராக இருந்து உலகின் இரண்டாவது பெரிய மொபைல் உற்பத்தியாளராக மாறியுள்ளது. 2014இல் 2 தொழிற்சாலைகள் மட்டுமே இருந்த நிலையில் இப்போது 300-க்கும் மேற்பட்ட தொழிற்சாலைகள் செயல்படுகின்றன.

பொருளாதார ஆய்வறிக்கை மத்திய பட்ஜெட்டுக்கு முன் வெளியாகும் மிக முக்கிய ஆவணம். நிர்மலா சீதாராமன் பிப்ரவரி 1 அன்று 2026-27 பட்ஜெட்டை தாக்கல் செய்ய உள்ளார்.

இந்த ஆய்வு அடுத்த ஆண்டு பொருளாதார கொள்கைகளுக்கு வழிகாட்டியாக அமையும். வளர்ச்சி, பணவீக்க கட்டுப்பாடு, தொழில்துறை முன்னேற்றம் ஆகியவை சாதாரண மக்களுக்கு வேலைவாய்ப்பு, விலை கட்டுப்பாடு, பொருளாதார நம்பிக்கை ஆகியவற்றை அதிகரிக்கும். இந்திய பொருளாதாரம் வலுவான அடித்தளத்தில் செல்வதற்கு இது உறுதியான சமிக்ஞையாக உள்ளது. மக்கள் இதை நம்பிக்கையுடன் எதிர்பார்த்து வருகின்றனர்.
 

இதையும் படிங்க: BUDGET 2026: நாடாளுமன்றத்தில் பொருளாதார ஆய்வறிக்கை தாக்கல் செய்தார் நிர்மலா சீதாராமன்..!!