கொச்சி: கேரள முன்னாள் முதல்வர் பினராயி விஜயனின் மகள் வீணா விஜயனின் ‘எக்ஸாலாஜிக் சொல்யூஷன்ஸ்’ நிறுவனத்துக்கு எதிரான பணமோசடி வழக்கை விசாரிக்க அமலாக்கத்துறைக்கு (ED) கேரள உயர் நீதிமன்றம் அனுமதி அளித்துள்ளது. இந்த முடிவு கேரள அரசியலில் பெரும் பரபரப்பை ஏற்படுத்தியுள்ளது.

2018-19ஆம் ஆண்டில், பினராயி விஜயன் முதல்வராக இருந்தபோது, கொச்சின் மினரல்ஸ் அண்ட் ரூட்டில் கம்பெனி லிமிடெட் எனும் நிறுவனம், வீணா விஜயனின் எக்ஸாலாஜிக் சொல்யூஷன்ஸ் நிறுவனத்துக்கு ரூ.1.72 கோடி பணம் செலுத்தியதாக குற்றச்சாட்டு எழுந்தது. 

எந்தவித சேவையும் வழங்காத நிலையில் இந்த பணம் பரிமாற்றம் செய்யப்பட்டதாகக் கூறப்படுகிறது. இந்த விவகாரம் தொடர்பாக 2024ஆம் ஆண்டு பணமோசடி தடுப்புச் சட்டத்தின்கீழ் அமலாக்கத்துறை வழக்குப் பதிவு செய்து விசாரணை தொடங்கியது.

இதையும் படிங்க: பினராயி விஜயன் வீட்டில் அமலாக்கத்துறை ரெய்டு! மகளால் வந்த வினை!! 12 இடங்களில் சல்லடை!

கடந்த மாத இறுதியில், பினராயி விஜயனின் வீடு உள்பட மாநிலம் முழுவதும் 12 இடங்களில் அமலாக்கத்துறை அதிகாரிகள் சோதனை நடத்தினர். இதனை எதிர்த்து கொச்சின் மினரல்ஸ் நிறுவனம் உயர் நீதிமன்றத்தில் மேல்முறையீடு செய்தது. 

இந்த மனுவை விசாரித்த நீதிபதிகள் ஏ.ராஜா விஜயராகவன் மற்றும் கே.வி.ஜெயக்குமார் அடங்கிய அமர்வு, மேல்முறையீட்டை தள்ளுபடி செய்து, அமலாக்கத்துறையின் விசாரணை தொடர அனுமதி வழங்கியுள்ளது. இந்த உத்தரவு தற்போது பெரும் கவனத்தை ஈர்த்துள்ளது.

இந்த வழக்கு கேரள அரசியல் களத்தில் பெரும் தாக்கத்தை ஏற்படுத்தும் என எதிர்பார்க்கப்படுகிறது. பினராயி விஜயன் குடும்பத்தினர் மீதான குற்றச்சாட்டுகளுக்கு இது புதிய பரிமாணத்தை அளிக்கும் என அரசியல் வட்டாரங்கள் கருதுகின்றன. அமலாக்கத்துறை தொடர்ந்து விசாரணையை முடுக்கி விடும் என எதிர்பார்க்கப்படுகிறது.

இந்த விவகாரம் தொடர்பாக பினராயி விஜயன் தரப்பில் இதுவரை எந்த பதிலும் வெளியாகவில்லை. கேரள காங்கிரஸ் உள்ளிட்ட எதிர்க்கட்சிகள் இந்த வழக்கை கடுமையாக விமர்சித்து வருகின்றன. மாநில அரசியலில் இந்த வழக்கு அடுத்தக்கட்ட விவாதங்களுக்கு வழிவகுக்கும் என அரசியல் பார்வையாளர்கள் தெரிவிக்கின்றனர்.

இந்த சம்பவம், கேரளாவில் ஆளும் இடதுசாரி கூட்டணி அரசுக்கு பெரும் சவாலாக மாறும் என்பதும் அரசியல் விமர்சகர்களின் கருத்தாக உள்ளது.

இதையும் படிங்க: முதல்வர் விஜய் பாணியை பின்பற்றும் கேரளா முதலமைச்சர்!! கடுமையாக விமர்சித்துக் கொண்ட நிலையில் சந்திப்பு!