தமிழக வெற்றிக் கழக (தவெக) தலைவரும் நடிகருமான விஜய் பங்கேற்க உள்ள பிரச்சார கூட்ட ஏற்பாடுகளை பார்வையிட சென்ற பொதுச்செயலாளர் புஸ்ஸி ஆனந்த் முன்பு, கட்சி நிர்வாகிகள் இடையே கடும் வாக்குவாதம் ஏற்பட்ட சம்பவம் பரபரப்பை ஏற்படுத்தியுள்ளது. இச்சம்பவம் நேற்று இரவு (டிசம்பர் 16) ஈரோடு மாவட்டம் பெருந்துறை அருகேயுள்ள விஜயமங்கலம் பகுதியில் நடைபெற்றது.
தவெக கட்சியின் முதல் பொதுக்கூட்டம் ஈரோடு பெருந்துறையில் நாளை (டிசம்பர் 18) நடைபெற உள்ளது. இக்கூட்டத்தில் விஜய் பிரச்சார பேச்சு நிகழ்த்த உள்ளதால், ஏற்பாடுகள் தீவிரமாக நடைபெற்று வருகின்றன. முன்னாள் அமைச்சரும், தவெக ஈரோடு மாவட்ட பொறுப்பாளருமான செங்கோட்டையன் இந்த ஏற்பாடுகளை மேற்பார்வையிடுகிறார்.
இந்நிலையில், நேற்று இரவு கூட்டம் நடைபெற உள்ள இடத்தை பார்வையிட புஸ்ஸி ஆனந்த் சென்றார். அப்போது, ஈரோடு மற்றும் தருமபுரி மாவட்ட தவெக நிர்வாகிகள் அவருக்கு மாலை அணிவிக்க முயன்றனர். மாலை அணிவிப்பதில் ஈரோடு மாவட்ட நிர்வாகிகளுக்கும், தருமபுரி மாவட்ட நிர்வாகிகளுக்கும் இடையே போட்டி ஏற்பட்டது. புஸ்ஸி ஆனந்திற்கு மாலை போட வந்த ஒரு நிர்வாகியை மற்றொரு நிர்வாகி தடுத்ததால் வாக்குவாதம் ஏற்பட்டது தெரியவந்தது. "என்னடா..?" என்று கேட்டு நிர்வாகிகள் சண்டை போட்டுள்ளனர். ஒரு நிர்வாகி மாலையை தூக்கி எறிந்த சம்பவமும் நிகழ்ந்தது.
இதையும் படிங்க: #BREAKING: விஜய் ரோடு ஷோ: தவெக நிர்வாகிகளுடன் முதல்வரை சந்தித்த புஸ்ஸி ஆனந்த்!
இது வாக்குவாதமாக மாறி, இரு தரப்பினரும் தள்ளுமுள்ளு செய்தனர். இதனால் பரபரப்பு ஏற்பட்டது. இதனைக்கண்டு அதிர்ச்சி அடைந்த புஸ்ஸி ஆனந்த் உடனடியாக தலையிட்டு, இரு தரப்பினரையும் சமாதானம் செய்ய முயன்றார். "யாரும் வேண்டாம்... கோபத்தில்" என்று கூறி அவர்களை அமைதிப்படுத்தினார்.
இது தவெக கட்சியின் உள் மோதலாக பார்க்கப்படுகிறது. கட்சி தொடங்கிய சில மாதங்களிலேயே இத்தகைய சம்பவங்கள் நிகழ்வது கட்சி தொண்டர்களிடையே கவலையை ஏற்படுத்தியுள்ளது. முன்னதாக, செப்டம்பர் மாதம் கரூரில் நடைபெற்ற தவெக கூட்டத்தில் ஏற்பட்ட கூட்ட நெரிசலில் 41 பேர் உயிரிழந்த சம்பவம் பெரும் சர்ச்சையை ஏற்படுத்தியது. அதற்கு பொறுப்பேற்று புஸ்ஸி ஆனந்த் உள்ளிட்டோர் மீது வழக்கு பதியப்பட்டது. அந்த சம்பவத்திற்கு பிறகு, தவெக கூட்டங்களுக்கு பாதுகாப்பு வழிகாட்டுதல்களை வெளியிட்டுள்ளது.
ஈரோடு கூட்டத்திற்கும் இதே வழிகாட்டுதல்கள் பின்பற்றப்படும் என புஸ்ஸி ஆனந்த் தெரிவித்துள்ளார். இச்சம்பவம் குறித்து கருத்து தெரிவித்த தவெக மூத்த தலைவர் ஒருவர், "இது சிறிய உள் விவாதம் மட்டுமே. கட்சி ஒற்றுமையுடன் உள்ளது. விஜய் அவர்களின் வருகைக்கு ஏற்பாடுகள் சிறப்பாக நடைபெறும்" என்றார். இருப்பினும், சமூக வலைதளங்களில் இச்சம்பவம் வைரலாகி, எதிர்க்கட்சிகள் விமர்சனம் செய்து வருகின்றன.
போலீஸ் வட்டாரங்கள் தெரிவிக்கையில், சம்பவ இடத்தில் பாதுகாப்பு அதிகரிக்கப்பட்டுள்ளது. கூட்டத்திற்கு ஆயிரக்கணக்கான தொண்டர்கள் வருவார்கள் என எதிர்பார்க்கப்படுவதால், போக்குவரத்து ஏற்பாடுகளும் செய்யப்பட்டுள்ளன. தவெக கட்சி 2026 சட்டமன்ற தேர்தலுக்கு தயாராகி வரும் நிலையில், இத்தகைய உள் மோதல்கள் கட்சியின் இமேஜை பாதிக்கலாம் என அரசியல் விமர்சகர்கள் கூறுகின்றனர்.
இதையும் படிங்க: வரலாறு திரும்புகிறது... செங்கோட்டையனை புகழ்ந்து தள்ளிய தவெக நிர்வாகிகள்...!