துபாயில் இருந்து இஸ்ரேலின் டெல் அவிவ் நகருக்கு சென்ற ஃப்ளைதுபாய் விமானத்தில் ஏற்பட்ட பயங்கர சம்பவம் தொடர்பான விசாரணையில் புதிய தகவல்கள் வெளியாகியுள்ளன.

விமானத்தை கைப்பற்றி விபத்துக்குள்ளாக்க முயன்றதாக குற்றம்சாட்டப்படும் ஓமன் நாட்டைச் சேர்ந்த துணை விமானி ஹமாம் அல்-ஹம்மாமி, இந்த தாக்குதலை ஜூலை மாதத்திலேயே நடத்த திட்டமிட்டிருந்ததாக விசாரணை அதிகாரிகளிடம் தெரிவித்ததாக தகவல்கள் வெளியாகியுள்ளன. இந்த தகவல்கள் அதிகாரப்பூர்வ விசாரணை வட்டாரங்களை மேற்கோள் காட்டி வெளியிடப்பட்டுள்ளன.

செப்டம்பர் 30-ம் தேதி துபாயில் இருந்து டெல் அவிவ் புறப்பட்ட ஃப்ளைதுபாய் விமானத்தில், இந்திய கேப்டன் ஸ்மித் மச்சார் மீது ஹமாம் அல்-ஹம்மாமி தாக்குதல் நடத்தியதாக கூறப்படுகிறது. அவசரகாலத்தில் பயன்படுத்தப்படும் கோடரியால் கேப்டனை தாக்கியதாக ஐக்கிய அரபு அமீரக அதிகாரிகள் தெரிவித்துள்ளனர்.

இதையும் படிங்க: பிளைதுபாய் விமானத்தில் கத்திக்குத்து! எங்களுக்கு எந்த சம்பந்தமும் இல்லை! ஈரான் திட்டவட்டமாக மறுப்பு!

விமானம் திடீரென வேகமாக கீழிறங்கிய நிலையில், கேப்டன் போராடி காக்பிட் கதவை திறக்க உதவியதால் பயணிகள் மற்றும் விமான ஊழியர்கள் இணைந்து துணை விமானியை கட்டுப்படுத்தினர். பின்னர் விமானம் சவுதி அரேபியாவின் தபுக் நகரில் அவசரமாக தரையிறக்கப்பட்டது.

விசாரணையில் ஹமாமி தெரிவித்ததாக வெளியாகியுள்ள தகவலின்படி, விமானத்தை கட்டுப்பாட்டுக்குள் கொண்டு வந்த பிறகு வழக்கம்போல் விமான நிலைய கட்டுப்பாட்டு அதிகாரிகளுடன் தொடர்பில் இருந்து தரையிறங்குவதற்கான அனுமதியை பெறுவது அவரது திட்டமாக இருந்ததாக கூறப்படுகிறது.

அதன் பின்னர் விமானத்தை பென் குரியன் விமான நிலையத்தில் உள்ள கட்டிடம் அல்லது மற்றொரு விமானத்தின் மீது மோதச் செய்ய திட்டமிட்டதாகவும் தகவல்கள் வெளியாகியுள்ளன.

மேலும், ஜூலை மாதத்திலேயே இதைச் செய்ய திட்டமிட்டிருந்ததாகவும், விமானக் குழுவில் ஒருவருடன் இருந்த நட்பு காரணமாக அந்த திட்டத்தை அப்போது கைவிட்டதாகவும் அவர் கூறியதாக தகவல்கள் தெரிவிக்கின்றன. இதன் மூலம் இந்த சம்பவம் திடீரென ஏற்பட்டதா அல்லது முன்கூட்டியே திட்டமிடப்பட்டதா என்ற விசாரணை மேலும் தீவிரமடைந்துள்ளது.

இதற்கிடையே, ஹமாமி ஏற்கனவே ஓமனில் விமானப் பணியில் இருந்து விலக்கப்பட்டிருந்ததாகவும், தீவிரவாத சிந்தனைகள் தொடர்பாக பாதுகாப்பு அமைப்புகளின் கவனத்திற்கு வந்திருந்ததாகவும் தகவல்கள் வெளியாகியுள்ளன. இந்த பின்னணி எப்படி வெளிநாட்டு விமான நிறுவனத்தில் பணிபுரிய வழிவகுத்தது என்பது குறித்தும் விசாரணை நடைபெற்று வருகிறது.

எனினும், ஜூலை திட்டம் உள்ளிட்ட வாக்குமூலம் தொடர்பான தகவல்கள் தொடர்ந்து விசாரணையில் உள்ளன. இந்த சம்பவத்தில் அவர் தனியாக செயல்பட்டாரா அல்லது வேறு யாருடைய உதவியும் இருந்ததா என்பதையும் அதிகாரிகள் ஆய்வு செய்து வருகின்றனர்.

இதையும் படிங்க: துணை விமானியின் பயங்கர சதிச்செயல்! தப்பித்தது எப்படி? விமானத்தில் நடந்த தாக்குதலை விவரித்த ஸ்மித் மச்சார்!