புது டெல்லி: இந்திய முப்படைகளின் தலைமை தளபதியாக என்எஸ் ராஜா சுப்ரமணி இன்று பொறுப்பேற்றுக் கொண்டார். முந்தைய தலைமை தளபதி அனில் சவுஹானின் பதவிக்காலம் முடிவடைந்ததைத் தொடர்ந்து அவர் இந்த உயர்பதவியை ஏற்றுக்கொண்டார். 

பதவியேற்பு முன்னதாக, தேசிய போர் நினைவிடத்தில் போரில் உயிர்நீத்த வீரர்களுக்கு ராஜா சுப்ரமணி மரியாதை செலுத்தினார். அதன்பிறகு தெற்கு பிளாக்கில் ராணுவ அணிவகுப்புடன் கூடிய மரியாதை அளிக்கப்பட்டது.

பொறுப்பேற்ற உடனேயே ஊடகங்களுக்கு அளித்த பேட்டியில் ராஜா சுப்ரமணி, “முப்படை தலைமை தளபதியாக பதவியேற்றதில் பெரும் பெருமை கொள்கிறேன். நாட்டு மக்களின் ஆயுதப்படைகள் மீதான நம்பிக்கைக்கு நன்றிக்கடன் பட்டுள்ளோம்” என்று தெரிவித்தார்.

இதையும் படிங்க: இந்தியாவுக்கு கூடுதல் பலம் சேர்க்கும் வாயு அஸ்த்ரா-1 100 கி.மீ., இலக்கை துல்லியமாக தாக்கும் திறன்! ஏவுகணை சோதனை வெற்றி!

அவர் மேலும் கூறியதாவது: “ராணுவம், கடற்படை, விமானப்படை, பாதுகாப்பு அமைச்சகம் உள்ளிட்ட அனைத்துத் துறைகளும் ஒருங்கிணைந்து இந்தியாவின் பாதுகாப்பை பலப்படுத்தும். இந்தியாவின் இறையாண்மையையும், பிராந்திய ஒருமைப்பாட்டையும் பாதுகாப்பதில் உறுதியாக இருப்போம். தற்சார்பு இந்தியா (ஆத்மநிர்பர் பாரத்) நமது பாதுகாப்புக் கொள்கையின் மைய அச்சாக இருக்கும். உள்நாட்டில் தயாரிக்கப்பட்ட ஆயுதங்கள் மற்றும் தொழில்நுட்பங்களை அதிக அளவில் பயன்படுத்துவதை விரைவுபடுத்துவோம்” என்றார்.

ராணுவம், தொழில்துறை, கல்வி நிறுவனங்கள் மற்றும் ஆராய்ச்சி அமைப்புகளுக்கு இடையேயான ஒத்துழைப்பை வலுப்படுத்தி, ஆயுதப்படைகளை நவீனமயமாக்குவது தனது முக்கிய நோக்கம் என அவர் வலியுறுத்தினார். மறைந்த தளபதி பிபின் ராவத் மற்றும் அனில் சவுஹான் ஆகியோரின் தலைமைக்கு நன்றி தெரிவித்த ராஜா சுப்ரமணி, “அவர்களின் பங்களிப்பு முன்மாதிரியானது” என்றும் புகழ்ந்தார்.

ராணுவ வீரர்கள், கடற்படை மற்றும் விமானப்படை வீரர்களின் தைரியம், தொழில்முறைத் திறன் ஆகியவற்றைப் பாராட்டிய அவர், அவர்களின் பயிற்சி மற்றும் நலனை தனது முதன்மை முன்னுரிமையாகக் கொள்வதாக உறுதியளித்தார். முன்னாள் வீரர்களின் நலனுக்கும் தொடர்ந்து உறுதுணையாக இருப்போம் என்றார்.

புதிய தலைமை தளபதியின் பொறுப்பேற்பு இந்திய பாதுகாப்புத் துறையில் புதிய உத்வேகத்தை ஏற்படுத்தும் என எதிர்பார்க்கப்படுகிறது. தற்சார்பு உற்பத்தி, தொழில்நுட்ப ஒருங்கிணைப்பு மற்றும் முப்படைகளின் ஒருங்கிணைப்பு ஆகியவற்றுக்கு அதிக முக்கியத்துவம் அளிக்கப்படும் என்பது தெளிவாகியுள்ளது.

இதையும் படிங்க: இந்தியாவுக்கு எதிராக தொடர்ந்து செயல்பட்டால்..!! புவியியல் வரலாற்றில் பாக்., இருக்கவே இருக்காது! ராணுவ தளபதி வார்னிங்!