ஜிஎஸ்டி வரி ஏய்ப்பு தொடர்பான வழக்குகளில் அதிகாரிகளுக்கு வழங்கப்பட்டுள்ள கைது அதிகாரத்தை கட்டுப்படுத்துவது உள்ளிட்ட பல்வேறு முக்கிய மாற்றங்கள் குறித்து மத்திய அரசு ஆலோசித்து வருகிறது.

அடுத்த கட்ட ஜிஎஸ்டி சீர்திருத்தங்களின் ஒரு பகுதியாக இந்த நடவடிக்கைகள் பரிசீலிக்கப்படுகின்றன. வரும் அக்டோபர் 7-ம் தேதி நடைபெற உள்ள 57-வது ஜிஎஸ்டி கவுன்சில் கூட்டத்தில் இதுதொடர்பான பல முன்மொழிவுகள் விவாதிக்கப்பட உள்ளதாக தகவல்கள் வெளியாகியுள்ளன.

தற்போதைய நடைமுறையில் குறிப்பிட்ட கடுமையான வரி குற்றங்களில் ஜிஎஸ்டி அதிகாரிகளுக்கு கைது செய்யும் அதிகாரம் உள்ளது. இந்த அதிகாரம் தொடர்பாக வணிகர்கள் மற்றும் தொழில் நிறுவனங்களிடம் இருந்து நீண்ட காலமாக பல்வேறு கவலைகள் தெரிவிக்கப்பட்டு வருகின்றன.

இதையும் படிங்க: சமரசம் பண்ணியாச்சு! ரூ.1.48 கோடி செலுத்திய அதானி! 4 நிறுவனங்கள் மீதான வழக்கை கைவிட்ட செபி!!

இதையடுத்து, வரி அதிகாரிகளின் நேரடி கைது அதிகாரத்தை நீக்கி, கைது நடவடிக்கைக்கு நீதிமன்றத்தின் முன் அனுமதி பெறும் வகையில் விதிகளை மாற்றுவது குறித்து பரிசீலனை நடைபெற்று வருகிறது.

மேலும், வரி ஏய்ப்பு தொடர்பான குற்றவியல் நடவடிக்கைகளுக்கான வரம்பை உயர்த்தும் திட்டமும் ஆலோசனையில் உள்ளது. தற்போது ரூ.1 கோடி அளவிலான வழக்குகளிலும் குற்றவியல் நடவடிக்கை தொடங்கக்கூடிய நிலையில், இதற்கான வரம்பை ரூ.5 கோடியாக உயர்த்துவது குறித்து ஜிஎஸ்டி கவுன்சில் பரிசீலிக்கலாம் என தகவல்கள் தெரிவிக்கின்றன.

இதன் மூலம் சிறிய அளவிலான வரி தொடர்பான பிரச்சினைகள் குற்றவியல் வழக்குகளாக மாறுவதைத் தவிர்க்க முடியும் என எதிர்பார்க்கப்படுகிறது.

உண்மையாக வரி செலுத்தும் வணிகர்களின் உள்ளீட்டு வரிச் சலுகையான ஐடிசியை பாதுகாப்பது தொடர்பான மாற்றங்களும் முன்வைக்கப்பட்டுள்ளன. சப்ளையர் செய்த தவறுக்காக பொருளை முறையாக வாங்கிய வணிகரின் ஐடிசி பாதிக்கப்படுவதைத் தவிர்க்கும் வகையில் விதிகளை எளிமைப்படுத்துவது குறித்து ஆலோசிக்கப்படுகிறது.

சிறிய ஆன்லைன் வணிகர்கள் இ-காமர்ஸ் நிறுவனங்களின் கிடங்குகளை தங்களது ஜிஎஸ்டி பதிவு முகவரியாக பயன்படுத்த அனுமதிப்பது போன்ற சலுகைகளும் பரிசீலனையில் உள்ளன.

இதுதவிர, குறைந்த தொகை வரி தொடர்பான வழக்குகள் மற்றும் தேவையற்ற வழக்குகளை குறைத்து, ஜிஎஸ்டி நிர்வாகத்தை எளிமைப்படுத்தும் நடவடிக்கைகளும் பரிசீலிக்கப்படுகின்றன. நிறுவனங்கள் ஊழியர்களுக்காக செலுத்தும் குழு மருத்துவக் காப்பீட்டு பிரீமியத்துக்கான ஜிஎஸ்டிக்கு ஐடிசி வழங்குவது குறித்தும் ஆலோசனை நடைபெறுவதாக தகவல்கள் தெரிவிக்கின்றன.

எனினும், இவை அனைத்தும் தற்போது பரிசீலனையில் உள்ள முன்மொழிவுகள் மட்டுமே. அக்டோபர் 7-ம் தேதி நடைபெறும் ஜிஎஸ்டி கவுன்சில் கூட்டத்திற்குப் பிறகே இறுதி முடிவுகள் மற்றும் நடைமுறை மாற்றங்கள் குறித்து தெளிவாகத் தெரியவரும்.

இதையும் படிங்க: காஷ்மீர் பயங்கரவாதிகளிடம் சிக்கிய ‘LoRa’ டெக்னாலஜி! பாதுகாப்புப் படைகளுக்கு புதிய தலைவலி!