தமிழக வெற்றிக் கழக அமைச்சர் ஆதவ் அர்ஜூனா, திமுக தலைவர் மு.க. ஸ்டாலின் மற்றும் கட்சியின் தகவல் தொழில்நுட்பப் பிரிவுக்கு எதிராக சென்னை உயர்நீதிமன்றத்தில் அவதூறு வழக்குத் தொடர்ந்துள்ளார். 

ரூ.1 கோடி இழப்பீடு மற்றும் சர்ச்சைக்குரிய சமூக வலைதளப் பதிவை நீக்கக் கோரி அவர் தாக்கல் செய்த மனுவின் அடிப்படையில், நீதிபதி கோவிந்தராஜன் திலகவதி, ஸ்டாலின் உள்ளிட்டோருக்கு செப்டம்பர் 15-க்குள் பதில் அளிக்குமாறு நோட்டீஸ் அனுப்ப உத்தரவிட்டுள்ளார்.

ஜூன் 8 அன்று திமுக ஐடி விங் வெளியிட்ட பதிவில், அமலாக்கத்துறை அறிவிப்பின்படி சென்னை மற்றும் ராமநாதபுரத்தில் பறிமுதல் செய்யப்பட்ட ரூ.258 கோடி மதிப்பிலான போதைப்பொருள் கடத்தல் வழக்கில் முக்கியப் பங்கு வகித்த ஜான் பிரிட்டோ, தற்போதைய தவெக அரசின் சிறு துறைமுகங்கள் மற்றும் பொதுப்பணித்துறை அமைச்சர் ஆதவ் அர்ஜூனாவின் நெருங்கிய உறவினர் என்று குறிப்பிடப்பட்டிருந்தது.

இதையும் படிங்க: ஓராண்டில் மாற்றம்.. அரசு பள்ளிகளும் தனியார் பள்ளிகளுக்கு சவால் விடும்..!! ஆதவ் அர்ஜூனா உறுதி!!

இந்தப் பதிவு இரண்டு நாட்களில் சுமார் 2.67 லட்சம் பேரால் பார்க்கப்பட்டது. 2,600-க்கும் மேற்பட்டோர் மறுபதிவு செய்தனர். 4,400 பேர் விருப்பம் தெரிவித்தனர். 150 பேர் கருத்துரைத்தனர். இது ஸ்டாலினின் அறிவுரையின்படி வெளியிடப்பட்டதாகவும், கட்சி கணக்கைப் பராமரிப்பதால் அவரே பொறுப்பேற்க வேண்டும் என்றும் மனுவில் கூறப்பட்டுள்ளது.

ஆதவ் அர்ஜூனா தரப்பு, ஜான் பிரிட்டோ தனக்கு எந்தவித உறவும் இல்லை என்று தெளிவுபடுத்தியுள்ளது. பி. ஜான் பிரிட்டோ என்ற நபர் சென்னை போலீஸ் கமிஷனர் அலுவலகத்தில் புகார் செய்து, அமலாக்கத்துறை குறிப்பிடும் நபர் தான் அல்ல என்று தெரிவித்துள்ளார். இதனால், இந்தப் பதிவு வேண்டுமென்றே அவதூறைப் பரப்பி நற்பெயரைச் சேதப்படுத்தும் நோக்கத்துடன் வெளியிடப்பட்டதாக மனுதாரர் குற்றம் சாட்டியுள்ளார்.

எனவே, திமுக ஐடி விங் மற்றும் ஸ்டாலின் இணைந்து ரூ.1 கோடி இழப்பீடு வழங்கவும், பதிவை உடனடியாக நீக்கவும் உத்தரவிட வேண்டும் என கோரப்பட்டுள்ளது.இந்த வழக்கு இன்று நீதிபதி முன்பு விசாரணைக்கு வந்தபோது, மனுதாரர் தரப்பு வழக்கறிஞர் ஏ.பி. சூரிய பிரகாசம் ஆஜராகி வாதிட்டார். 

அவரது வாதத்தை ஏற்றுக்கொண்ட நீதிபதி, மு.க. ஸ்டாலின் மற்றும் திமுக தகவல் தொடர்பு குழுவிற்கு நோட்டீஸ் அனுப்பி, செப்டம்பர் 15-க்குள் பதில் மனு தாக்கல் செய்ய உத்தரவிட்டார். இந்த விவகாரம் அரசியல் மற்றும் சட்டரீதியான கவனத்தை ஈர்த்துள்ளது.

இதையும் படிங்க: எம்.எல்.ஏ பதவியை ராஜினாமா செய்துவிட்டு சேப்பாக்கத்தில் நில்லுங்கள்! உதயநிதிக்கு ஆதவ் அர்ஜுனா சவால்!