ஜெம் கிரானைட்ஸ் உரிமையாளர் ஆர்.வீரமணி எளிய குடும்பங்களைச் சேர்ந்த நூற்றுக்கும் மேற்பட்ட பிஞ்சுச் சிறுமிகளிடம் பாலியல் அத்துமீறல்களில் ஈடுபட்ட விவகாரம் தமிழகத்தையே உலுக்கியுள்ள நிலையில், செல்வாக்கு மிக்க நபர்கள் சம்பந்தப்பட்டுள்ள இவ்வழக்கை உயர்நீதிமன்ற நீதிபதியின் நேரடி மேற்பார்வையில் சிறப்புப் புலனாய்வுக் குழு அமைத்து விசாரிக்க வேண்டும் என்று மார்க்சிஸ்ட் கம்யூனிஸ்ட் கட்சியின் (சிபிஎம்) மாநிலச் செயலாளர் பி.சண்முகம் வலியுறுத்தியுள்ளார்.

சமூகத்தில் பெரும் மனிதர்கள் என்ற போர்வையிலும் பணத் திமிரோடும் வலம் வருபவர்கள் எத்தகைய இழிவான கொடூரக் குற்றங்களில் ஈடுபடுகிறார்கள் என்பதற்கு ஜெம் வீரமணி மீதான குற்றச்சாட்டுகளே வெளிப்படையான சான்றாகும் என்று குறிப்பிட்டுள்ள சிபிஎம் மாநிலச் செயலாளர் பி.சண்முகம், காணொளி ஆதாரங்களில் அடையாளத்தை உறுதி செய்ய இயலவில்லை என்ற பசப்பலான காரணத்தைக் கூறி வழக்கை அடியோடு முடித்து வைக்கப் பார்த்த சூழலில், சிறப்பு போக்சோ நீதிமன்றம் அதனை ஏற்க மறுத்து கடந்த 2026 ஜூன் 19-ஆம் தேதியன்று மறுவிசாரணைக்கு உத்தரவிட்டது வரவேற்கத்தக்க திருப்புமுனையாக அமைந்தது; நீதிமன்றம் அவ்வாறு உத்தரவிடாமல் போயிருந்தால் இவ்வளவு பெரிய கொடூரத்தை நிகழ்த்தியவர்கள் சட்டத்தின் பிடியிலிருந்து சுலபமாகத் தப்பித்திருப்பார்கள் என்று சுட்டிக்காட்டியுள்ளார்.

நீதிமன்ற உத்தரவைத் தொடர்ந்து தவெக அரசாங்கம் வீரமணியைக் கைது செய்துள்ளதோடு, குற்றத்திற்கு உடந்தையாக இருந்தவர்களையும் கைது செய்து தொடர் நடவடிக்கைகளை மேற்கொண்டு வருவதைக் குறிப்பிட்ட அவர், தமிழகத்தையே உலுக்கியுள்ள இந்த மாபெரும் பாலியல் வன்கொடுமை வழக்கில் சம்பந்தப்பட்டவர்கள், அவர்களுக்குத் துணை நின்றவர்கள் மற்றும் குற்றங்களை மறைக்க முயற்சித்தவர்கள் எவராயினும், அவர்கள் எத்தகைய உயர் பொறுப்புகளில் இருந்தாலும் தப்பவிடாமல் சட்டத்தின் முன் நிறுத்தி மிகக் கடுமையான தண்டனைக்கு உள்ளாக்கப்பட வேண்டும் என்று கேட்டுக்கொண்டார்.

இதையும் படிங்க: தமிழகத்தை உலுக்கிய பாலியல் வழக்கு... ஜெம் வீரமணிக்கு நீதிமன்ற காவல் நீட்டிப்பு..! போக்சோ நீதிமன்றம் உத்தரவு.!!

தற்போது அரசு அமைத்துள்ள விசாரணைக் குழுவின் நம்பகத்தன்மை குறித்துக் கேள்வி எழுப்பிய பி.சண்முகம், இப்பிரச்சினையில் தமிழ்நாடு அரசால் காவல் ஆணையர் மேற்பார்வையில் சிறப்புப் புலனாய்வுக் குழு அமைக்கப்பட்டுள்ளது. ஆனால், மிக அதிக செல்வாக்கு மிக்க பெரிய மனிதர்கள் சம்பந்தப்பட்ட இவ்வழக்கில், ஏற்கெனவே அவர்கள் சட்டத்தின் பிடியிலிருந்து தப்பித்துச் செல்வதற்கான வழிகள் உருவாக்கப்பட்ட கசப்பான அனுபவம் இருக்கும் சூழலில், வெறும் காவல் ஆணையர் மேற்பார்வையிலான விசாரணை என்பது துளியும் பொருத்தமானதாக இருக்காது. 

ஆகவே, வழக்கின் உண்மைத்தன்மையை முழுமையாக வெளிக்கொண்டு வரவும், பாதிக்கப்பட்ட சிறுமிகளுக்கு பாரபட்சமற்ற நீதி கிடைக்கவும் ஏதுவாக, உயர்நீதிமன்ற நீதிபதியின் நேரடி மேற்பார்வையில் சிறப்புப் புலனாய்வுக் குழு அமைக்கப்பட்டு உரிய விசாரணை நடத்தப்பட வேண்டும் என்று திட்டவட்டமாக வலியுறுத்தியுள்ளார்.

இதையும் படிங்க: ஜெம் வீரமணி வழக்கு வீடியோக்களை வெளியிட ஊடகங்களுக்கு தடை.... சென்னை ஐகோர்ட் அதிரடி!