தஞ்சாவூர் மாவட்டம் பாபநாசம் அருகே சரபோஜிராஜபுரம் பேருந்து நிறுத்தம் பகுதியில் இரண்டு தனியார் பேருந்துகள் அதிவேகத்தில் நேருக்கு நேர் பலத்த சத்தத்துடன் மோதிக்கொண்ட பயங்கர விபத்தில், ஒரு பேருந்தின் ஓட்டுநர் சம்பவ இடத்திலேயே உடல் நசுங்கிப் பலியானார்; மற்றொரு பேருந்து ஓட்டுநரின் இரு கால்களும் முறிந்த நிலையில், பேருந்துகளில் பயணித்த 25 பயணிகள் படுகாயமடைந்து அரசு மருத்துவமனைகளில் அனுமதிக்கப்பட்டுள்ளனர்.

தஞ்சாவூர் - கும்பகோணம் பிரதான நெடுஞ்சாலையில் இன்று மாலை சுமார் 4:00 மணியளவில் கடுமையான வாகனப் போக்குவரத்து நிலவி வந்தது. அப்போது, தஞ்சாவூரிலிருந்து கும்பகோணம் நோக்கிப் பயணிகளுடன் ஒரு தனியார் பேருந்து விரைந்து சென்று கொண்டிருந்தது; அதேவேளையில், கும்பகோணத்திலிருந்து பயணிகளை ஏற்றிக்கொண்டு தஞ்சாவூர் நோக்கி மற்றொரு தனியார் பேருந்து வந்து கொண்டிருந்தது.

இரண்டு பேருந்துகளும் பாபநாசம் அருகே உள்ள சரபோஜிராஜபுரம் பேருந்து நிறுத்தம் வளைவுப் பகுதியை நெருங்கியபோது, எதிர்பாராதவிதமாக ஒன்றையொன்று நேருக்கு நேர் பயங்கர சத்தத்துடன் மோதி விபத்துக்குள்ளாகின. மோதிய வேகத்தில் இரண்டு பேருந்துகளின் முன்பகுதிகளும் அப்பளம்போல் சுக்குநூறாக நொறுங்கி உருக்குலைந்தன; பேருந்துகளுக்குள் இருந்த பயணிகள் தூக்கி வீசப்பட்டு ரத்த வெள்ளத்தில் காப்பாற்றுங்கள், காப்பாற்றுங்கள் எனக் கூச்சலிட்டு அலறித் துடித்தனர்.

இதையும் படிங்க: வாக்காளர் பட்டியலில் பெயர் சேர்க்க சிறப்பு முகாம்கள்: தலைமை தேர்தல் அதிகாரி அர்ச்சனா பட்நாயக் அறிவிப்பு!

இந்த பயங்கர மோதலில், கும்பகோணத்திலிருந்து தஞ்சை நோக்கி வந்த தனியார் பேருந்தை இயக்கிய தாராசுரத்தைச் சேர்ந்த இளம் ஓட்டுநர் பாலாஜி (27) என்பவர் இடிபாடுகளுக்குள் சிக்கி சம்பவ இடத்திலேயே பரிதாபமாக உயிரிழந்தார். அதேபோல், தஞ்சையிலிருந்து வந்த பேருந்தின் ஓட்டுநரான இரும்புத்தலையைச் சேர்ந்த பிரவீன் (28) என்பவரின் இரண்டு கால்களும் முறிந்து பலத்த காயமடைந்து உயிருக்குப் போராடும் நிலைக்குத் தள்ளப்பட்டார்.

விபத்து நடந்த சத்தம் கேட்டு அதிர்ச்சியடைந்த அப்பகுதி பொதுமக்கள் மற்றும் அவ்வழியே சென்ற வாகன ஓட்டிகள் உடனடியாக மீட்புப் பணியில் இறங்கினர்; தகவல் அறிந்து பாபநாசம் தீயணைப்பு நிலைய வீரர்கள் மற்றும் அய்யம்பேட்டை காவல் துறையினர் போர்க்கால அடிப்படையில் விரைந்து வந்தனர். இடிபாடுகளுக்குள் சிக்கியவர்களை மீட்ட மீட்புக் குழுவினர், படுகாயமடைந்த 25 பயணிகளையும், கால்கள் முறிந்த ஓட்டுநர் பிரவீனையும் 108 அவசர ஊர்திகள் மூலம் தஞ்சாவூர், பாபநாசம் மற்றும் அய்யம்பேட்டை அரசு மருத்துவமனைகளுக்கு அனுப்பி வைத்தனர்; அங்கு அவர்களுக்குத் தீவிர சிகிச்சைப் பிரிவில் மருத்துவர்கள் சிகிச்சை அளித்து வருகின்றனர்.

பலியான ஓட்டுநர் பாலாஜியின் உடலை மீட்ட போலீசார் உடற்கூறாய்வுக்காக அரசு மருத்துவமனைக்கு அனுப்பி வைத்தனர்; விபத்து காரணமாகத் தஞ்சை - கும்பகோணம் சாலையில் நீண்ட வரிசையில் வாகனங்கள் அணிவகுத்து நின்றதால் போக்குவரத்து ஸ்தம்பித்தது; விபத்துக்குள்ளான பேருந்துகளை அப்புறப்படுத்திப் போக்குவரத்தைச் சீரமைத்த அய்யம்பேட்டை போலீசார், விபத்து குறித்து வழக்குப் பதிவு செய்து தீவிர விசாரணை மேற்கொண்டு வருகின்றனர்.

இதையும் படிங்க: சி. விஜயபாஸ்கர் மீதான ரூ.4 கோடி மோசடி வழக்கு முடித்து வைப்பு: சென்னை உயர்நீதிமன்றம்  உத்தரவு!