தமிழ்நாடு முழுவதும் இயங்கும் லாரிகளின் சரக்கு வாடகை கட்டணங்களை 25 சதவீதம் உயர்த்த முடிவு செய்துள்ளனர் லாரி உரிமையாளர்கள். டீசல் விலை உயர்வு, உதிரி பாகங்கள் விலை அதிகரிப்பு மற்றும் சுங்கக் கட்டண உயர்வு உள்ளிட்ட பல்வேறு காரணங்களால் லாரி தொழில் பெரும் நெருக்கடியை எதிர்கொள்வதாகக் கூறப்படுகிறது. வரும் 15-ம் தேதி முதல் இந்தப் புதிய கட்டண உயர்வு அமலுக்கு வர உள்ளது. இதனால் காய்கறிகள், உணவு தானியங்கள், கட்டுமானப் பொருட்கள் உள்ளிட்ட அத்தியாவசியப் பொருட்களின் போக்குவரத்துச் செலவு அதிகரிக்கும் என்பதால் சந்தை விலைகள் உயரும் அபாயம் ஏற்பட்டுள்ளது.

நாமக்கல்லில் நேற்று நடைபெற்ற தமிழ்நாடு மாநில லாரி உரிமையாளர்கள் சம்மேளனத்தின் செயற்குழு கூட்டத்தில் இந்த முக்கிய முடிவு எடுக்கப்பட்டது. சம்மேளனத் தலைவர் தனராஜ் தலைமையில் நடைபெற்ற இந்தக் கூட்டத்தில், தொழில் துறையின் தற்போதைய பிரச்னைகள் விரிவாக ஆலோசிக்கப்பட்டன. கூட்டத்தில் மத்திய அரசுக்கு டீசல் விலையைக் குறைக்க வலியுறுத்தும் தீர்மானங்கள் நிறைவேற்றப்பட்டன.

கூட்டம் முடிந்ததும் செய்தியாளர்களிடம் பேசிய தலைவர் தனராஜ், “சமீப காலமாக டீசல் விலை தொடர்ந்து உயர்ந்து வருகிறது. சமீபத்தில் மட்டும் ஒரு லிட்டருக்கு 8 ரூபாய் வரை உயர்வு ஏற்பட்டுள்ளது. இதனால் லாரி உரிமையாளர்களின் இயக்கச் செலவு கணிசமாக அதிகரித்துள்ளது. ஒரே தவணையில் விலை உயர்த்தப்படுவதால், அதற்கு ஏற்ப வாடகையை உயர்த்துவதைத் தவிர வேறு வழியில்லை” என்றார். மேலும், “எங்கள் தொழிலின் வாழ்வாதாரத்தைப் பாதுகாக்கும் நோக்கில் இந்த முடிவு எடுக்கப்பட்டுள்ளது. பொதுமக்களுக்கு ஏற்படும் சிரமங்களுக்கு வருத்தம் தெரிவித்துக் கொள்கிறோம். ஆனால், தொழிலைத் தொடர்வதற்கு இது தவிர்க்க முடியாத நிலையாகிவிட்டது” என்றும் அவர் விளக்கினார்.

இதையும் படிங்க: Petrol Diesel Price Hike: விடிந்ததுமே ஷாக்...!! - இடியாய் இறங்கிய பெட்ரோல், டீசல் விலை உயர்வு... 10 நாட்களில் 3வது முறையாக உயர்வு...!

தற்போதைய மற்றும் புதிய கட்டண விவரங்கள்: நாமக்கல்லில் இருந்து சென்னைக்கு 25 டன் சுமையுடன் செல்லும் கனரக லாரிகளுக்கு தற்போது டன்னுக்கு ரூ.1,000 என மொத்தம் ரூ.25,000 வரை வசூலிக்கப்படுகிறது. 25 சதவீத உயர்வுக்குப் பிறகு கூடுதலாக சுமார் ரூ.6,000 வரை அதிகரிக்கும் என எதிர்பார்க்கப்படுகிறது. அதேபோல், மதுரைக்கு டன்னுக்கு ரூ.750, கோவைக்கு ரூ.750, தூத்துக்குடிக்கு ரூ.1,200, ஓசூருக்கு ரூ.900, ஈரோட்டுக்கு ரூ.500 என்று பல்வேறு இடங்களுக்கு வெவ்வேறு கட்டணங்கள் நிர்ணயிக்கப்பட்டுள்ளன. இவை அனைத்தும் 15-ம் தேதி முதல் 25 சதவீதம் உயரும்.

டிப்பர் லாரிகளுக்கு கிலோமீட்டருக்கு ரூ.10 முதல் ரூ.25 வரை இருந்த கட்டணம் ரூ.12 முதல் ரூ.30 வரை உயரும். இலகு ரக லாரிகளின் கட்டணம் ரூ.20-50 இலிருந்து ரூ.23-60 வரை உயரும். கனரக கன்டெய்னர் லாரிகளுக்கு ரூ.35-85 இலிருந்து ரூ.50-110 வரை அதிகரிக்கும் என்று சரக்கு லாரி டிரைவர்கள் சங்கத்தினர் தெரிவித்துள்ளனர். சிறிய ரக லாரிகள் மற்றும் பெரிய ஆட்டோக்களின் வாடகையும் கணிசமாக உயரும் என எதிர்பார்க்கப்படுகிறது.

தமிழ்நாட்டில் சுமார் 6 லட்சத்து 50 ஆயிரம் லாரிகள் இயங்கி வருகின்றன. இவை மூலம் தினசரி பல்வேறு அத்தியாவசியப் பொருட்கள் கொண்டு செல்லப்படுகின்றன. வாடகை உயர்வு நேரடியாகப் பொருட்களின் விலையைப் பாதிக்கும். நடுத்தர மக்களின் அன்றாட வாழ்க்கை மீது கூடுதல் சுமை ஏற்படும் என்று பொருளாதார நிபுணர்கள் எச்சரிக்கின்றனர்.

லாரி உரிமையாளர்கள் தரப்பில், மத்திய அரசு டீசல் விலையைக் கட்டுப்படுத்த வேண்டும், சுங்கக் கட்டணத்தை மறுபரிசீலனை செய்ய வேண்டும், உதிரி பாகங்கள் இறக்குமதி வரியைக் குறைக்க வேண்டும் எனப் பல்வேறு கோரிக்கைகளை முன்வைத்துள்ளனர். இந்தப் பிரச்னைக்கு நிரந்தரத் தீர்வு காணாவிட்டால், மாநிலப் போக்குவரத்துத் துறையில் பெரும் நெருக்கடி ஏற்படும் என்ற அச்சம் நிலவுகிறது.

இந்த உயர்வு முடிவு மாநிலம் முழுவதும் உள்ள லாரி உரிமையாளர்கள், டிரைவர்கள் மற்றும் வர்த்தக சங்கங்களுடன் கலந்தாலோசித்த பின்னர் எடுக்கப்பட்டுள்ளது. பொதுமக்களின் சிரமத்தைக் குறைக்க அரசு உரிய நடவடிக்கை எடுக்க வேண்டும் என்ற கோரிக்கை எழுந்துள்ளது.

இதையும் படிங்க: #Breaking விடிந்ததும் இடியாய் இறங்கிய செய்தி... பெட்ரோல், டீசல் விலை மீண்டும் உயர்வு...!!