நாடு முழுவதும் பலர் 5ஜி சிக்னல் இருந்தும் இணையம் மெதுவாக ஏற்றப்பட்டு சுழலும் நிலையை எதிர்கொள்கின்றனர். மொபைலில் 5ஜி அடையாளம் தெரிந்தாலும் வேகம் குறைவாக இருப்பதற்கு முக்கிய காரணம், மொபைல் டவர்களிலிருந்து வெளியேற்றப்படும் மின்காந்த கதிர்வீச்சின் அடர்த்தி குறைவாக இருந்ததுதான். இந்தப் பிரச்சினையை சரிசெய்ய மத்திய அரசு முக்கிய நடவடிக்கை எடுத்துள்ளது.

தொலைத்தொடர்பு துறை, 5ஜி பேஸ் டவர் ஸ்டேஷன்களுக்கான மின்காந்த புல (ஈஎம்எஃப்) வரம்பை தற்போதைய 5 வாட்ஸ்/சதுர மீட்டரிலிருந்து 10 வாட்ஸ்/சதுர மீட்டராக இரட்டிப்பாக்கியுள்ளது. இந்த மாற்றம் அடுத்த மாதம் முதல் அமலுக்கு வருகிறது. இது சர்வதேச தரநிலையான ஐசிஎன்ஐஆர்பி (ICNIRP) வழிகாட்டுதலுக்கு ஏற்ப அமைந்துள்ளது. 

ஐரோப்பிய ஒன்றிய நாடுகள், இங்கிலாந்து, ஆஸ்திரேலியா, ஜப்பான், தென் கொரியா, சிங்கப்பூர் உள்ளிட்ட சுமார் 137 நாடுகளில் இந்த அளவு பின்பற்றப்படுகிறது.இந்தியாவில் முன்பு இந்த வரம்பு மிகக் கடுமையாக 1 வாட்ஸ்/சதுர மீட்டராக இருந்தது. கடந்த ஆண்டு 5 வாட்ஸாக உயர்த்தப்பட்டது. இப்போது முழுமையாக சர்வதேச அளவான 10 வாட்ஸுக்கு கொண்டு வரப்பட்டுள்ளது. இதனால் டவரிலிருந்து சிக்னல் அதிக தூரம் சென்று அதிக பகுதிகளை உள்ளடக்கும். 

இதையும் படிங்க: மக்களுக்கு நிவாரணம்: குறைந்த விலையில் வெங்காயம் விற்பனை! மத்திய அரசு அதிரடி!!

ஒவ்வொரு டவரின் செயல்திறனும் மேம்படும். புதிய டவர்கள் அமைக்கும் தேவை குறையும். இதனால் செலவு குறைவுடன் நெட்வொர்க் தரம் உயரும்.5ஜி அலைவரிசை பயன்பாடும் இணையப் போக்குவரத்தும் தொடர்ந்து அதிகரித்து வரும் நிலையில், வாடிக்கையாளர்களுக்கு தடையற்ற சேவை வழங்குவதே இந்த முடிவின் நோக்கம். வோடஃபோன் ஐடியா (விஐ) தற்போது 5ஜி சேவைகளை விரிவுபடுத்தி வருகிறது. இந்த உயர் வரம்பு அதன் நெட்வொர்க்கை வேகமாகவும் திறமையாகவும் அமைக்க உதவும்.

ஏர்டெல் மற்றும் ஜியோ ஏற்கனவே பரவலான 5ஜி டவர்களைக் கொண்டுள்ளதால், தற்போதைய கட்டமைப்பை மேலும் வலுப்படுத்தி சிக்னல் வலிமையை அதிகரிக்க முடியும். கூடுதல் முதலீடு இல்லாமல் தரமான சேவை கிடைக்கும்.கதிர்வீச்சு அளவு உயர்வதால் மனிதர்கள் அல்லது பறவைகளுக்கு பாதிப்பு ஏற்படுமா என்ற கவலை தேவையற்றது.

உலக சுகாதார அமைப்பு மற்றும் ஐசிஎன்ஐஆர்பி ஆய்வுகளின்படி, பரிந்துரைக்கப்பட்ட வரம்புக்குள் உள்ள மின்காந்த புலங்களால் எந்தவித பாதகமான உடல்நலப் பாதிப்பும் ஏற்படுவதாக ஆதாரம் இல்லை. இந்தியாவில் கடுமையான கண்காணிப்பு மற்றும் தணிக்கை முறைகள் தொடர்ந்து பின்பற்றப்படும்.இந்த அரசாங்க முடிவு 5ஜி பயனாளர்களுக்கு நிவாரணம் அளிக்கும். நாடு முழுவதும் வேகமான, நிலையான இணைய அனுபவம் கிடைக்கும் என எதிர்பார்க்கப்படுகிறது.

இதையும் படிங்க: தெருநாய் தொல்லை: மத்திய அரசுக்கு சென்னை உயர்நீதிமன்றம் இறுதி எச்சரிக்கை!