சர்வதேச அளவில் இந்தியா மீது பிற நாடுகளைச் சேர்ந்த மக்களின் பார்வை எவ்வாறு உள்ளது என்பதை அறிய நடத்தப்பட்ட ஆய்வில், 45 சதவீதம் பேர் இந்தியாவுக்கு சாதகமான கருத்தை தெரிவித்துள்ளதாகவும், 41 சதவீதம் பேர் எதிர்மறையான கருத்தை பதிவு செய்துள்ளதாகவும் தெரியவந்துள்ளது. அமெரிக்காவைச் சேர்ந்த ‘பியூ’ ஆய்வு நிறுவனம் நடத்திய இந்த ஆய்வு, சர்வதேச அளவில் இந்தியாவின் மீதான பார்வை குறித்து பல்வேறு தகவல்களை வெளிப்படுத்தியுள்ளது.

இந்தியாவைப் பற்றிய பிற நாடுகளின் கருத்துகளை அறிய கடந்த பிப்ரவரி முதல் மே மாதம் வரை 36 நாடுகளில் 42 ஆயிரத்துக்கும் மேற்பட்டோரிடம் இந்த ஆய்வு நடத்தப்பட்டது. இதில் இந்தியா குறித்து நாடு வாரியாக மக்களின் கருத்துகளில் குறிப்பிடத்தக்க வேறுபாடுகள் இருப்பது தெரியவந்துள்ளது.

இந்தியாவின் அண்டை நாடான இலங்கையில் இந்தியாவுக்கு அதிக அளவில் ஆதரவு இருப்பது ஆய்வில் தெரியவந்துள்ளது. இலங்கையைச் சேர்ந்த 79 சதவீதம் பேர் இந்தியா குறித்து சாதகமான பார்வையை தெரிவித்துள்ளனர். இதற்கு அடுத்தபடியாக பிரிட்டன் மற்றும் கென்யாவில் தலா 71 சதவீதம் பேர் இந்தியாவுக்கு ஆதரவான கருத்தை பதிவு செய்துள்ளனர்.

இதையும் படிங்க: ரஷிய கச்சா எண்ணெய் இறக்குமதியில் இந்தியா புதிய உச்சம்: ஜூலையில் 50.8% அதிகரிப்பு!!

ஜெர்மனியில் 63 சதவீதம் பேரும், இத்தாலியில் 56 சதவீதம் பேரும், ஸ்வீடனில் 55 சதவீதம் பேரும் இந்தியா குறித்து நேர்மறையான கருத்தை தெரிவித்துள்ளனர். இதன் மூலம் ஐரோப்பாவின் சில முக்கிய நாடுகளிலும் இந்தியா குறித்து கணிசமான அளவில் சாதகமான பார்வை இருப்பது தெரியவந்துள்ளது.

அதே நேரத்தில், இந்தியாவின் அண்டை நாடுகளில் சிலவற்றில் நிலைமை மாறுபட்டுள்ளது. வங்கதேசத்தில் 42 சதவீதம் பேர் இந்தியா குறித்து சாதகமான கருத்தையும், 51 சதவீதம் பேர் எதிர்மறையான கருத்தையும் தெரிவித்துள்ளனர். பதவி நீக்கம் செய்யப்பட்ட முன்னாள் பிரதமர் ஷேக் ஹசீனாவுக்கு இந்தியா அடைக்கலம் அளித்திருப்பது உள்ளிட்ட காரணங்களால் வங்கதேசத்தில் இந்தியாவுக்கு எதிரான மனநிலை ஏற்பட்டிருக்கலாம் என ஆய்வு சுட்டிக்காட்டியுள்ளது.

பாகிஸ்தானில் இந்தியா மீதான எதிர்மறையான பார்வை மிகவும் அதிகமாக உள்ளது. அங்கு 91 சதவீதம் பேர் இந்தியா குறித்து எதிர்மறையான கருத்தை பதிவு செய்துள்ளனர்.

உலக வல்லரசாக கருதப்படும் அமெரிக்காவிலும் இந்தியா மீதான ஆதரவு கடந்த சில ஆண்டுகளுடன் ஒப்பிடும்போது குறைந்துள்ளது. அமெரிக்காவில் தற்போது 45 சதவீதம் பேர் இந்தியா குறித்து சாதகமான கருத்தை தெரிவித்துள்ளனர். இது 2023ஆம் ஆண்டில் 51 சதவீதமாக இருந்தது.

ஒட்டுமொத்தமாக 36 நாடுகளில் நடத்தப்பட்ட ஆய்வில், இந்தியா குறித்து 45 சதவீதம் பேர் சாதகமான பார்வையையும், 41 சதவீதம் பேர் எதிர்மறையான பார்வையையும் கொண்டிருப்பது தெரியவந்துள்ளது. சர்வதேச அளவில் இந்தியாவின் செல்வாக்கு வளர்ந்து வரும் நிலையில், சில நாடுகளில் எதிர்மறையான பார்வையும் தொடர்ந்து இருப்பதை இந்த ஆய்வு வெளிப்படுத்தியுள்ளது.

இதையும் படிங்க: “இனி பாகிஸ்தான் மீது கைவைத்தால் நாங்க இறங்கி அடிப்போம்...” - சவுதி, துருக்கி செயலால் இந்தியாவிற்கு ஆபத்தா?