அமெரிக்காவில் இந்திய வம்சாவளியை சேர்ந்த பெண் ஒருவர் சுட்டுக் கொல்லப்பட்ட சம்பவம் பெரும் அதிர்ச்சியை ஏற்படுத்தியுள்ளது. வர்ஜீனியா மாநிலத்தில் உள்ள பல்பொருள் அங்காடியில் பணியாற்றி வந்த அந்த பெண், கொள்ளை முயற்சியை தடுக்க முயன்றபோது துப்பாக்கிச்சூட்டில் உயிரிழந்ததாக போலீசார் தெரிவித்துள்ளனர்.

உயிரிழந்தவர் குஜராத் மாநிலத்தை சேர்ந்த மேக்னாபென் படேல் என அடையாளம் காணப்பட்டுள்ளார். இவர் கடந்த பத்து ஆண்டுகளாக அமெரிக்காவின் வர்ஜீனியாவில் உள்ள ஒரு பல்பொருள் அங்காடியில் பணிபுரிந்து வந்ததாக தகவல் வெளியாகியுள்ளது. குடும்பத்துடன் அமெரிக்காவில் வசித்து வந்த அவருக்கு கணவர் உபேந்திரபாய் படேல், மகள் நக்ஷி மற்றும் மகன் ஸ்மித் உள்ளனர்.

சம்பவம் நடந்த தினத்தில், மர்ம நபர் ஒருவர் பல்பொருள் அங்காடிக்குள் புகுந்து கொள்ளை முயற்சியில் ஈடுபட்டதாக கூறப்படுகிறது. அப்போது மேக்னாபென் படேல் தடுக்க முயன்றபோது, அந்த நபர் துப்பாக்கியால் சுட்டதாக முதற்கட்ட விசாரணையில் தெரியவந்துள்ளது. துப்பாக்கிச்சூட்டில் படுகாயமடைந்த அவரை உடனடியாக மருத்துவமனைக்கு கொண்டு சென்றாலும், சிகிச்சை பலனின்றி உயிரிழந்தார்.

இதையும் படிங்க: ஹாஸ்பிட்டல் கழிப்பறையில் குழந்தை பெற்ற இளம்பெண்! ஜன்னல் வழியே தூக்கி எறிந்த கொடூரம்! கேரளாவில் அதிர்ச்சி!

சம்பவம் குறித்து தகவல் கிடைத்தவுடன் உள்ளூர் போலீசார் சம்பவ இடத்திற்கு விரைந்து சென்று, அப்பகுதியை சுற்றிவளைத்து விசாரணை மேற்கொண்டனர். பின்னர் தாக்குதல் நடத்திய நபரை கைது செய்ததாகவும் போலீசார் தெரிவித்துள்ளனர்.

இந்த சம்பவம் தொடர்பாக வேறு ஏதேனும் பின்னணி காரணங்கள் உள்ளனவா, திட்டமிட்ட தாக்குதலா அல்லது கொள்ளை முயற்சியின் போது நடந்த சம்பவமா என்பது குறித்து போலீசார் தொடர்ந்து விசாரணை நடத்தி வருகின்றனர்.

அமெரிக்காவில் இந்திய வம்சாவளியினருக்கு எதிரான தாக்குதல்கள் குறித்து ஏற்கனவே கவலை நிலவி வரும் நிலையில், இந்த சம்பவம் மீண்டும் அதிர்ச்சியை ஏற்படுத்தியுள்ளது. சமூக வலைதளங்களிலும் மேக்னாபென் படேலுக்கு அஞ்சலி செய்திகள் குவிந்து வருகின்றன.

குடும்பத்திற்காக வெளிநாட்டில் கடுமையாக உழைத்த பெண் ஒருவர் துப்பாக்கிச்சூட்டில் உயிரிழந்த சம்பவம், இந்திய சமூகத்தினரிடையே சோகத்தை ஏற்படுத்தியுள்ளது.

இதையும் படிங்க: வாக்காளர் பட்டியல் சிறப்பு திருத்தம் சரியானதே! எஸ்.ஐ.ஆர் பணி திருப்தி! சுப்ரீம் கோர்ட் உத்தரவு!