இந்தியாவின் முன்னணி தேர்தல் வியூக நிபுணராகவும், ஜன் சுராஜ் கட்சியின் நிறுவனராகவும் உள்ள பிரசாந்த் கிஷோர், 2014 ஆம் ஆண்டு மக்களவைத் தேர்தலில் நரேந்திர மோடி தலைமையிலான பாஜக-வின் வெற்றிக்கு முக்கிய வியூகங்களை வகுத்து புகழ் பெற்றவர். பாஜக, திமுக, ஆம் ஆத்மி, ஒய்எஸ்ஆர் காங்கிரஸ், திரிணமூல் காங்கிரஸ் உள்ளிட்ட பல கட்சிகளுக்கு வெற்றிகரமாக தேர்தல் உத்திகளை அமைத்தவர். 

2021 தமிழ்நாடு சட்டமன்றத் தேர்தலில் திமுக-வின் வெற்றிக்கு அவரது வியூகங்கள் முக்கிய பங்கு வகித்தன. 2022 ஆம் ஆண்டு அக்டோபரில், பிரசாந்த் கிஷோர் பீகாரில் ஜன் சுராஜ் என்ற அரசியல் கட்சியைத் தொடங்கினார். மக்களுக்கு நேரடியாகப் பொறுப்பு கூறும் அரசியலை உருவாக்குவதே இக்கட்சியின் நோக்கம் என்று அவர் அறிவித்தார். 

இதையும் படிங்க: பீகார்ல வேலை இருக்கு! தவெக-வை கழட்டி விட்ட பிரசாந்த் கிஷோர்.. ஆனந்த், ஆதவ்வை நம்பியதால் சிக்கலில் விஜய்..

2024 பீகார் இடைத்தேர்தலில் ஜன் சுராஜ் கட்சி போட்டியிட்டு, நான்கு தொகுதிகளில் தோல்வியடைந்தாலும், 2025 சட்டமன்றத் தேர்தலில் வெற்றி பெறுவதற்கு தீவிரமாகப் பிரசாரம் செய்து வருகிறார். பீகாரில் மதுவிலக்கை நீக்குவது உள்ளிட்ட ஐந்து முக்கிய வாக்குறுதிகளை அவர் முன்வைத்துள்ளார்.

மேலும், பீகாரில் அரசுப் பணி தேர்வு வினாத்தாள் கசிவு சர்ச்சைக்கு எதிராக உண்ணாவிரதப் போராட்டத்தில் ஈடுபட்டு, ஜாமீனில் விடுவிக்கப்பட்டார். தமிழக வெற்றிக் கழகத்திற்கு (தவெக) தேர்தல் ஆலோசனைகள் வழங்கியவர், தற்போது பீகார் தேர்தல் காரணமாக தற்காலிகமாக அப்பணியிலிருந்து விலகியுள்ளார்.

இந்நிலையில் பீகார் மாநிலம் ஆரா மாவட்டத்தில் நடைபெற்ற ரோடு ஷோவின்போது, பிரசாந்த் கிஷோர் காயமடைந்தார். இந்த சம்பவம் “பத்லாவ் யாத்ரா” பிரசாரத்தின் ஒரு பகுதியாக ஆராவில் உள்ள வீர் குன்வர் சிங் மைதானத்தில் நடந்த பொதுக்கூட்டத்தின்போது நிகழ்ந்தது. 

கூட்டத்தில் பங்கேற்க வந்திருந்த பிரசாந்த் கிஷோர், தனது வாகனத்திலிருந்து இறங்கி ஆதரவாளர்களை சந்தித்த போது, எதிர்பாராதவிதமாக ஒரு வாகனம் மோதியதில் அவருக்கு விலா எலும்பில் (ரிப்கேஜ்) லேசான காயம் ஏற்பட்டது. இதனால் அவரால் இயல்பாக நடமாட முடியவில்லை. மேலும் கட்சியினர் அவரை மேடைக்கு சிரமப்பட்டு அழைத்து வந்தனர்.

காயத்தைத் தொடர்ந்து, பிரசாந்த் கிஷோர் மருத்துவ சிகிச்சைக்காக பாட்னாவுக்கு அழைத்துச் செல்லப்பட்டார். அவரது உடல்நிலை தற்போது நிலையாக இருப்பதாக ஜன் சுராஜ் கட்சியின் அதிகாரப்பூர்வ அறிக்கை தெரிவித்துள்ளது. இந்த ஆண்டு இறுதியில் நடைபெறவுள்ள பீகார் சட்டமன்றத் தேர்தலுக்காக தீவிர பிரசாரத்தில் ஈடுபட்டு வரும் பிரசாந்த் கிஷோர், தனது கட்சியை வலுப்படுத்துவதற்காக மாநிலம் முழுவதும் பயணித்து வருகிறார். இந்த சம்பவம் அவரது ஆதரவாளர்கள் மத்தியில் பரபரப்பை ஏற்படுத்தியுள்ளது.

பிரசாந்த் கிஷோரின் கட்சி, பீகாரில் மதுவிலக்கு நீக்கம், கல்வி மற்றும் வேலைவாய்ப்பு மேம்பாடு போன்ற வாக்குறுதிகளை முன்வைத்து பிரசாரம் செய்து வருகிறது என்பது குறிப்பிடத்தக்கது. 

இதையும் படிங்க: அவ்ளோ அசிங்கமா பேசிட்டு ஓட்டுக்காக மட்டும் ஓடி வருவீங்களா? ராகுல்காந்திக்கு மீண்டும் சிக்கல்.. பிரசாந்த் கிஷோர் ஆவேசம்..