பெங்களூரு: கர்நாடக காங்கிரஸில் முதல்வர் பதவி இழுபறி போர் உச்சம் அடைந்த நிலையில், முதல்வர் சித்தராமையா தனது துணை சிவகுமாரை காலை உணவுக்கு அழைத்து, “எந்த மனக்கசப்பும் இல்லை” என்று உறுதி அளித்து சமாதானம் செய்தார். 

கட்சி மேலிடத்தின் அறிவுரைப்படி நடந்த இந்த ‘இட்லி சாம்பார்’ சந்திப்புக்குப் பின், இருவரும் செய்தியாளர்களைச் சந்தித்து கூட்டாக பேட்டி அளித்தனர். ஆனால், பாஜக முன்னாள் முதல்வர் பசவராஜ் பொம்மை, “இருவரும் இறங்கவில்லை... மூன்றாவது நபர் முதல்வராகலாம்” என்று கூறி சூட்டை ஏற்படுத்தியுள்ளார். இந்த சமாதானம் தற்காலிகமானதா என்பது இப்போதைய கேள்வி.

கர்நாடக காங்கிரஸ் ஆட்சி அமைத்து இரண்டரை ஆண்டுகள் முடிந்ததும், சிவகுமார் ஆதரவாளர்கள் “2.5 வருட ஒப்பந்தம் நிறைவேற்று” என்று போர்க்கொடி தூக்கினர். 2023 தேர்தலில் சிவகுமார் சுற்றிச் சுழன்று வெற்றிக்கு வித்திட்டாலும், சித்தராமையா முதல்வரானார். 

இதையும் படிங்க: நாத்திக போர்வையில் இந்து பக்தர்களை பழிவாங்காதீங்க!! தமிழக, கேரள அரசுக்கு நயினார் கண்டனம்!

சமூக ஊடகங்களில் சித்து-சிவா ஆதரவாளர்களிடையே நேரடி வார்த்தைப் போரும் வெடித்தது. இருவரும் டில்லி பறந்து மேலிடத்தை சந்தித்தனர். சித்தராமையா “பீகார் தேர்தல் தோல்வி ஆலோசனை” என்று சொல்லி சென்றார், சிவகுமார் “விவசாயிகள் பிரச்சினை” என்று கூறி மத்திய அமைச்சர்களை சந்தித்தார்.

இதற்கிடையே, அமைச்சர் ஜி. பரமேஸ்வரா “மக்கள் என்னை முதல்வராக்க விரும்புகிறார்கள்” என்று குண்டை தூக்கியது சித்து-சிவா இருவரையும் அதிர்ச்சிக்கு உள்ளாக்கியது. இருவரும் ஓபிசி சமூகத்தைச் சேர்ந்தவர்கள், பரமேஸ்வரா தலித் சமூகத்தைச் சேர்ந்தவர். 

“இருவரும் அடித்துக்கொண்டால், புதிய எதிரி முளைக்கிறாரே” என்று அவர்கள் திகைத்தனர். பொம்மை, “சித்து-சிவா இருவரும் தங்கள் நிலையில் இறங்கவில்லை. கட்சித் தலைமை மூன்றாவது நபரை முதல்வராக்கும். விரைவில் கருப்பு குதிரை வரலாம்” என்று கூறி சூட்டை ஏற்படுத்தினார்.

இந்தப் பரபரப்புக்கு மத்தியில், காங்கிரஸ் மேலிடத் தலைவர் கே.சி. வேணுகோபால் அறிவுரைப்படி, சித்தராமையா சிவகுமாரை தனது காவேரி இல்லத்தில் காலை உணவுக்கு அழைத்தார். ஐட்லி-சாம்பார் சாப்பிட்ட பின், செய்தியாளர்களைச் சந்தித்த சித்தராமையா, “எங்கள் இருவருக்கும் எந்த மனக்கசப்பும் இல்லை. சிலர் தேவையற்ற வதந்திகளை கிளப்பிவிட்டனர். 

மேலிட உத்தரவுப்படி பேசினோம். உள்ளாட்சித் தேர்தல், 2028 சட்டமன்றத் தேர்தல் வியூகம் குறித்து ஆலோசித்தோம். 2023-ல் வென்றது போல் 2028-லும் வெல்வோம். பாஜக-ஜேடிஎஸ் வதந்திகளைப் பரப்புவதே அவர்களின் வேலை. நம்பிக்கையின்மை தீர்மானத்தில் வெல்லும் அளவுக்கு அவர்களுக்கு பலம் இல்லை. நாங்கள் இணைந்து செயல்படுவோம்” என்றார்.

சிவகுமாரும், “கட்சித் தலைமை முடிவுக்கு கட்டுப்படுப்போம்” என்று சித்தராமையாவைப் போலவே கூறினார். இருவரும் “எந்த வார்த்தைப் போரும் இல்லை” என்று உறுதிப்படுத்தினாலும், பரமேஸ்வரா போன்ற மூன்றாவது வேட்பாளர்கள் பெயர்கள் பேசப்படுவதால் உள் மோதல் முழுமையாக அடங்கவில்லை. காங்கிரஸ் மேலிடம் இன்னும் முடிவெடுக்கவில்லை என்றாலும், இந்த சமாதானம் தற்காலிகமானது என்று அரசியல் வட்டாரங்கள் கூறுகின்றன.

இதையும் படிங்க: அப்போ சென்னை இல்லையா?... டிட்வா புயலின் டார்க்கெட் மாவட்டம் இதுதான்?... அமைச்சர் சொன்ன அதிர்ச்சி தகவல்...!