கரூர் சட்டமன்றத் தொகுதியின் உறுப்பினரும், முன்னாள் அமைச்சருமான வி. செந்தில் பாலாஜி, கரூர் கூட்ட நெரிசல் வழக்கு தொடர்பான விசாரணைக்காக இன்று மாலை சென்னையில் இருந்து டெல்லிக்குப் புறப்பட்டுச் சென்றார். கடந்த ஆண்டு செப்டம்பர் 27-ஆம் தேதி கரூரில் நடைபெற்ற தமிழக வெற்றிக் கழகத்தின் (தவெக) மாநாட்டின் போது ஏற்பட்ட கூட்ட நெரிசலில் 41 பேர் உயிரிழந்த சம்பவம் தொடர்பாக சிபிஐ (CBI) விசாரணைக்கு ஆஜராக அவருக்கு சம்மன் அனுப்பப்பட்டிருந்தது.

சிபிஐ தலைமையகத்தில் நாளை (மார்ச் 17, 2026) காலை 10:30 மணியளவில் ஆஜராகி விளக்கம் அளிக்குமாறு செந்தில் பாலாஜிக்கு உத்தரவிடப்பட்டுள்ளது. உச்ச நீதிமன்ற உத்தரவின் பேரில் இந்த வழக்கை சிபிஐ விசாரித்து வருகிறது. ஏற்கனவே கடந்த ஞாயிற்றுக்கிழமை (மார்ச் 15), தவெக தலைவர் நடிகர் விஜய்யிடம் டெல்லியில் வைத்து சுமார் 7 மணி நேரம் சிபிஐ அதிகாரிகள் தீவிர விசாரணை நடத்தினர்.

கூட்ட நெரிசல் ஏற்பட்ட சில நிமிடங்களிலேயே செந்தில் பாலாஜி சம்பவ இடத்திற்கு வந்தது எப்படி? தவெக தரப்பில் சுமத்தப்பட்ட திட்டமிட்ட சதி என்ற குற்றச்சாட்டுகளில் உண்மை இருக்கிறதா? உள்ளூர் நிர்வாகம் மற்றும் காவல்துறையின் பாதுகாப்பு ஏற்பாடுகளில் ஏதேனும் குறுக்கீடுகள் இருந்ததா? போன்ற கோணங்களில் அவரிடம் கேள்விகள் கேட்கப்பட வாய்ப்புள்ளதாகத் தெரிகிறது.

இதையும் படிங்க: கரூரில் ரயில் விபத்து! கல்லூரி பேருந்து மீது சரக்கு ரயில் மோதி 18 மாணவர்கள் காயம்!

தேர்தல் தேதி அறிவிக்கப்பட்டுள்ள நிலையில், தவெக தலைவர் விஜய் மற்றும் திமுக எம்எல்ஏ செந்தில் பாலாஜி ஆகிய இருவரையும் ஒரே வாரத்தில் சிபிஐ விசாரணைக்கு அழைத்து இருப்பது தமிழக அரசியல் களத்தில் பெரும் விவாதங்களை ஏற்படுத்தியுள்ளது.

முன்னதாக, தனக்கு சிபிஐ சம்மன் அனுப்பியதை உறுதி செய்த செந்தில் பாலாஜி, விசாரணைக்கு முழு ஒத்துழைப்பு அளிப்பேன்; சிபிஐ-யின் அனைத்து கேள்விகளுக்கும் தகுந்த விளக்கம் அளிக்கப்படும் என்று தனது எக்ஸ் (X) தளத்தில் பதிவிட்டிருந்தது குறிப்பிடத்தக்கது.

இதையும் படிங்க: சிபிஐ விசாரிக்க வேண்டிய முதல் நபர் செந்தில் பாலாஜி! விஜய்க்கு சம்மன் அனுப்பியதற்கு நிர்மல் குமார் கண்டனம்!