கொச்சியில் உள்ள நட்சத்திர ஓட்டல் ஒன்றில் போதைப்பொருள் பயன்பாடு நடைபெற்றதாக ரகசியத் தகவல் கிடைத்ததையடுத்து, கொச்சி மாநகர போலீஸ் அதிரடி சோதனை நடத்தி பெரும் போதைப்பொருள் பறிமுதல் செய்துள்ளது. இந்தச் சம்பவம் கொச்சியில் பெரும் பரபரப்பை ஏற்படுத்தியுள்ளது.

கடவந்தரா பகுதியில் உள்ள அந்த நட்சத்திர ஓட்டலில் இரவு நடைபெற்ற ஒரு தனியார் நிகழ்ச்சியில் போதைப்பொருள் பயன்படுத்தப்படுவதாக கொச்சி மாநகர போலீஸ் கமிஷனருக்கு ரகசியத் தகவல் கிடைத்தது. உடனடியாக கடவந்தரா போலீஸ் இன்ஸ்பெக்டர் பிஜு, சப்-இன்ஸ்பெக்டர் ராஜீவ் மற்றும் போலீசார் குழு அந்த ஓட்டலை சுற்றி வளைத்து சோதனை நடத்தினர்.

சோதனையின்போது கொக்கைன், கஞ்சா, மெத்தபெட்டமைன் உள்ளிட்ட உயர்தர போதைப்பொருட்கள் பயன்படுத்தப்பட்டது கண்டுபிடிக்கப்பட்டது. சிலரிடம் இருந்து 10 கிராம் கஞ்சா, மெத்தபெட்டமைன் மற்றும் போதை மாத்திரைகள் பறிமுதல் செய்யப்பட்டன. விசாரணையில், நிகழ்ச்சிக்கு வெளியில் இருந்து போதைப்பொருட்களை கொண்டு வந்து பயன்படுத்தியது தெரியவந்தது.

இதையும் படிங்க: 30 பெண்களை காதல் வலையில் வீழ்த்திய கயவன்!! 3 ஆண்டுகள் தொடர்ந்த பாலியல் கொடூரம்!! போதையில் உளறியதால் சிக்கினான்!

இந்தச் சம்பவம் தொடர்பாக திருவனந்தபுரம் சங்கமுகம் பகுதியைச் சேர்ந்த நிகழ்ச்சி ஏற்பாட்டாளர் ஷாஜி பெர்னாண்டோ, கலூர் பகுதியைச் சேர்ந்த ஆஸ்டின் ஜோஸ், வக்கீல் ரோஹித் நாயர், கொடுங்கல்லூர் ஜினோ முரளி, ஆலப்புழா அக்பர் ஷா, பல் மருத்துவர் பென்சி ராவுத்தர், கொல்லம் சையத் அலி பாத்திமா மற்றும் கல்லூரி மாணவர் அமல் ரவுப் உள்ளிட்ட 8 பேரை போலீசார் கைது செய்துள்ளனர். இதில் மூன்று பெண்களும் அடங்குவர்.

இந்த நிகழ்ச்சிக்கு போதைப்பொருட்களை சப்ளை செய்த எர்ணாகுளம் ஷோன் என்பவர் போலீசார் வருவதை அறிந்து தப்பி ஓடி தலைமறைவாகிவிட்டார். அவரைத் தேடும் பணி தீவிரமாக நடைபெற்று வருகிறது. கடந்த சில நாட்களுக்கு முன்பு அதே ஓட்டலில் நடைபெற்ற மற்றொரு நிகழ்ச்சியிலும் போதைப்பொருள் பயன்படுத்தப்பட்டதா என்பது குறித்தும் போலீசார் விசாரணை நடத்தி வருகின்றனர்.

இந்த அதிரடி சோதனை மற்றும் கைது சம்பவம் கொச்சி முழுவதும் பெரும் பரபரப்பை ஏற்படுத்தியுள்ளது. நட்சத்திர ஓட்டல்களில் போதைப்பொருள் பயன்பாடு நடைபெறுவது குறித்து கடும் கண்டனங்கள் எழுந்துள்ளன. போலீசார் தொடர்ந்து தீவிர விசாரணை நடத்தி வருகின்றனர்.

இதையும் படிங்க: 10 முறை தொடர் முதல்வர்?! ராஜ்யசபா எம்.பி தேர்தல்!! எம்.எல்.சி பதவியை ராஜினாமா செய்தார் நிதிஷ்குமார்!