பாகிஸ்தானை தளமாகக் கொண்டு செயல்படும் லஷ்கர்-இ-தொய்பா (LeT) பயங்கரவாத அமைப்பு, இந்தியாவுக்கு மீண்டும் அதிர்ச்சி அளிக்கும் மிரட்டலை விடுத்துள்ளது. 2008 மும்பை தாக்குதல் போன்று, கடல் வழியாக ஊடுருவி பெரிய அளவிலான தாக்குதல் நடத்தப் போவதாக அவர்கள் பகிரங்கமாக அறிவித்துள்ளனர்.

இந்த அமைப்பின் துணைத் தலைவர் சைபுல்லா கசூரி, சமீபத்தில் வெளியிட்ட வீடியோவில், "2025-ல் வான்வெளியில் பாகிஸ்தான் ஆதிக்கம் செலுத்தியது. 2026-ல் கடலில் நாங்கள் ஆதிக்கம் செலுத்துவோம். நிலம், வானம், கடல் – எல்லா இடங்களிலும் எதிரிகளை அழிப்போம்" என்று மிரட்டியுள்ளார். மேலும், "இந்தியா நீர் பயங்கரவாதத்தில் ஈடுபட்டுள்ளது. அதற்கும் தக்க பதிலடி தருவோம்" என்றும் கூறியுள்ளார்.

இந்த மிரட்டலுக்கு பின்னணி என்ன? கடந்த ஆண்டு (2025) ஏப்ரல் 22-ஆம் தேதி ஜம்மு-காஷ்மீரின் பஹல்காமில் நடந்த பயங்கரவாத தாக்குதலுக்கு லஷ்கர்-இ-தொய்பா மூளையாக செயல்பட்டதாகக் கூறப்படுகிறது.

இதையும் படிங்க: பாகிஸ்தானில் வெடித்து சிதறிய மசூதி! பழிதீர்க்க டில்லியில் குண்டு வெடிப்பு! இந்தியாவிற்குள் புகுந்த லஷ்கர்-இ-தொய்பா பயங்கரவாதிகள்!!

இதற்கு பதிலடியாக இந்திய ராணுவம் 'ஆப்ரேஷன் சிந்தூர்' என்ற பெயரில் பாகிஸ்தானில் உள்ள லஷ்கர் முகாம்கள் உட்பட பல உள்கட்டமைப்புகளை அழித்தது. முரித்கே, பஹவல்பூர் போன்ற இடங்களில் அவர்களின் தலைமையகங்கள் முற்றிலும் சேதமடைந்தன.

இதனால் ஆத்திரமடைந்த சைபுல்லா கசூரி, இப்போது புதிய மிரட்டலை விடுத்துள்ளார். பயங்கரவாதிகளை உற்சாகப்படுத்தவும், புதிய ஆட்களை சேர்க்கவும் இந்த வீடியோ வெளியிடப்பட்டுள்ளதாக பாதுகாப்பு வட்டாரங்கள் தெரிவிக்கின்றன.

இந்த மிரட்டலால், குஜராத் முதல் கேரளா வரை அரபிக்கடல் பகுதியில் கடற்படை கண்காணிப்பு மிகுந்து பலப்படுத்தப்பட்டுள்ளது. கடல்வழி ஊடுருவல் தடுப்பு நடவடிக்கைகள் தீவிரப்படுத்தப்பட்டுள்ளன. இந்திய கடற்படை, கோஸ்ட் கார்டு, உளவுத்துறை அமைப்புகள் அனைத்தும் உஷார்படுத்தப்பட்டுள்ளன.

2008 மும்பை தாக்குதலில் 166 பேர் உயிரிழந்தனர். அத்தகைய கொடூரம் மீண்டும் நிகழாமல் தடுக்க, நமது பாதுகாப்பு படைகள் தயார் நிலையில் உள்ளன.
 

இதையும் படிங்க: பாகிஸ்தானை பதற வைக்கும் சம்பவம்! பயம் காட்டும் மோடி! பிரான்ஸ் அதிபருடன் இன்று சந்திப்பு! பின்னணியில் முக்கிய ப்ளான்!