சென்னை: புலி திரைப்படத்துக்காக பெற்ற ₹15 கோடியை வருமான வரி கணக்கில் காட்டவில்லை என்பது தொடர்பான வழக்கில் முதல்வர் விஜய் மீது குற்றவழக்கு பதிவு செய்யக் கோரிய மனுவை சென்னை உயர்நீதிமன்றம் தள்ளுபடி செய்தது. கொடுங்கையூரைச் சேர்ந்த ராஜ்குமார் என்பவர் தாக்கல் செய்திருந்த இந்த மனுவை அவர் தானே வாபஸ் பெற்றதையடுத்து நீதிமன்றம் தள்ளுபடி செய்துள்ளது.

நடிகர் விஜய் 2015-2016 நிதியாண்டில் தனது வருமானத்தை ₹35 கோடியே 42 லட்சமாக காட்டியிருந்தார். ஆனால் 2015-ம் ஆண்டு வருமான வரித்துறை அதிகாரிகள் அவரது வீடு மற்றும் அலுவலகத்தில் சோதனை நடத்தியபோது பறிமுதல் செய்யப்பட்ட ஆவணங்களின் அடிப்படையில், புலி படத்துக்காக பெற்ற ₹15 கோடி வருமானம் கணக்கில் சேர்க்கப்படவில்லை என வருமான வரித்துறை கண்டறிந்தது. இதனால் 2022-ம் ஆண்டு ஜூன் மாதம் ₹1.50 கோடி அபராதம் விதித்து உத்தரவு பிறப்பிக்கப்பட்டது.

இந்த அபராத உத்தரவை எதிர்த்து விஜய் சென்னை உயர்நீதிமன்றத்தில் வழக்கு தொடர்ந்தார். வழக்கை விசாரித்த நீதிபதி செந்தில்குமார் ராமமூர்த்தி, வருமான வரித்துறை விதித்த அபராத உத்தரவில் எந்த சட்ட விதிமீறலும் இல்லை எனக் கூறி, விஜய் தொடர்ந்த வழக்கை தள்ளுபடி செய்தார். அபராதம் விதிப்பதில் காலதாமதம் ஏதும் இல்லை என்றும் நீதிபதி தீர்ப்பில் தெளிவுபடுத்தினார்.

இதையும் படிங்க: அரசு நிறுவனங்களில் முதலீடு செய்த கோயில் நிதி!! பாதுகாப்பாக இருக்கும் என ஹைகோர்ட்டில் அரசு உத்தரவாதம்!

இந்நிலையில், வருமான வரி விசாரணையை அடிப்படையாகக் கொண்டு முதல்வர் விஜய் மீது மோசடி உள்ளிட்ட பிரிவுகளின் கீழ் குற்றவழக்கு பதிவு செய்ய வேண்டும் என ராஜ்குமார் தாக்கல் செய்த மனு நீதிமன்றத்தில் விசாரணைக்கு வந்தது. ஆனால் மனுதாரர் தானே மனுவை வாபஸ் பெற்றதால், நீதிமன்றம் அதை தள்ளுபடி செய்தது.

இந்தத் தீர்ப்பு தமிழக அரசியல் மற்றும் சினிமா வட்டாரத்தில் பெரும் கவனத்தை ஈர்த்துள்ளது. வருமான வரி வழக்கு தொடர்பான சட்டப் போராட்டம் இப்போது முடிவுக்கு வந்துள்ள நிலையில், முதல்வர் விஜய் தரப்பில் அடுத்தகட்ட நடவடிக்கை குறித்து ஆலோசனை நடைபெறும் என எதிர்பார்க்கப்படுகிறது.

இதையும் படிங்க: ஆன்லைன் ரம்மி விளையாட்டால் நற்பெயருக்கு களங்கம் ஏற்படும்! சொத்துக்களை இழக்க நேரிடும்! ஹைகோர்ட் எச்சரிக்கை!