இந்தியாவில் அனுமதிக்கப்பட்ட எய்ம்ஸ் மருத்துவமனைகளின் தற்போதைய நிலை குறித்து மக்களவையில் எழுப்பப்பட்ட கேள்விக்கு மத்திய அரசு இந்தப் பதிலளித்துள்ளது. மக்களவையில் உறுப்பினர்கள் சிலர், நாடு முழுவதும் அறிவிக்கப்பட்ட எய்ம்ஸ் மருத்துவமனைகளின் செயல்பாடுகள் மற்றும் கட்டுமான நிலவரங்கள் குறித்து கேள்வி எழுப்பியிருந்தனர். இதற்குப் பதிலளித்த மத்திய சுகாதார மற்றும் குடும்ப நலத்துறை இணை அமைச்சர் திரு. பிரதாப்ராவ் ஜாதவ், இந்தியாவில் இதுவரை மொத்தம் 22 எய்ம்ஸ் மருத்துவமனைகளுக்கு அனுமதி வழங்கப்பட்டுள்ளதாகக் குறிப்பிட்டார்.

அனுமதிக்கப்பட்ட 22 நிறுவனங்களில் 18 எய்ம்ஸ் மருத்துவமனைகள் தற்போது முழுமையாகச் செயல்பட்டு வருகின்றன. அங்கு நோயாளிகளுக்கான சிகிச்சைகள் மற்றும் மருத்துவக் கல்விப் பணிகள் தடையின்றி நடைபெறுகின்றன.

தமிழகத்தின் மதுரை எய்ம்ஸ் மருத்துவமனையைப் பொறுத்தவரை, அது இன்னும் கட்டுமானத்தின் பல்வேறு நிலைகளில்தான் (Under Construction) உள்ளது. ஜப்பான் பன்னாட்டு கூட்டுறவு முகமை (JICA) நிதியுதவியுடன் நடைபெற்று வரும் இந்தப் பணிகள் இன்னும் முழுமையடையவில்லை என்பது உறுதி செய்யப்பட்டுள்ளது.

இதையும் படிங்க: டெல்லியில் பாஜக மேலிடம் ஆலோசனை! அண்ணாமலை, எச். ராஜாவிற்கு பதில் புதிய பொறுப்பாளர்கள் நியமனம்!

மதுரையைப் போலவே ஹரியானாவின் ரேவாரி மற்றும் மணிப்பூரில் உள்ள எய்ம்ஸ் மருத்துவமனைகளும் கட்டுமான நிலையில் உள்ளன. பீகாரின் தர்பங்காவில் அமையவுள்ள எய்ம்ஸ் மருத்துவமனைக்குத் தேவையான நிலம் கையகப்படுத்துதல் மற்றும் பூர்வாங்கப் பணிகள் மட்டுமே தற்போது நடைபெற்று வருகின்றன.

மதுரை எய்ம்ஸ் அடிக்கல் நாட்டப்பட்டுப் பல ஆண்டுகள் கடந்த பின்னரும், இன்னும் கட்டுமானப் பணிகள் முடிவடையவில்லை என்பது தமிழக அரசியல் களத்தில் பெரும் விவாதத்தைக் கிளப்பியுள்ளது. குறிப்பாக, வரும் சட்டமன்றத் தேர்தலை முன்னிட்டு இந்த விவகாரத்தை எதிர்க்கட்சிகள் கையில் எடுக்கக்கூடும் என எதிர்பார்க்கப்படுகிறது.

இதையும் படிங்க: குடியரசு தின பாதுகாப்பு: ரயில் நிலையங்களில் 3 அடுக்கு பாதுகாப்பு வளையம்! 2,500 போலீசார் தீவிர கண்காணிப்பு!