மதுராந்தகம் சட்டமன்றத் தொகுதி இடைத்தேர்தல் வாக்கு எண்ணிக்கை இன்று காலை தொடங்கியது முதலே விறுவிறுப்பாக நடைபெற்று வருகிறது. செங்கல்பட்டு மாவட்டத்தில் அமைந்துள்ள இந்த தொகுதியில் கடந்த அக்டோபர் 6ஆம் தேதி நடைபெற்ற வாக்குப்பதிவில் 86.26 சதவீத வாக்குகள் பதிவாகியிருந்தன. மொத்தம் 27 வேட்பாளர்கள் களமிறங்கிய இந்தப் போட்டியில் முக்கியமாக தமிழக வெற்றிக் கழகத்தின் மரகதம் குமரவேல், திமுகவின் பரந்தாமன் மற்றும் அதிமுகவின் கனிதா சம்பத் ஆகியோர் முன்னணியில் போட்டியிட்டு வருகின்றனர்.

இந்த இடைத்தேர்தல் ஏற்படக் காரணம், கடந்த 2026 சட்டமன்றப் பொதுத்தேர்தலில் அதிமுக சார்பில் வெற்றி பெற்று மதுராந்தகத்தைப் பிரதிநிதித்துவப்படுத்திய மரகதம் குமரவேல் தனது எம்எல்ஏ பதவியை ராஜினாமா செய்து தமிழக வெற்றிக் கழகத்தில் இணைந்ததே ஆகும். அதன்பிறகு அதே தொகுதியில் தவெக சார்பில் அவர் மீண்டும் போட்டியிட அனுமதிக்கப்பட்டார். அதிமுக தனது வேட்பாளராக கனிதா சம்பத்தை நிறுத்தியது. திமுக பரந்தாமனைக் களமிறக்கியது.வாக்கு எண்ணிக்கை தொடங்கியதிலிருந்தே மரகதம் குமரவேல் தொடர்ந்து முன்னிலையில் இருந்து வருகிறார்.

தபால் வாக்குகளிலேயே அவர் முன்னிலை பெற்றார். அடுத்தடுத்த சுற்றுகளிலும் அவரது முன்னிலை தொடர்ந்தது. ஏழாவது சுற்று முடிந்த நிலையில் மரகதம் குமரவேல் சுமார் 30 ஆயிரம் வாக்குகளுக்கு மேல் பெற்று முதலிடத்தில் இருந்தார். இரண்டாம் இடத்தில் திமுகவின் பரந்தாமன் இருந்தார். அதிமுகவின் கனிதா சம்பத் மூன்றாம் இடத்தில் பின்னடைவு சந்தித்து வருகிறார். வாக்கு வித்தியாசம் ஆயிரக்கணக்கில் இருந்ததால் மரகதத்தின் முன்னிலை உறுதியாகத் தெரிந்தது.வாக்கு எண்ணிக்கை மையத்தில் பாதுகாப்பு ஏற்பாடுகள் கடுமையாக மேற்கொள்ளப்பட்டன. மூன்று அடுக்கு பாதுகாப்பு வளையம் அமைக்கப்பட்டு காவல்துறையினர் கண்காணித்தனர்.

இதையும் படிங்க: 20 நாளில் ராஜினாமா செய்த தவெக வேட்பாளரை தோற்கடியுங்கள்! மதுராந்தகத்தில் பெ.சண்முகம் ஆவேசம்!

மதுராந்தகத்தில் அதிமுகவினர் வாக்குவாதம் செய்த நிலையில் வாக்கி எண்ணிக்கை நிறுத்தப்பட்டது. கட்டுப்பாட்டு கருவி வேலை செய்யவில்லை என்று கூறி அதிமுகவினர் தேர்தல் அலுவலர்களிடம் வாக்குவாதம் செய்தனர். இதன் காரணமாக உடனடியாக வாக்கு எண்ணிக்கை நிறுத்தப்பட்டது. அதிமுகவினரின் வாக்குவாதத்தால் தற்காலிகமாக நிறுத்தப்பட்ட வாக்கு எண்ணிக்கை மீண்டும் தொடங்கியது. இதனால் சற்று பரபரப்பான சூழ்நிலை ஏற்பட்டது.

இதையும் படிங்க: தாராபுரத்தில் தலைக்கீழ் திருப்பம்..! மீண்டும் தவெக முன்னிலை..! விறுவிறு வாக்கு எண்ணிக்கை..!!