மதுராந்தகம் தொகுதியில் நடைபெறும் இடைத்தேர்தலில் மதசார்பற்ற சமூக நீதி வெற்றிக் கூட்டணி சார்பில் தமிழக வெற்றிக் கழக (தவெக) வேட்பாளராக மரகதம் குமரவேல் போட்டியிடுகிறார். அவருக்கு ஆதரவாக அமைச்சர்கள், சட்டமன்ற உறுப்பினர்கள், கூட்டணிக் கட்சித் தலைவர்கள் மற்றும் த.வெ.க. தொண்டர்கள் தீவிரமாக பிரசாரம் செய்து வருகின்றனர்.

கடந்த 25 ஆம் தேதி நடைபெற்ற தேர்தல் பிரசாரக் கூட்டத்தில் த.வெ.க. தலைவரும் முதலமைச்சருமான விஜய் நேரடியாகப் பங்கேற்று மரகதம் குமரவேலை ஆதரித்து உரையாற்றினார். இந்நிலையில் இன்று மாலை மதுராந்தகம் ஹைவே ஓட்டல் அருகே கூட்டணிக் கட்சித் தலைவர்கள் பங்கேற்கும் மாபெரும் பொதுக்கூட்டம் நடைபெறுகிறது. 

அதில் தவெக பொதுச் செயலாளரும் அமைச்சருமான என். ஆனந்த், அமைச்சர்கள் ஆதவ் அர்ஜுனா, ராஜ்மோகன், ராஜ்குமார் ஆகியோருடன் தமிழக காங்கிரஸ் தலைவர் மாணிக்கம் தாகூர், விடுதலைச் சிறுத்தைகள் கட்சித் தலைவர் தொல். திருமாவளவன், மதிமுக பொதுச் செயலாளர் வைகோ, இந்திய யூனியன் முஸ்லிம் லீக் தலைவர் காதர் மொய்தீன், தமிழ்நாடு விவசாயிகள்-தொழிலாளர் கட்சித் தலைவர் பொன்குமார் உள்ளிட்டோர் கலந்துகொள்கின்றனர். 

இதையும் படிங்க: மக்கள் ஓட ஓட விரட்டுகிறார்கள்; துரோகத்தின் அடையாளம் நீங்கள்: மதுராந்தகத்தில் பிரேமலதா விஜயகாந்த் ஆவேசம்!

இந்தப் பின்னணியில், நாளை மதுராந்தகம் தொகுதிக்கு இரண்டாவது முறையாக விஜய் வருகிறார். பிற்பகல் மாமண்டூரில் இருந்து பிரசாரத்தைத் தொடங்கும் அவர், கிராமம் கிராமமாகச் சென்று மக்களை நேரடியாகச் சந்தித்து விசில் சின்னத்திற்கு வாக்கு சேகரிக்கிறார். இந்தப் பிரமாண்டமான ரோடுஷோ சரவம்பாக்கத்தில் நிறைவுபெறும்.

முதலில் மேல்மருவத்தூர் ஆதிபராசக்தி கோவிலில் முதலமைச்சர் விஜய் சாமி தரிசனம் செய்ய உள்ளதாகவும் பின்னர் பங்காரு அடிகளார் நினைவிடத்திற்கு செல்ல இருப்பதாக கூறப்படுகிறது. அதனை தொடர்ந்து மதுராந்தகம் தொகுதியில் சுமார் 45 கி.மீ. தூரம் முதலமைச்சர் விஜய் ரோடு ஷோ செல்ல திட்டமிட்டிருப்பதாக தகவல் வெளியாகியுள்ளது. நாளை மாலை 4 மணி முதல் இரவு 9 மணி வரை விஜய் ரோடு ஷோ செல்ல உள்ளதாகவும், மாமண்டூர், படாளம் கூட்ரோடு, கருங்குழி அய்யனார் கோவில், சவரம்பாக்கம் உள்ளிட்ட பகுதிகளில் ரோடு ஷோ செல்ல இருப்பதாக கூறப்படுகிறது.

முதலமைச்சரின் வருகையை முன்னிட்டு தொகுதி முழுவதும் போலீஸ் பாதுகாப்பு இன்று முதலே பலப்படுத்தப்பட்டுள்ளது. வழிநெடுகிலும் தடுப்பு வேலிகள் அமைக்கப்பட்டு, பொதுமக்கள் சிரமமின்றி அவரைப் பார்க்கும் வகையிலும், எந்தவித அசம்பாவிதமும் ஏற்படாதவாறும் ஏற்பாடுகள் செய்யப்பட்டுள்ளன. சுமார் ஐந்து கிலோமீட்டருக்கு ஒரு எம்.எல்.ஏ. வீதம் நின்று பிரசாரத்தை ஒருங்கிணைக்க இருக்கின்றனர். இன்று த.வெ.க. பொதுச் செயலாளர் என். ஆனந்த் பிரசார ஏற்பாடுகளை நேரில் பார்வையிட்டு ஆய்வு செய்தார். 

இந்த இடைத்தேர்தல் மதுராந்தகம் தொகுதியின் அரசியல் சமநிலையை மீண்டும் உறுதிப்படுத்தும் முக்கிய நிகழ்வாகக் கருதப்படுகிறது. கூட்டணிக் கட்சிகளின் ஒற்றுமையும், முதலமைச்சரின் நேரடி ஈடுபாடும் வேட்பாளருக்குக் கூடுதல் வலிமையை அளிக்கும் என எதிர்பார்க்கப்படுகிறது.
 

இதையும் படிங்க: ஓம் காளி, ஜெய் காளி, தவெக ஒரு ஓடுகாலி: முதலமைச்சர் விஜயை வறுத்தெடுத்த உதயநிதி ஸ்டாலின்!