டெல்லி என்.சி.ஆர் (Delhi NCR) பகுதியில் துப்பாக்கிச் சூடு மற்றும் கையெறி குண்டுகள் மூலம் தாக்குதல் நடத்த திட்டமிட்டிருந்த குழுவில் தொடர்புடைய இரு இளைஞர்கள் கைது செய்யப்பட்டுள்ளனர். இந்த சம்பவம் பாதுகாப்பு அமைப்புகளை எச்சரிக்கையில் ஆழ்த்தியுள்ளது.

பாகிஸ்தானின் உளவு அமைப்பான Inter-Services Intelligence (ஐ.எஸ்.ஐ.) சார்பில் செயல்பட்டதாக கூறப்படும் ஷாசாத் பாத்தி என்ற நபர், இந்தியாவில் தாக்குதல் நடத்த திட்டமிட்டிருந்ததாக விசாரணையில் தெரியவந்துள்ளது. சமூக வலைதளங்கள் மூலம் இளைஞர்களை மூளைச் சலவை செய்து, பயங்கரவாத செயல்களில் ஈடுபடுத்த முயற்சித்ததாகவும் போலீசார் தெரிவித்துள்ளனர்.

இந்த சதித் திட்டம் குறித்து ரகசிய தகவல் கிடைத்ததையடுத்து, டெல்லி சிறப்புப் பிரிவு போலீசார் பல்வேறு இடங்களில் அதிரடி சோதனை நடத்தினர். அதில், மத்திய பிரதேசத்தின் குவாலியரை சேர்ந்த 19 வயதான விவேக் பஞ்சாரா முதலில் கைது செய்யப்பட்டார். அவர் அளித்த தகவலின் அடிப்படையில், 21 வயதான ராஜ்வீர் என்பவரை டெல்லியில் கைது செய்தனர்.

இதையும் படிங்க: இந்தியா எதையும் மறக்காது!! பஹல்காம் தாக்குதல் முதலாம் ஆண்டு நினைவு தினம்! இந்திய ராணுவம் பதில்!

ராஜ்வீர் கைது செய்யப்பட்ட போது, அவர் தங்கியிருந்த ஹோட்டலில் இருந்து ஒரு கைத்துப்பாக்கி, ஆறு தோட்டாக்கள் மற்றும் சதித் திட்டம் தொடர்பான வீடியோ, ஆடியோ ஆதாரங்கள் அடங்கிய இரண்டு மொபைல் போன்கள் பறிமுதல் செய்யப்பட்டன. மேலும், பிரபலமான மக்கள் கூடும் இடங்களை குறிவைத்து தாக்குதல் நடத்த திட்டமிட்டிருந்ததும் தெரியவந்துள்ளது.

விசாரணையில், இவர்கள் இருவரும் வெளிநாட்டில் இருந்த வழிகாட்டுதலின் பேரில் செயல்பட்டதாகவும், எளிதில் பணம் சம்பாதிக்கலாம் என்ற ஆசையில் இந்த வலையில் சிக்கியதாகவும் கூறப்படுகிறது. அஹமதபாத் (Ahmedabad) மற்றும் அமிர்தசரஸ் (Amritsar) போன்ற நகரங்களுக்கு சென்று சட்டவிரோதமாக ஆயுதங்கள் வாங்க முயன்றதும் கண்டுபிடிக்கப்பட்டுள்ளது.

இதேவேளை, குஜராத் (Gujarat) மாநிலத்தில் பயங்கரவாத தடுப்பு பிரிவு போலீசார் இருவரை கைது செய்துள்ளனர். “கஸ்வா-இ-ஹிந்த்” என்ற சிந்தனையை முன்னிறுத்தி, நாட்டின் பல்வேறு இடங்களில் தாக்குதல் நடத்த திட்டமிட்டிருந்ததாக அவர்கள் மீது குற்றச்சாட்டு சுமத்தப்பட்டுள்ளது. ஆர்.டி.எக்ஸ். போன்ற சக்தி வாய்ந்த வெடிகுண்டுகளை பயன்படுத்தி முக்கிய நகரங்களை குறிவைத்திருந்ததும் வெளிச்சத்துக்கு வந்துள்ளது.

இந்த சம்பவத்தில் தொடர்புடைய மேலும் சிலரை அடையாளம் காணும் பணி தீவிரமாக நடைபெற்று வருகிறது. இந்த கைது நடவடிக்கையால், டெல்லி உட்பட பல்வேறு நகரங்களில் நடைபெறவிருந்த பெரிய அளவிலான தாக்குதல் திட்டம் முறியடிக்கப்பட்டதாக போலீசார் தெரிவித்துள்ளனர்.

இதையும் படிங்க: வீட்ல யாருமில்ல! நீ வா!! இன்னைக்கு வித்யாசமா பண்ணலாம்!! காதலனை நைசாக வரவழைத்து கதையை முடித்த காதலி!!