சென்னை: தமிழக காங்கிரஸ் கட்சியில் முக்கிய பதவி வகித்த மாணிக்கம் தாகூர், தேர்தல் மேலாண்மை மற்றும் ஒருங்கிணைப்புக் குழு தலைவர் பதவியிலிருந்து திடீரென ராஜினாமா செய்துள்ளார். இந்த நடவடிக்கை கட்சியில் பெரும் பரபரப்பையும், உள் மோதலையும் ஏற்படுத்தியுள்ளது.

மாணிக்கம் தாகூர், விஜயின் தமிழக வெற்றி கழகத்துடன் காங்கிரஸை இணைக்க பெரும் முயற்சி எடுத்து வந்தவர். திமுகவிடமிருந்து காங்கிரஸை விலக்கி, விஜயுடன் கூட்டணி அமைக்க திரைமறைவில் தீவிரமாக செயல்பட்டார். ஆனால் அவரது முயற்சி வெற்றி பெறவில்லை. திமுக தனது தந்திரமான உள் வேலையின் மூலம் காங்கிரஸை தன்னுடன் தக்க வைத்துக் கொண்டது.

இறுதியில் திமுகவுடன் பேச்சுவார்த்தை முடிந்து, காங்கிரஸுக்கு 28 சட்டமன்றத் தொகுதிகளும், ஒரு ராஜ்யசபா எம்.பி. பதவியும் ஒதுக்கப்பட்டன. இந்த ஒப்பந்தத்துக்குப் பிறகு, திமுகவை கடுமையாக விமர்சித்து வந்த மாணிக்கம் தாகூரின் ஆதரவாளர்களுக்கு திமுக மாவட்டச் செயலாளர்கள் எச்சரிக்கை விடுத்தனர். “யார் போட்டியிட்டாலும் அவர்களுக்கு வெற்றி பெற உதவ மாட்டோம்” என்று அவர்கள் பேசியதாகக் கூறப்படுகிறது.

இதையும் படிங்க: காங்கிரசை கழட்டிவிட்டாச்சு?! திமுக வைக்கும் செக்!! அறிவாலயம் அறிவிச்சதும் இனி தனித்து போட்டி!

மேலும், மதுரை வடக்கு தொகுதியில் தனது ஆதரவாளரை நிறுத்த திட்டமிட்டிருந்த மாணிக்கம் தாகூரின் முயற்சியும் திமுகவால் தடுக்கப்பட்டது. தென் மாவட்டங்களில் அவரது விருப்பங்களை கூட தமிழக காங்கிரஸ் தலைமை கேட்கவில்லை என்று அவரது ஆதரவாளர்கள் குற்றம் சாட்டுகின்றனர்.

இந்த சூழலில் கடும் விரக்தியடைந்த மாணிக்கம் தாகூர், தனக்கு வழங்கப்பட்ட தேர்தல் மேலாண்மை மற்றும் ஒருங்கிணைப்புக் குழு தலைவர் பதவியிலிருந்து விலகுவதாக காங்கிரஸ் தேசியத் தலைவர் மல்லிகார்ஜுன் கார்கேவுக்கு கடிதம் அனுப்பியுள்ளார்.

இந்த ராஜினாமா தென் மாவட்டங்களில் உள்ள திமுகவினரிடையே மகிழ்ச்சியை ஏற்படுத்தியுள்ளது. “இனி தென் மாவட்டங்களில் காங்கிரஸ் வேட்பாளர்களின் வெற்றிக்காக முழு ஒத்துழைப்பு கொடுப்போம்” என்று அவர்கள் தெரிவித்து வருவதாகத் தகவல்கள் வெளியாகியுள்ளன.

மாணிக்கம் தாகூரின் ராஜினாமா தமிழக காங்கிரஸின் தேர்தல் உத்தியை பாதிக்கும் என்று அரசியல் வட்டாரங்கள் கருதுகின்றன. காங்கிரஸ் கட்சியில் திமுகவுக்கு எதிரான அதிருப்தி அதிகரித்து வரும் நிலையில், இந்த சம்பவம் கட்சியின் உள் ஒற்றுமையை கேள்விக்குள்ளாக்கியுள்ளது. தேர்தல் நெருங்கும் வேளையில் ஏற்பட்ட இந்த அதிர்ச்சி, தமிழக அரசியல் களத்தில் புதிய விவாதங்களை உருவாக்கியுள்ளது.

இதையும் படிங்க: பிரதமர் மோடியின் தமிழக பிரசாரம் ரத்து?! தமிழக பாஜக வேட்பாளர் தேர்வில் நீடிக்கும் குழப்பம்!