முன்னாள் அமைச்சர் மனோ தங்கராஜ் கடும் குற்றச்சாட்டை முன்வைத்துள்ளார். மக்களாட்சியின் காவலனாக இருக்க வேண்டிய தேர்தல் ஆணையம், மூக்கணாங்கயிறு கட்டப்பட்ட பசுமாட்டைப் போல பிரதமர் நரேந்திர மோடி மற்றும் உள்துறை அமைச்சர் அமித் ஷாவின் கட்டுப்பாட்டில் சிக்கி சீரழிந்து வருவதாக அவர் தெரிவித்தார். இந்நிலையில் 2024 பொதுத்தேர்தலில் வாரணாசி தொகுதியில் மோடி உண்மையிலேயே வெற்றி பெற்றாரா என்ற கேள்வி எழுவதாக மனோ தங்கராஜ் சுட்டிக்காட்டினார். அதற்கு வாய்ப்பில்லை என்பதற்கு பல காரணங்கள் இருப்பதாக அவர் விளக்கினார்.

மோடி போட்டியிட்ட வாரணாசியில் ஒரே முகவரியில் ஒரு தந்தைக்கு 50 பிள்ளைகள் இருப்பதாக வாக்காளர் பட்டியலில் இடம்பெற்றிருந்ததாக அவர் குறிப்பிட்டார். மேலும் ஆயிரக்கணக்கான ஒரே வாக்காளர்கள் வாரணாசி தொகுதியின் பல பாகங்களில் வாக்காளர்களாகப் பதிவு செய்யப்பட்டிருந்ததாகவும் தகவல்கள் வெளியாகி உள்ளதாக அவர் கூறினார். பிரபல நகைச்சுவை கலைஞர் ஷியாம் ரங்கீலாவின் வேட்புமனு தாக்கல் பல நாட்கள் இழுத்தடிக்கப்பட்டது.

இறுதியில் பொருட்டற்ற காரணங்களைக் காட்டி அது நிராகரிக்கப்பட்டது. வாரணாசியில் போட்டியிட விண்ணப்பித்த 41 பேரில் 33 பேரின் வேட்புமனுக்கள் திட்டமிட்டு நிராகரிக்கப்பட்டன. மேலும் எட்டு பேரை மனுதாக்கல் செய்யவே அனுமதிக்கவில்லை என்றும் மனோ தங்கராஜ் சுட்டிக்காட்டினார். வாக்கு எண்ணிக்கை நடந்த நாளில் மோடிக்கு எதிராகப் போட்டியிட்ட உத்தரப் பிரதேச காங்கிரஸ் கட்சித் தலைவர் அஜய் ராய் தொடர்ந்து முன்னிலையில் இருந்தார்.

இதையும் படிங்க: "எளிமையும் நேர்மையும்"..! லால் பகதூர் சாஸ்திரி பிறந்தநாள்... பிரதமர் மோடி மரியாதை..!!

ஆனால் தேர்தல் ஆணையம் திடீரென்று இரண்டரை மணி நேரம் தனது இணையதளத்தில் வாரணாசி தொகுதியின் வாக்கு எண்ணிக்கை நிலவரத்தை மறைத்து blackout செய்ததாக மனோ தங்கராஜ் குற்றஞ்சாட்டினார். இத்தகைய நடவடிக்கைகள் தேர்தல் செயல்பாட்டில் உள்ள முறைகேடுகளை வெளிப்படுத்துவதாகவும், மக்களாட்சியின் அடிப்படைகளை பாதிப்பதாகவும் அவர் எச்சரித்தார். தேர்தல் ஆணையம் சுதந்திரமாகவும் நடுநிலையுடனும் செயல்பட வேண்டும் என்றும், அதன் மீதான நம்பிக்கை மீண்டும் உருவாக்கப்பட வேண்டும் என்றும் மனோ தங்கராஜ் வலியுறுத்தினார்.

இதையும் படிங்க: 180 உயிர்களை காத்து... ஓவர் நைட்டில் ஹீரோவான இந்திய விமானி... பிரதமர் மோடி கொடுத்த ஸ்பெஷல் சர்ப்ரைஸ்...!