மறுமலர்ச்சி திராவிட முன்னேற்றக் கழகத்தின் உயர்நிலைக் குழுக் கூட்டம், 2025-ஆம் ஆண்டின் நிறைவுப் பகுதியில் அரசியல் களத்தில் பெரும் அதிர்வலைகளை ஏற்படுத்தியுள்ளது. தாயகத்தில் நடைபெற்ற இந்த முக்கிய அமர்வில், மத்திய அரசின் மக்கள் விரோதப் போக்குகளையும், தேர்தல் ஆணையத்தின் குளறுபடிகளையும் சாடி 7 வரலாற்றுச் சிறப்புமிக்க தீர்மானங்கள் நிறைவேற்றப்பட்டுள்ளன.  தேசத்தந்தை மகாத்மா காந்தியின் பெயரைத் திட்டங்களிலிருந்து நீக்குவது முதல், விவசாயிகளின் விதை உரிமையைப் பறிக்கும் ‘விதை மசோதா 2025’ வரை அனைத்தையும் மதிமுக வன்மையாகக் கண்டித்துள்ளது. 2026 சட்டமன்றத் தேர்தலை முன்னிறுத்தி வைகோ மேற்கொள்ளும் ‘சமத்துவ நடைபயணம்’ வெற்றிகரமாக அமையவும் தொண்டர்களுக்கு அழைப்பு விடுக்கப்பட்டுள்ளது.

மறுமலர்ச்சி திராவிட முன்னேற்றக் கழகத்தின் உயர்நிலைக் குழுக் கூட்டம், இன்று காலை 10 மணிக்கு சென்னை எழும்பூரில் உள்ள தலைமைக் கழகம் ‘தாயகத்தில்’ எழுச்சியுடன் நடைபெற்றது. கழக அவைத்தலைவர் ஆடிட்டர் ஆ.அர்ஜூன்ராஜ் தலைமையில் நடைபெற்ற இக்கூட்டத்தில், பொதுச்செயலாளர் வைகோ சிறப்புரையாற்றினார். முதன்மைச் செயலாளர் துரை வைகோ எம்.பி. உள்ளிட்ட முக்கிய நிர்வாகிகள் பங்கேற்ற இக்கூட்டத்தில், தமிழகத்தின் அரசியல் மற்றும் வாழ்வாதாரப் பிரச்சினைகளை முன்வைத்து 7 தீர்மானங்கள் நிறைவேற்றப்பட்டன.

முதல் தீர்மானமாக, தமிழகத்தில் 97.38 லட்சம் வாக்காளர்கள் நீக்கப்பட்ட விவகாரத்தில் தேர்தல் ஆணையத்தின் மீது மதிமுக தனது ஐயப்பாட்டைப் பதிவு செய்துள்ளது. “இடம்பெயர்ந்தவர்கள் என்ற பெயரில் 64 லட்சம் பேர் நீக்கப்பட்டிருப்பது சதிச் செயலோ என்று அஞ்சத் தோன்றுகிறது. பீகார் மாநிலத்தைப் போலவே தமிழகத்திலும் குளறுபடிகள் அரங்கேறி வருகின்றன” எனச் சாடிய உயர்நிலைக் குழு, விடுபட்ட தகுதியுள்ள வாக்காளர்களைச் சேர்க்க வரும் ஜனவரி 18-க்குள் படிவம் 6-ஐப் பூர்த்தி செய்யுமாறு தொண்டர்களுக்குக் கட்டளையிட்டுள்ளது.

இதையும் படிங்க: "210 தொகுதியா? 70-ஐ கூட தாண்ட மாட்டார்கள்": எடப்பாடி பழனிசாமிக்கு வைகோ பதிலடி!

முக்கிய தீர்மானமாக, மத்திய பாஜக அரசு ‘மகாத்மா காந்தி தேசிய ஊரக வேலை உறுதித் திட்டத்தின்’ பெயரிலிருந்து தேசத்தந்தையின் பெயரை நீக்கிவிட்டு, ‘விபி-ஜி ராம்-ஜி’ (VB-G RAM G) எனப் பெயரிட்டிருப்பதற்கு மதிமுக தனது வன்மமான கண்டனத்தைப் பதிவு செய்துள்ளது. இத்திட்டத்திற்கான நிதியை மாநிலங்களே 40 சதவீதம் ஏற்க வேண்டும் என்ற புதிய விதியைத் திரும்பப் பெற வலியுறுத்திய வைகோ, இது கிராமப்புற ஏழை மக்களின் வாழ்வாதாரத்தைச் சிதைக்கும் செயல் எனச் சாடினார். மேலும், நாடு முழுவதும் கிறிஸ்தவர்கள் மீது நடத்தப்பட்ட 700-க்கும் மேற்பட்ட கொடூரத் தாக்குதல்களைக் கண்டித்ததோடு, சிறுபான்மையினரின் பாதுகாப்பை உறுதி செய்யவும், பாசிசத்தை வேரறுக்க ஜனநாயகச் சக்திகள் அணியதிரளவும் அழைப்பு விடுக்கப்பட்டது.

விவசாயிகளின் பாரம்பரிய விதை உரிமையைப் பறித்து, அதை கார்ப்பரேட் நிறுவனங்களின் விற்பனைப் பண்டமாக மாற்றத் துடிக்கும் ‘விதை மசோதா 2025’ வரைவு அறிக்கைக்கு மதிமுக முற்றுப்புள்ளி வைக்கக் கோரியுள்ளது. "விதை என்பது நமது உணவு இறையாண்மை; அதைச் சில பெருநிறுவனங்களின் லாப வேட்டைக்குத் தாரை வார்ப்பது இந்தியாவின் எதிர்காலத்தையே அடகு வைப்பதற்குச் சமம்" எனத் தீர்மானம் நிறைவேற்றப்பட்டது. 

அதேபோல், மது மற்றும் போதைப்பொருள் ஒழிப்பு, சாதி நல்லிணக்கம் ஆகியவற்றை வலியுறுத்தி ஜனவரி 2 முதல் 12 வரை வைகோ மேற்கொள்ளும் 11-வது நடைபயணமான ‘சமத்துவ நடைபயணம்’ வெற்றியடையத் தமிழக மக்கள் ஆதரவு தர வேண்டும் எனக் கேட்டுக்கொள்ளப்பட்டது. 2026 சட்டமன்றத் தேர்தலை எதிர்கொள்ள பிப்ரவரி முதல் வாரம் முதல் நிதி திரட்டும் பணிகளும் தீவிரப்படுத்தப்பட உள்ளன.

இதையும் படிங்க: 100 நாள் வேலைத் திட்டத்தை சிதைக்க பார்க்கிறது மத்திய அரசு! அமைச்சர் ஐ.பெரியசாமி ஆவேசம்!