காவிரி நதிநீர் பிரச்சினையில் மேகதாது அணைத் திட்டம் தொடர்பான சமீபத்திய அரசியல் மற்றும் சட்ட நடைமுறைகள் தமிழக அரசியலில் பெரும் விவாதத்தை ஏற்படுத்தியுள்ளன. கர்நாடக அரசு காவிரி ஆற்றின் குறுக்கே மேகதாது பகுதியில் அணை கட்டும் முயற்சியை மேற்கொண்டு வருவதற்கு எதிர்ப்பு தெரிவித்து தமிழக சட்டமன்றத்தில் சிறப்புத் தீர்மானம் கொண்டு வரப்பட்டது. இந்தத் தீர்மானம் ஜூன் 19, 2026 அன்று சட்டமன்றத்தில் விவாதிக்கப்பட்டு நிறைவேற்றப்பட்டது.

அதன் மூலம் கர்நாடக அரசின் மேகதாது அணைத் திட்டத்திற்கு எந்தவித அனுமதியும் அளிக்கக்கூடாது என மத்திய அரசை வலியுறுத்தி சட்டமன்றம் கோரிக்கை விடுத்தது.தீர்மானம் கொண்டு வரப்பட்டபோது அசல் வரைவில் இல்லாத ஒரு முக்கியத் திருத்தம் இடம்பெற்றது. எதிர்க்கட்சித் தலைவர் உதயநிதி ஸ்டாலின், மாநிலங்களுக்கு இடையிலான நதிநீர் தகராறுகள் சட்டத்தின் கீழ் புதிய நடுவர் மன்றம் அமைக்க வேண்டும் என்ற கோரிக்கையை முன்வைத்தார்.

முதலமைச்சர் அந்தக் கோரிக்கையை ஏற்றுக்கொண்டார். சபாநாயகர் திருத்தப்பட்ட தீர்மானத்தை வாக்கெடுப்புக்கு விட்டு ஒருமனதாக நிறைவேற்றப்பட்டதாக அறிவித்தார். இந்தத் திருத்தம் அதிமுக, பாமக மற்றும் இந்திய கம்யூனிஸ்ட் கட்சி உள்ளிட்ட சில கட்சிகளால் எதிர்க்கப்பட்டது. அவர்கள் தீர்மான நகலில் முன்னரே இடம்பெறாத இந்த மாற்றம் விவாதமின்றி சேர்க்கப்பட்டதாகக் குற்றம் சாட்டினர்.இந்தத் திருத்தத்தை எதிர்த்து அதிமுக கொறடா அக்ரி கிருஷ்ணமூர்த்தி சென்னை உயர்நீதிமன்றத்தில் வழக்குத் தொடுத்தார். அவரது மனுவில், ஜூன் 18 அன்று உறுப்பினர்களுக்கு அனுப்பப்பட்ட தீர்மான நகலில் நடுவர் மன்றம் அமைக்கும் கோரிக்கை இடம்பெறவில்லை என்றும், அந்தத் திருத்தம் மீது தனியாக விவாதம் நடத்தப்படாமல், சட்டமன்ற விதிகளின்படி முறையாக நகர்த்தப்படாமல் தீர்மானம் நிறைவேற்றப்பட்டதாகவும் குறிப்பிடப்பட்டது.

இதையும் படிங்க: “தலைக்கணத்தில் ஆடாதீங்க...” - சி.எம். விஜய்க்கு நேரடி வார்னிங் கொடுத்த அதிமுக காளியம்மாள்...!

மேலும், ஒருமனதான ஆதரவு இல்லாதபோதும் அது ஒருமனதாக நிறைவேற்றப்பட்டதாக மத்திய அரசுக்கு அனுப்பப்பட்டதாகவும் அவர் குற்றம் சாட்டினார். திருத்தப்பட்ட பகுதியை ரத்து செய்யவும், அசல் தீர்மானத்தை மட்டும் செல்லுபடியாகக் கருதவும் அவர் கோரினார்.வழக்கு உயர்நீதிமன்றத் தலைமை நீதிபதி மற்றும் மற்றொரு நீதிபதி அடங்கிய அமர்வில் விசாரணைக்கு வந்தது. அரசுத் தரப்பில், திருத்தப்பட்ட தீர்மானமே வாக்கெடுப்புக்கு விடப்பட்டு ஒருமனதாக நிறைவேற்றப்பட்டதாக வாதிடப்பட்டது. சட்டமன்ற நடவடிக்கைகளின் வீடியோ பதிவுகளும் நீதிமன்றத்தில் காட்டப்பட்டன. எதிர்க்கட்சித் தரப்பு, திருத்தம் குறித்து தனியாக விவாதம் நடைபெறவில்லை என்றும், அது சட்டமன்ற விதிகளை மீறியது என்றும் வாதிட்டது.

இதையும் படிங்க: நெருங்கியது இடைத் தேர்தல்... இறுதி வேட்பாளர் பட்டியல் வெளியீடு..!! பரபரக்கும் அரசியல் களம்..!!