தமிழக நகராட்சி நிர்வாகத்துறை அமைச்சர் கே.என்.நேருவின் சகோதரர் என்.ரவிச்சந்திரன் மீது இந்தியன் ஓவர்சீஸ் வங்கியில் பெற்ற 30 கோடி ரூபாய் கடன் தொடர்பாக எழுந்த புகாரின் அடிப்படையில் சிபிஐ மற்றும் அமலாக்கத்துறை வழக்குகள் பதிவு செய்யப்பட்டிருந்தன. இந்த வழக்குகள் சென்னை உயர்நீதிமன்றத்தில் ரத்து செய்யப்பட்டுள்ளன, இது அரசியல் மற்றும் சட்ட வட்டாரங்களில் பெரும் பரபரப்பை ஏற்படுத்தியுள்ளது.
2013ஆம் ஆண்டு, ரவிச்சந்திரன் இயக்குநராக உள்ள டிருடம் இபிசி இண்டியா நிறுவனம், காற்றாலை மின்சார உற்பத்தி திட்டத்திற்காக இந்தியன் ஓவர்சீஸ் வங்கியில் 30 கோடி ரூபாய் கடன் பெற்றது. இந்தத் தொகை, நிறுவனத்தின் சகோதர நிறுவனங்களுக்கு மாற்றப்பட்டதாகவும், இதனால் வங்கிக்கு 22.48 கோடி ரூபாய் இழப்பு ஏற்பட்டதாகவும் புகார் எழுந்தது.
இதையும் படிங்க: கோர்ட்டுக்கு போன தவெக கொடி நிறப் பிரச்சனை.. 2 வாரம் கெடு.. பதிலளிக்க விஜய்க்கு பறந்த நோட்டீஸ்..!
இதன் அடிப்படையில், 2021இல் சிபிஐ வழக்கு பதிவு செய்தது, மேலும் அமலாக்கத்துறை சோதனைகள் நடத்தி, ஆவணங்கள் மற்றும் மின்னணு சாதனங்களை கைப்பற்றியது. ரவிச்சந்திரன், சிபிஐ வழக்கை ரத்து செய்யக் கோரி சென்னை உயர்நீதிமன்றத்தில் மனு தாக்கல் செய்தார். விசாரணையில், நீதிபதி சக்கரவர்த்தி, 30 லட்சம் ரூபாய் அபராதம் செலுத்த வேண்டும் என்ற நிபந்தனையுடன் (15 லட்சம் வங்கிக்கும், 15 லட்சம் தமிழ்நாடு சமரச தீர்வு மையத்திற்கும்) சிபிஐ வழக்கை ரத்து செய்து உத்தரவிட்டார்.
இந்நிலையில் இந்த வழக்கு இன்று விசாரணைக்கு வந்தது. அப்போது அமைச்சர் கே.என்.நேருவின் சகோதரர் ரவிச்சந்திரன் மீது அமலாக்கத்துறை பதிவு செய்த வழக்கை ரத்து செய்து சென்னை உயர்நீதிமன்றம் உத்தரவிட்டுள்ளது.
மேலும், அமலாக்கத்துறை சோதனையின்போது கைப்பற்றப்பட்ட பொருட்கள், மின்னணு சாதனங்கள் மற்றும் பணத்தை திருப்பி ஒப்படைக்கவும் உத்தரவிடப்பட்டது. இந்தத் தீர்ப்பு திமுக தரப்பில் வரவேற்பைப் பெற்றுள்ளது. அமைச்சர் நேரு, மத்திய அரசு அமலாக்கத்துறையைப் பயன்படுத்தி அரசியல் எதிரிகளை மிரட்டுவதாக முன்பு குற்றம்சாட்டியிருந்தார். இவ்வழக்கு தொடர்பான விவாதங்கள் சமூக ஊடகங்களிலும் தீவிரமாக நடைபெறுகின்றன.
இதையும் படிங்க: கோர்ட்டுக்கு போன தவெக கொடி நிறப் பிரச்சனை.. 2 வாரம் கெடு.. பதிலளிக்க விஜய்க்கு பறந்த நோட்டீஸ்..!