அக்டோபர் 6-ஆம் தேதி நடைபெறவுள்ள மதுராந்தகம் மற்றும் தாராபுரம் சட்டமன்ற இடைத்தேர்தல்கள், முதலமைச்சர் ஜோசப் விஜய் தலைமையிலான தமிழக வெற்றிக் கழக (தவெக) அரசுக்கு முதல் பெரிய சோதனையாக அமைந்துள்ளன. 2026 சட்டப்பேரவைத் தேர்தலில் அதிமுக சார்பில் வெற்றி பெற்ற பின் பதவி ராஜினாமா செய்து தவெகவில் இணைந்த மரகதம் குமரவேல் (மதுராந்தகம்) மற்றும் சத்யபாமா (தாராபுரம்) ஆகியோர் மீண்டும் தவெக வேட்பாளர்களாகப் போட்டியிடுகின்றனர். 

திமுக தரப்பில் பரந்தாமன் மற்றும் சுகன்யாவும், அதிமுக சார்பில் கணிதா சம்பத் மற்றும் பானுமதியும் களத்தில் உள்ளனர். நாம் தமிழர், கம்யூனிஸ்ட் கட்சிகள் மற்றும் சுயேச்சைகள் உள்ளிட்ட பலரும் போட்டியிட்டாலும், பிரதான மோதல் தவெக, திமுக, அதிமுக இடையேயே நடைபெறுகிறது. 

மதுராந்தகத்தில் தவெகவுக்கு சாதகமான சூழல் நிலவுவதாகக் கூறப்பட்டாலும், தாராபுரத்தில் நிலைமை சிக்கலாக உள்ளது. சத்யபாமாவின் பிரச்சார இடங்களில் மக்கள் எதிர்ப்பு தெரிவித்து விரட்டும் நிகழ்வுகள் அதிகரித்துள்ளன. உளவுத்துறை அளித்த அறிக்கையில் தாராபுரத்தில் வெற்றி வாய்ப்பு சந்தேகத்திற்குரியதாகக் குறிப்பிடப்பட்டதை அடுத்து, முதலமைச்சர் விஜய் கூடுதல் கவனம் செலுத்த உத்தரவிட்டுள்ளார். 

இதையும் படிங்க: 4 தொகுதி இடைத்தேர்தல் வழக்கு: முதல்வர் விஜய் மனுவை நிராகரிக்க தேர்தல் ஆணையம் பதில் மனு!

இதன் விளைவாக அமைச்சர்கள் செங்கோட்டையன், ஆனந்த், அருண்ராஜ், ஆதவ் அர்ஜுனா உள்ளிட்ட மூத்தவர்களும், வினோத், ரமேஷ், பர்வேஸ் போன்ற இளைய அமைச்சர்களும் தாராபுரத்தில் முகாமிட்டுள்ளனர். கட்சி நிர்வாகிகள், வாரியத் தலைவர்கள், எம்எல்ஏக்கள் என ஒட்டுமொத்த கவனமும் அங்கேயே குவிந்துள்ளது. இன்று முதலமைச்சர் விஜய் தாராபுரத்தில் நேரடிப் பிரச்சாரத்தில் ஈடுபடுகிறார்.

இந்த நிலையில் தமிழகத்தின் பல்வேறு பகுதிகளில் ஆட்சிக்கு எதிரான போராட்டங்கள் தீவிரமடைந்துள்ளன. சென்னை பட்டினப்பாக்கத்தில் புதிய தலைமைச் செயலகம் அமைப்பதற்கு எதிர்ப்பு தெரிவித்து மீனவர்கள் கருப்புக் கொடி ஏந்தி ஆர்ப்பாட்டம் நடத்தி, ஐந்து நாட்களுக்குள் அரசாணையை ரத்து செய்யக் கோரியுள்ளனர். 

தேனி மாவட்டம் மேகமலை-வருசநாடு பகுதிகளில் வனவெளியேற்ற நடவடிக்கைக்கு எதிராக மலைக்கிராம மக்கள் பல நாளாக காத்திருப்புப் போராட்டத்தில் ஈடுபட்டுள்ளனர். டெல்டா மாவட்டங்களில் விவசாயிகள் வறட்சி அறிவிப்பு, பயிர்க் கடன் தள்ளுபடி உள்ளிட்ட கோரிக்கைகளுடன் போராட்டங்களை முன்னெடுத்துள்ளனர். 

மக்கள் வாழ்வாதாரப் பிரச்சினைகளைக் கவனிப்பதை விடுத்து இடைத்தேர்தல் பணிகளில் மட்டும் அமைச்சர்களும் அதிகாரிகளும் ஈடுபட்டுள்ளதால், ஆட்சிப் பணிகள் பாதிக்கப்பட்டுள்ளதாக எதிர்க்கட்சிகள் மற்றும் பொதுமக்களிடையே கடும் அதிருப்தி எழுந்துள்ளது. இரண்டு தொகுதிகளிலும் வெற்றி பெறுவது தவெக அரசின் நிலைத்தன்மைக்கு முக்கியமானதாகக் கருதப்படுவதால், இந்தப் போட்டி தமிழக அரசியலில் பெரும் எதிர்பார்ப்பை ஏற்படுத்தியுள்ளது.
 

இதையும் படிங்க: தாராபுரத்தில் அக்.2ல் மு.க.ஸ்டாலின் ரோடு ஷோ பிரச்சாரம்: திமுக வேட்பாளருக்கு வாக்கு சேகரிப்பு!