ராமநாதபுரம் மாவட்டம் பரமக்குடியில் இன்று காலை தேர்தல் பரப்புரையில் ஈடுபட்ட முதலமைச்சர் மு.க. ஸ்டாலின், செய்தியாளர்களின் அரசியல் கேள்விகளுக்குத் தனது பாணியில் சுருக்கமாகவும் அதிரடியாகவும் பதிலளித்தார். குறிப்பாக, நடிகர் விஜய்யின் தமிழக வெற்றிக் கழகம் (தவெக) மற்றும் "ஜனநாயகன்" பட விவகாரம் குறித்த கேள்விகளை அவர் புன்னகையுடன் கடந்து சென்றார்.

திமுகவிற்குப் போட்டியாகத் தமிழக வெற்றிக் கழகம் உருவெடுத்துள்ளதா? என்ற செய்தியாளர்களின் கேள்விக்கு முதலமைச்சர் ஸ்டாலின் மிகவும் சுருக்கமாக நோ கமெண்ட்ஸ் (No Comments) என்று கூறி அந்த விவாதத்திற்கு முற்றுப்புள்ளி வைத்தார். இதன் மூலம், தவெக-வை ஒரு பெரிய அரசியல் சவாலாகத் தான் கருதவில்லை என்பதை அவர் மறைமுகமாக உணர்த்தியதாக அரசியல் நோக்கர்கள் கருதுகின்றனர்.

நடிகர் விஜய்யின் "ஜனநாயகன்" திரைப்படம் இணையத்தில் கசிந்தது மற்றும் அது தொடர்பான குற்றச்சாட்டுகள் குறித்துக் கேட்டபோது: இதற்கெல்லாம் பதில் சொல்ல வேண்டிய அவசியமில்லை எனத் திட்டவட்டமாகத் தெரிவித்தார். ஏற்கனவே சைபர் கிரைம் போலீசார் இது குறித்து நடவடிக்கை எடுத்து வருவதால், அதனை அரசியலாக்க அவர் விரும்பவில்லை என்பது குறிப்பிடத்தக்கது.

இதையும் படிங்க: இணையத்தில் லீக்கான ஜனநாயகன்! தொண்டர்கள் அதிர்ச்சி! விஜய்க்கு சாதகமா? பாதகமா?

பரமக்குடி எமனேஸ்வரம் பகுதியில் நடைபயிற்சி மேற்கொண்டிருந்த முதல்வர், அங்கிருந்த நெசவாளர் சாந்தாராம் என்பவரின் வீட்டிற்குள் திடீரென நுழைந்தார். அந்த எளிய குடும்பத்தினருடன் அமர்ந்து உரையாடிய அவர், அவர்களின் நெசவுத் தொழில் மற்றும் குடும்பச் சூழல் குறித்துக் கேட்டறிந்தார். பின்னர், அங்கிருந்த தூய்மைப் பணியாளர்களை நேரில் சந்தித்துக் கைகுலுக்கி, வேட்பாளர் கே.கே. கதிரவனுக்கு ஆதரவாக வாக்கு சேகரித்தார்.

பரமக்குடி ஆர்ச் மற்றும் காந்தி சிலை பகுதிகளில் முதல்வர் நடந்து சென்றபோது, நூற்றுக்கணக்கான பொதுமக்கள் அவரைச் சூழ்ந்து கொண்டனர். இளைஞர்கள் மற்றும் பெண்களின் வேண்டுகோளுக்கிணங்க, பொறுமையாக நின்று அவர்களுடன் செல்பி எடுத்து மகிழ்ந்தார். நகைக்கடை பஜார் வீதிகளில் வியாபாரிகளிடம் துண்டுப் பிரசுரங்களை வழங்கி உதயசூரியன் சின்னத்திற்கு ஆதரவு திரட்டினார்.

ராமநாதபுரம் மாவட்டத்தில் முதல்வரின் இந்தத் திடீர் நடைபயணம் மற்றும் எளிய மக்களுடனான சந்திப்பு, தேர்தல் களத்தில் திமுகவின் செல்வாக்கை மேலும் உயர்த்தியுள்ளதாக உடன்பிறப்புகள் உற்சாகத்துடன் தெரிவிக்கின்றனர்.

இதையும் படிங்க: முட்டிக்கு முட்டி தட்டி உள்ள போடுங்க! ஜனநாயகன் லீக்!! பாஜகவுக்கு தொடர்பில்லை - அண்ணாமலை ஆவேசம்!